Durga Saptashati Moorthi Rahasyam in English:
॥ mūrti rahasyam ॥
r̥ṣiruvāca |
ōṁ nandā bhagavatī nāma yā bhaviṣyati nandajā |
stutā sā pūjitā bhaktyā vaśīkuryājjagattrayam || 1 ||
kanakōttamakāntiḥ sā sukāntikanakāmbarā |
dēvī kanakavarṇābhā kanakōttamabhūṣaṇā || 2 ||
kamalāṅkuśapāśābjairalaṅkr̥tacaturbhujā |
indirā kamalā lakṣmīḥ sā śrī rukmāmbujāsanā || 3 ||
yā raktadantikā nāma dēvī prōktā mayānagha |
tasyāḥ svarūpaṁ vakṣyāmi śr̥ṇu sarvabhayāpaham || 4 ||
raktāmbarā raktavarṇā raktasarvāṅgabhūṣaṇā |
raktāyudhā raktanētrā raktakēśātibhīṣaṇā || 5 ||
raktatīkṣṇanakhā raktadaśanā raktadantikā |
patiṁ nārīvānuraktā dēvī bhaktaṁ bhajējjanam || 6 ||
vasudhēva viśālā sā sumēruyugalastanī |
dīrghau lambāvatisthūlau tāvatīva manōharau || 7 ||
karkaśāvatikāntau tau sarvānandapayōnidhī |
bhaktān sampāyayēddēvī sarvakāmadughau stanau || 8 ||
khaḍgaṁ pātraṁ ca musalaṁ lāṅgalaṁ ca bibharti sā |
ākhyātā raktacāmuṇḍā dēvī yōgēśvarīti ca || 9 ||
anayā vyāptamakhilaṁ jagatsthāvarajaṅgamam |
imāṁ yaḥ pūjayēdbhaktyā sa vyāpnōti carācaram || 10 ||
[bhuktvā bhōgān yathākāmaṁ dēvīsāyujyamāpnuyāt |]
adhītē ya imaṁ nityaṁ raktadantyā vapuḥstavam |
taṁ sā paricarēddēvī patiṁ priyamivāṅganā || 11 ||
śākambharī nīlavarṇā nīlōtpalavilōcanā |
gambhīranābhistrivalīvibhūṣitatanūdarī || 12 ||
sukarkaśasamōttuṅgavr̥ttapīnaghanastanī |
muṣṭiṁ śilīmukhāpūrṇaṁ kamalaṁ kamalālayā || 13 ||
puṣpapallavamūlādiphalāḍhyaṁ śākasañcayam |
kāmyānantarasairyuktaṁ kṣuttr̥ṇmr̥tyubhayāpaham || 14 ||
kārmukaṁ ca sphuratkānti bibhratī paramēśvarī |
śākambharī śatākṣī sā saiva durgā prakīrtitā || 15 ||
viśōkā duṣṭadamanī śamanī duritāpadām |
umā gaurī satī caṇḍī kālikā sā ca pārvatī || 16 ||
śākambharīṁ stuvan dhyāyan japan sampūjayannaman |
akṣayyamaśnutē śīghramannapānāmr̥taṁ phalam || 17 ||
bhīmāpi nīlavarṇā sā daṁṣṭrādaśanabhāsurā |
viśālalōcanā nārī vr̥ttapīnapayōdharā || 18 ||
candrahāsaṁ ca ḍamaruṁ śiraḥpātraṁ ca bibhratī |
ēkavīrā kālarātriḥ saivōktā kāmadā stutā || 19 ||
tējōmaṇḍaladurdharṣā bhrāmarī citrakāntibhr̥t |
citrānulēpanā dēvī citrābharaṇabhūṣitā || 20 ||
citrabhramarapāṇiḥ sā mahāmārīti gīyatē |
ityētā mūrtayō dēvyā yāḥ khyātā vasudhādhipa || 21 ||
jaganmātuścaṇḍikāyāḥ kīrtitāḥ kāmadhēnavaḥ |
idaṁ rahasyaṁ paramaṁ na vācyaṁ kasyacittvayā || 22 ||
vyākhyānaṁ divyamūrtīnāmabhīṣṭaphaladāyakam |
tasmāt sarvaprayatnēna dēvīṁ japa nirantaram || 23 ||
saptajanmārjitairghōrairbrahmahatyāsamairapi |
pāṭhamātrēṇa mantrāṇāṁ mucyatē sarvakilbiṣaiḥ || 24 ||
dēvyā dhyānam mayā khyātaṁ guhyādguhyataraṁ mahat |
tasmāt sarvaprayatnēna sarvakāmaphalapradam || 25 ||
ētasyāstvaṁ prasādēna sarvamānyō bhaviṣyasi |
sarvarūpamayī dēvī sarvaṁ dēvīmayaṁ jagat |
atō:’haṁ viśvarūpāṁ tāṁ namāmi paramēśvarīm || 26 ||
iti mūrtirahasyaṁ sampūrṇam |
Also Read:
Durga Saptashati Moorthi Rahasyam Lyrics in English | Hindi |Kannada | Telugu | Tamil
