ശ്രീകൃഷ്ണാഷ്ടകം 4 Lyrics in Malayalam:
ശ്രിയാഽഽശ്ലിഷ്ടോ വിഷ്ണുഃ സ്ഥിരചരഗുരുര്‍വേദവിഷയോ
ധിയാം സാക്ഷീ ശുദ്ധോ ഹരിരസുരഹന്താബ്ജനയനഃ ।
ഗദീ ശങ്ഖീ ചക്രീ വിമലവനമാലീ സ്ഥിരരുചിഃ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 1॥
യതഃ സര്‍വം ജാതം വിയദനിലമുഖ്യം ജഗദിദം
സ്ഥിതൌ നിഃശേഷം യോഽവതി നിജസുഖാംശേന മധുഹാ ।
ലയേ സര്‍വം സ്വസ്മിന്‍ഹരതി കലയാ യസ്തു സ വിഭുഃ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 2॥
അസൂനായംയാദൌ യമനിയമമുഖ്യൈഃ സുകരണൈ/-
ര്‍നിരുദ്ധ്യേദം ചിത്തം ഹൃദി വിലയമാനീയ സകലം ।
യമീഡ്യം പശ്യന്തി പ്രവരമതയോ മായിനമസൌ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 3॥
പൃഥിവ്യാം തിഷ്ഠന്യോ യമയതി മഹീം വേദ ന ധരാ
യമിത്യാദൌ വേദോ വദതി ജഗതാമീശമമലം ।
നിയന്താരം ധ്യേയം മുനിസുരനൃണാം മോക്ഷദമസൌ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 4॥
മഹേന്ദ്രാദിര്‍ദേവോ ജയതി ദിതിജാന്യസ്യ ബലതോ
ന കസ്യ സ്വാതന്ത്ര്യം ക്വചിദപി കൃതൌ യത്കൃതിമൃതേ ।
ബലാരാതേര്‍ഗര്‍വം പരിഹരതി യോഽസൌ വിജയിനഃ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 5॥
വിനാ യസ്യ ധ്യാനം വ്രജതി പശുതാം സൂകരമുഖാം
വിനാ യസ്യ ജ്ഞാനം ജനിമൃതിഭയം യാതി ജനതാ ।
വിനാ യസ്യ സ്മൃത്യാ കൃമിശതജനിം യാതി സ വിഭുഃ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 6॥
നരാതങ്കോത്തങ്കഃ ശരണശരണോ ഭ്രാന്തിഹരണോ
ഘനശ്യാമോ വാമോ വ്രജശിശുവയസ്യോഽര്‍ജുനസഖഃ ।
സ്വയംഭൂര്‍ഭൂതാനാം ജനക ഉചിതാചാരസുഖദഃ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 7॥
യദാ ധര്‍മഗ്ലാനിര്‍ഭവതി ജഗതാം ക്ഷോഭകരണീ
തദാ ലോകസ്വാമീ പ്രകടിതവപുഃ സേതുധൃദജഃ ।
സതാം ധാതാ സ്വച്ഛോ നിഗമഗണഗീതോ വ്രജപതിഃ
ശരണ്യോ ലോകേശോ മമ ഭവതു കൃഷ്ണോഽക്ഷിവിഷയഃ ॥ 8॥
ഇതി ഹരിരഖിലാത്മാഽഽരാധിതഃ ശങ്കരേണ
ശ്രുതിവിശദഗുണോഽസൌ മാതൃമോക്ഷാര്‍ഥമാദ്യഃ ।
യതിവരനികടേ ശ്രീയുക്ത ആവിര്‍ബഭൂവ
സ്വഗുണവൃത ഉദാരഃ ശങ്ഖചക്രാഞ്ജഹസ്തഃ ॥ 9॥
ഇതി ശ്രീമത്പരമഹംസപരിവ്രാജകാചാര്യസ്യ
ശ്രീഗോവിന്ദഭഗവത്പൂജ്യപാദശിഷ്യസ്യ
ശ്രീമച്ഛങ്കരഭഗവതഃ കൃതൌ കൃഷ്ണാഷ്ടകം സമ്പൂര്‍ണം ॥
