ദേവീപദപങ്കജാഷ്ടകം Lyrics in Malayalam:
ശ്രീഗണേശായ നമഃ ॥
മാതസ്ത്വത്പദപങ്കജം കലയതാം ചേതോഽംബുജേ സന്തതം
മാനാഥാംബുജസംഭവാദ്രിതനയാകാന്തൈഃ സമാരാധിതം ।
വാച്ഛാപൂരണനിര്‍ജിതാമരമഹീരുങ്ഗര്‍വസര്‍വസ്വകം
വാചഃ സൂക്തിസുധാരസദ്രവമുചോ നിര്യാന്തി വക്ത്രോദരാത് ॥ 1॥
മാതസ്ത്വത്പദപങ്കജം മുനീമനഃകാസാരവാസാദരം
മായാമോഹമഹാന്ധകാരമിഹിരം മാനാതിഗപ്രാഭവം ।
മാതങ്ഗാഭിമതിം സ്വകീയഗമനൈര്‍നിര്‍മുലയത്കൌതുകാദ്-
വന്ദേഽമന്ദതപഃഫലാപ്യനമനസ്തോത്രാര്‍ചനാപ്രക്രമം ॥ 2॥
മാതസ്ത്വത്പദപങ്കജം പ്രണമതാമാനന്ദവാരാന്നിധേ
രാകാശാരദപൂര്‍ണചന്ദ്രനികരം കാമാഹിപക്ഷീശ്വരം ।
വൃന്ദം പ്രാണഭൃതാം സ്വനാമ വദതാമത്യാദരാത്സത്വരം
ഷഡ്ഭാഷാസരിദീശ്വരം പ്രവിദധത്ഷാണ്‍മാതുരാര്‍ച്യം ഭജേ ॥ 3॥
കാമം ഫാലതലേ ദുരക്ഷരതതിര്‍ദൈവീമമസ്താം ന ഭീ-
ര്‍മാതസ്ത്വത്പദപങ്കജോത്ഥരജസാ ലുമ്പാമി താം നിശ്ചിതം ।
മാര്‍കണ്ഡേയമുനിര്യഥാ ഭവപദാംഭോജാര്‍ചനാപ്രാഭവാത്
കാലം തദ്വദഹം ചതുര്‍മുഖമുഖാംഭോജാതസൂര്യപ്രഭേ ॥ 4॥
പാപാനി പ്രശമം നയാശു മമതാം ദേഹേന്ദ്രിയപ്രാണഗാം
കാമാദീനപി വൈരിണോ ദൃഢതരാന്‍മോക്ഷാധ്വവിഘ്നപ്രദാന്‍ ।
സ്നിഗ്ധാന്‍പോഷയ സന്തതം ശമദമധ്യാനാദിമാന്‍മോദതോ
മാതസ്ത്വത്പദപങ്കജം ഹൃദി സദാ കുര്‍വേ ഗിരാം ദേവതേ ॥ 5॥
മാതസ്ത്വത്പദപങ്കജസ്യ മനസാ വാചാ ക്രിയാതോഽപി വാ
യേ കുര്‍വന്തി മുദാഽന്വഹം ബഹുവിധൈര്‍ദിവ്യൈഃ സുമൈരര്‍ചനാം ।
ശീഘ്രം തേ പ്രഭവന്തി ഭൂമിപതയോ നിന്ദന്തി ച സ്വശ്രിയാ
ജംഭാരാതിമപി ധ്രുവം ശതമഖീകഷ്ടാപ്തനാകശ്രിയം ॥ 6॥
മാതസ്ത്വത്പദപങ്കജം ശിരസി യേ പദ്മാടവീമധ്യത-
ശ്ചന്ദ്രാഭം പ്രവിചിന്തയന്തി പുരുഷാഃ പീയൂഷവര്‍ഷ്യന്വഹം ।
തേ മൃത്യും പ്രവിജിത്യി രോഗരഹിതാഃ സംയഗ്ദൃഢാങ്ഗാശ്ചിരം
ജീവന്ത്യേവ മൃണാലകോമലവപുഷ്മന്തഃ സുരൂപാ ഭുവി ॥ 7॥
മാതസ്ത്വത്പദപങ്കജം ഹൃദി മുദാ ധ്യായന്തി യേ മാനവാഃ
സച്ചിദ്രൂപമശേഷവേദശിരസാം താത്പര്യഗംയം മുഹുഃ ।
അത്യാഗേഽപി തനോരഖണ്ഡപരമാനന്ദം വഹന്തഃ സദാ
സര്‍വം വിശ്വമിദം വിനാശി തരസാ പശ്യന്തി തേ പൂരുഷാഃ ॥ 8॥
ഇതി ദേവീപദപങ്കജാഷ്ടകം സമ്പൂര്‍ണം ॥
