అవధూతాష్టకం స్వామీశుకదేవస్తుతిః చ Lyrics in Telugu:
శ్రీ పరమాత్మనే నమః ॥
అథ పరమహంస శిరోమణి-అవధూత-శ్రీస్వామీశుకదేవస్తుతిః
నిర్వాసనం నిరాకాఙ్క్షం సర్వదోషవివర్జితమ్ ।
నిరాలమ్బం నిరాతఙ్కం హ్యవధూతం నమామ్యహమ్ ॥ ౧॥
నిర్మమం నిరహఙ్కారం సమలోష్టాశ్మకాఞ్చనమ్ ।
సమదుఃఖసుఖం ధీరం హ్యవధూతం నమామ్యహమ్ ॥ ౨॥
అవినాశినమాత్మానం హ్యేకం విజ్ఞాయ తత్వతః ।
వీతరాగభయక్రోధం హ్యవధూతం నమామ్యహమ్ ॥ ౩॥
నాహం దేహో న మే దేహో జీవో నాహమహం హి చిత్ ।
ఏవం విజ్ఞాయ సన్తుష్టమ్ హ్యవధూతం నమామ్యహమ్ ॥ ౪॥
సమస్తం కల్పనామాత్రం హ్యాత్మా ముక్తః సనాతనః ।
ఇతి విజ్ఞాయ సన్తుష్టం హ్యవధూతం నమామ్యహమ్ ॥ ౫॥
జ్ఞానాగ్నిదగ్ధకర్మాణం కామసఙ్కల్పవర్జితమ్ ।
హేయోపాదేయహీనం తం హ్యవధూతం నమామ్యహమ్ ॥ ౬॥
వ్యామోహమాత్రవిరతౌ స్వరూపాదానమాత్రతః ।
వీతశోకం నిరాయాసం హ్యవధూతం నమామ్యహమ్ ॥ ౭॥
ఆత్మా బ్రహ్మేతి నిశ్చిత్య భావాభావౌ చ కల్పితౌ ।
ఉదాసీనం సుఖాసీనం హ్యవధూతం నమామ్యహమ్ ॥ ౮॥
స్వభావేనైవ యో యోగీ సుఖం భోగం న వాఞ్ఛతి ।
యదృచ్ఛాలాభసన్తుష్టం హ్యవధూతం నమామ్యహమ్ ॥ ౯॥
నైవ నిన్దాప్రశంసాభ్యాం యస్య విక్రియతే మనః ।
ఆత్మక్రీడం మహాత్మానం హ్యవధూతం నమామ్యహమ్ ॥ ౧౦॥
నిత్యం జాగ్రదవస్థాయాం స్వప్నవద్యోఽవతిష్ఠతే ।
నిశ్చిన్తం చిన్మయాత్మానం హ్యవధూతం నమామ్యహమ్ ॥ ౧౧॥
ద్వేష్యం నాస్తి ప్రియం నాస్తి నాస్తి యస్య శుభాశుభమ్ ।
భేదజ్ఞానవిహీనం తం హ్యవధూతం నమామ్యహమ్ ॥ ౧౨॥
జడం పశ్యతి నో యస్తు జగత్ పశ్యతి చిన్మయమ్ ।
నిత్యయుక్తం గుణాతీతం హ్యవధూతం నమామ్యహమ్ ॥ ౧౩॥
యో హి దర్శనమాత్రేణ పవతే భువనత్రయమ్ ।
పావనం జఙ్గమం తీర్థం హ్యవధూతం నమామ్యహమ్ ॥ ౧౪॥
నిష్కలం నిష్క్రియం శాన్తం నిర్మలం పరమామృతమ్ ।
అనన్తం జగదాధారం హ్యవధూతం నమామ్యహమ్ ॥ ౧౫॥
॥ ఇతి అవధూతాష్టకం సమాప్తమ్ ॥
