Arya Durgashtakam Lyrics in Bengali:
॥ আর্যাদুর্গাষ্টকম্ ॥
শ্রীগণেশায় নমঃ ॥
আর্যাদুর্গাঽভিধানা হিমনগদুহিতা শঙ্করার্ধাসনস্থা
মাতা ষাণ্মাতুরস্যাখিলজনবিনুতা সংস্থিতা স্বাসনেঽগ্র্যে ।
গীতা গন্ধর্বসিদ্ধৈর্বিরচিতবিরুদৈর্যাঽখিলাঙ্গেষু পীতা
সংবীতা ভক্তবৃন্দৈরতিশুভচরিতা দেবতা নঃ পুনাতু ॥ ১ ॥
মাতস্ত্বাং সাম্বপত্নীং বিদুরখিলজনা বেদশাস্ত্রাশ্রয়েণ
নাহং মন্যে তথা ত্বাং ময়ি হরিদয়িতামম্বুজৈকাসনস্থাম্ ।
নিত্যং পিত্রা স দেশে নিজতনুজনিতা স্থাপ্যতে প্রেমভাবাত্
এতাদৃশ্যানুভূত্যো দধিতটসবিধে সংস্থিতাং তর্কয়ামি ॥ ২ ॥
নাসীদালোকিতা ত্বত্তনুরতিরুচিরাঽদ্যাবধীত্যাত্মদৃষ্ট্যা
লোকোক্ত্যা মে ভ্রমোঽভূত্সরসিজনিলয়ে নাময়ুগ্মাক্ষরার্থাত্ ।
সোঽয়ং সর্বো নিরস্তস্তব কনকময়ীং মূর্তিমালোক্য সদ্যঃ
সাঽপর্ণা স্বর্ণবর্ণার্ণবতনুজনিতে ন শ্রুতা নাপি দৃষ্টা ॥ ৩ ॥
শ্রীসূক্তোক্তাদ্যমন্ত্রাত্কনকময়তনুঃ স্বর্ণকঞ্জোচ্চহারা
সারা লোকত্রয়ান্তর্ভগবতিভবতীত্যেবমেবাগমোক্তম্ ।
তন্নামোক্তাক্ষরার্থাত্কথময়ি বিতথং স্যাত্সরিন্নাথকন্যে
দৃষ্টার্থে ব্যর্থতর্কো হ্যনয়পথগতিং সূচয়ত্যর্থদৃষ্ট্যা ॥ ৪ ॥
তন্বস্তে মাতরস্মিঞ্জগতি গুণবশাদ্বিশ্রুতাস্তিস্র এব
কালী শ্রীর্গীশ্চ তাসাং প্রথমমভিহিতা কৃষ্ণবর্ণা হ্মপর্ণা ।
লক্ষ্মীস্তু স্বর্ণবর্ণা বিশদতনুরথো ভারতী চেদমূষু
স্বচ্ছা নোনাপি কৃষ্ণা ভগবতি ভবতী শ্রীরসীত্যেব সিদ্ধম্ ॥ ৫ ॥
নামাদ্যায়াঃ স্বরূপং কনকময়মিদং মধ্যমায়াশ্চ য়ান-
মন্ত্যায়াঃ সিংহরূপং ত্রিতয়মপি তনৌ ধারয়ন্ত্যাস্তবেদৃক্ ।
দৃষ্ট্বা নূত্নৈব সর্বা ব্যবহৃতিসরণীরিন্দিরে চেদতর্ক্যা
ত্বামাদ্যাং বিশ্ববন্দ্যাং ত্রিগুণময়তনুং চেতসা চিন্তয়ামি ॥ ৬ ॥
ত্বদ্রূপজ্ঞানকামা বিবিধবিধসমাকৢপ্ততর্কৈরনেকৈ-
র্নো শক্তা নির্জরাস্তে বিধি-হরি-হরসংজ্ঞা জগদ্বন্দ্যপাদাঃ ।
কা শক্তির্মে ভবিত্রী জলনিধিতনয়ে জ্ঞাতুমুগ্রং তবেদং
রূপং নাম্না প্রভাবাদপি বিতথফলো মে বভূব প্রয়ত্নঃ ॥ ৭ ॥
অস্ত্বম্ব ত্বয়্যনেকৈরশুভশুভতরৈঃ কল্পিতৈরম্ব তর্কৈ-
রদ্যাহং মন্দবুদ্ধিঃ সরসিজনিলয়ে সাপরাধোঽস্মি জাতঃ ।
তস্মাত্ত্বত্পাদপদ্মদ্বয়নমিতশিরা প্রার্থয়াম্যেতদেব
ক্ষন্তব্যো মেঽপরাধো হরিহরদয়িতে ভেদবুদ্ধির্ন মেঽস্তি ॥ ৮ ॥
আর্যাদুর্গাষ্টকমিদমনন্তকবিনা কৃতম্ ।
তব প্রীতিকরং ভূয়াদিত্যভ্যর্থনমম্বিকে ॥ ৯ ॥
ইতি শ্রীমদনন্তকবিবিরচিতমার্যাদুর্গাষ্টকং সম্পূর্ণম্ ।
Also Read:
Arya Durga Ashtakam Lyrics in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil
