Gita - Geetaa

Gurujnanavasishtha’s Ribhu Gita Lyrics in Bengali

Ribhu Geetaa in Bengali:

॥ ঋভুগীতা গুরুজ্ঞানবাসিষ্ঠে ॥ From Gurujnanavasishtha
প্রথমোঽধ্যায়ঃ ।
শ্রী গুরুমূর্তিঃ ।
পুনর্জ্ঞানং প্রবক্ষ্যামি যথাবৎপদ্মসম্ভব ।
যেনৈব সর্বে মুচ্যন্তে জনাস্সংসারবন্ধনাৎ ॥ ১.০১॥

বিধে পুরা নিদাঘাখ্যো মুনিঃ পপ্রচ্ছ সদ্গুরুম্ ।
ঋভুসংজ্ঞং মহাপ্রাজ্ঞং তদ্বদামি তবাধুনা ॥ ১.০২॥

নিদাঘঃ ।
আত্মানাত্মবিবেকং মে কৃপয়া ব্রূহি সদ্গুরো ।
যেন সংসারপাদোধিং তরিষ্যামি সুখেন বৈ ॥ ১.০৩॥

ঋভুরেবং তদা পৃষ্ট উবাচ সকলার্থবিৎ ।
সর্ববেদান্তসারজ্ঞস্সর্বপূজ্যো মহত্তমঃ ॥ ১.০৪॥

ঋভুঃ ।
সর্ববাচোঽবধির্ব্রহ্ম সর্বচিন্তাঽবধির্গুরুঃ ।
সর্বকারণকার্যাত্মা কার্যকারণবর্জিতঃ ॥ ১.০৫॥

সর্বসংকল্পরহিতস্সর্বনাদময়শ্শিবঃ ।
সর্ববর্জিতচিন্মাত্রস্সর্বানন্দময়ঃ পরঃ ॥ ১.০৬॥

সর্বতেজঃ প্রকাশাত্মা নাদানন্দময়াত্মকঃ ।
সর্বানুভবনির্মুক্তঃ সর্বধ্যানবিবর্জিতঃ ॥ ১.০৭॥

সর্বনাদকলাতীত এষ আত্মাঽহমব্যযঃ ।
আত্মানাত্মবিবেকাদি ভেদাভেদবিবর্জিতঃ ॥ ১.০৮॥

শান্তাশান্তাদিহীনাত্মা নাদান্তর্জ্যোতিরাত্মকঃ ।
মহাবাক্যার্থতো দূরো ব্রহ্মাস্মীত্যতি দূরগঃ ॥ ১.০৯॥

তচ্ছব্দবর্জ্যস্ত্বংশব্দহীনো বাক্যার্থবর্জিতঃ ।
ক্ষরাক্ষরবিহীনো যো নাদান্তর্জ্যোতিরেব সঃ ॥ ১.১০॥

অখণ্ডৈকরসো বাঽহমানন্দোস্মীতি বর্জিতঃ ।
সর্বাতীতস্বভাবাত্মা নাদান্তর্জ্যোতিরেব সঃ ॥ ১.১১॥

আত্মেতি শব্দহীনো য আত্মশব্দার্থবর্জিতঃ ।
সচ্চিদানন্দহীনো য এষৈবাত্মা সনাতনঃ ॥ ১.১২॥

ননির্দেষ্টুং চ শক্নো যো বেদবাক্যৈরগম্যকঃ ।
যস্য কিঞ্চিদ্বহির্নাস্তি কিঞ্চিদন্তঃ কিয়ন্নচ ॥ ১.১৩॥

যস্য লিঙ্গং প্রপংচং বা ব্রহ্মৈবাত্মা ন সংশয়ঃ ।
নাস্তি যস্য শরীরং বা জীবো বা ভূতভৌতিকঃ ॥ ১.১৪॥

নামরূপাঽদিকং নাস্তি ভোজ্যং বা ভোগভুক্চ বা ।
সদ্বাঽসদ্বা স্থিতির্বাঽপি যস্য নাস্তি ক্ষরাক্ষরম্ ॥ ১.১৫॥

গুণং বা বিগুণং বাঽপি সম আসীন্ ন সংশয়ঃ ।
যস্য বাচ্যং বাচকং বা শ্রবণং মননং চ বা ॥ ১.১৬॥

গুরুশিষ্যাঽদি ভেদং বা দেবলোকাস্সুরাসুরাঃ ।
যত্র ধর্মমধর্মং বা শুদ্ধং বাঽশুদ্ধমণ্বপি ॥ ১.১৭॥

যত্র কালমকালং বা নিশ্চয়ং সংশয়ং নহি ।
যত্র মন্ত্রমমন্ত্রং বা বিদ্যাঽবিদ্যে ন বিদ্যতে ॥ ১.১৮॥

দ্রষ্টৃদর্শনদৃশ্যং বা ঈষণ্মাত্রং কলাদিকম্ ।
অনাত্মেতি প্রসংগো বা হ্যনাত্মেতি মনোপি বা ॥ ১.১৯॥

অনাত্মেতি জগদ্বাঽপি নাস্তি নাস্তীতি নিশ্চিনু ।
সর্বসংকল্পশূন্যৎবাৎ সর্বকার্যবিবর্জনাৎ ॥ ১.২০॥

কেবলং ব্রহ্মমাত্রৎবাৎ নাস্ত্যনাত্মেতি নিশ্চিনু ।
দেহত্রয়বিহীনৎবাৎ কালত্রয়বিবর্জনাৎ ॥ ১.২১॥

লোকত্রয়বিহীনৎবাৎ সর্বমাত্মেতি শাসনাৎ ।
চিত্তাভাবান্নচিন্তাস্তি দেহাভাবাজ্জরা ন চ ॥ ১.২২॥

পাদাভাবাদ্গতির্নাস্তি হস্তাভাবাৎ ক্রিয়া ন চ ।
মৃত্যুর্নাস্তি জরাঽভাবাৎ বুদ্ধ্যভাবাৎ সুখাদিকম্ ॥ ১.২৩॥

ধর্মো নাস্তি শুচির্নাস্তি সত্যং নাস্তি ভয়ং ন চ ।
অক্ষরোচ্চারণম্ নাস্তি গুরুশিষ্যাদি নাস্ত্যপি ॥ ১.২৪॥

একাভাবে দ্বিতীয়ং ন ন দ্বিতীয়ে নচৈকতা ।
সত্যৎবমস্তিচেৎ কিংচিদসত্যং ন চ সংভবেৎ ॥ ১.২৫॥

অসত্যৎবং যদি ভবেৎ সত্যৎবং ন বদিষ্যতি ।
শুভং যদ্যশুভং বিদ্ধি অশুভাচ্চুভমিষ্যতে ॥ ১.২৬॥

ভয়ং যদ্যভয়ং বিদ্ধি অভয়াদ্ভয়মাপতেৎ ।
বন্ধৎবমপিচেন্মোক্ষো বন্ধাভাবে ন মোক্ষতা ॥ ১.২৭॥

মরণম্ যদি চেজ্জন্ম জন্মাভাবে মৃতির্নচ ।
ৎবমিত্যপি ভবেচ্চাহং ৎবং নো চেদহমেব ন ॥ ১.২৮॥

ইদং যদি তদেবাস্তি তদভাবাদিদং ন চ ।
অস্তীতি চেন্নাস্তি তদা নাস্তিচেদস্তি কিঞ্চন ॥ ১.২৯॥

কার্যং চেৎকারণম্ কিংচিৎ কার্যাভাবে ন কারণম্ ।
দ্বৈতং যদি তদাঽদ্বৈতং দ্বৈতাভাবেঽদ্বয়ং ন চ ॥ ১.৩০॥

দৃশ্যং যদি দৃগপ্যস্তি দৃশ্যাভাবে দৃগেব ন ।
অন্তর্যদি বহিস্সত্যমন্তাভাবে বহির্নচ ॥ ১.৩১॥

পূর্ণৎবমস্তি চেদ্কিংচিদপূর্ণৎবং প্রসজ্যতে ।
তস্মাদেতদ্ক্বচিন্নাস্তি ৎবং চাহং বা ইমে ইদম্ ॥ ১.৩২॥

নাস্তি দৃষ্টান্তকস্সত্যে নাস্তিদার্ষ্টান্তিকং হ্যজে ।
পরং ব্রহ্মাহমস্মীতি স্মরণস্য মনো নহি ॥ ১.৩৩॥

ব্রহ্মমাত্রং জগদিদং ব্রহ্মমাত্রং ৎবমপ্যহম্ ।
চিন্মাত্রং কেবলং চাহং নাস্ত্যনাত্মেতি নিশ্চিনু ॥ ১.৩৪॥

ইদং প্রপংচং নাস্ত্যেব নোৎপন্নং নোস্থিতং ক্বচিৎ ।
চিত্তং প্রপংচমিত্যাহুর্নাস্তি নাস্ত্যেব সর্বদা ॥ ১.৩৫॥

ন প্রপংচং ন চিত্তদি নাহংকারো ন জীবকঃ ।
মায়াকার্যাদিকং নাস্তি মায়া নাস্তি ভয়ং ন চ ॥ ১.৩৬॥

কর্তা নাস্তি ক্রিয়া নাস্তি শ্রবণং মননং ন হি ।
সমাধি দ্বিতয়ং নাস্তি মাতৃমানাদি নাস্তি হি ॥ ১.৩৭॥

অজ্ঞানং চাপি নাস্ত্যেব হ্যবিবেকঃ কদা চ ন ।
অনুবন্ধচতুষ্কং ন সংবন্ধত্রয়মেব ন ॥ ১.৩৮॥

ন গংগা ন গয়া সেতুর্ন ভূতং নান্যদস্তি হি ।
ন ভূমির্ন জলং নাগ্নির্ন বায়ুর্ন চ খং ক্বচিৎ ॥ ১.৩৯॥

ন দেবো ন চ দিক্পালা ন বেদা ন গুরুঃ ক্বচিৎ ।
ন দূরং নাতিকং নান্তং ন মধ্যং ন ক্বচিৎ স্থিতম্ ॥ ১.৪০॥

নাদ্বৈতদ্বৈতসত্যং বা হ্যসত্যং বা ইদং চ ন ।
বন্ধমোক্ষাদিকং নাস্তি সদ্বাঽসদ্বা সুখাদি বা ॥ ১.৪১॥

জাতির্নাস্তি গতির্নাস্তি বর্ণো নাস্তি ন লৌকিকম্ ।
সর্বং ব্রহ্মেতি নাস্ত্যেব ব্রহ্ম ইত্যেব নাস্তি হি ॥ ১.৪২॥

চিদিত্যেবেতি নাস্ত্যেব চিদহং ভাষণং নহি ।
অহং ব্রহ্মাস্মি নাস্ত্যেব নিত্যশুদ্ধোস্মি ন ক্বচিৎ ॥ ১.৪৩॥

বাচা যদুচ্যতে কিংচিন্ মনসা মনুতে ক্বচিৎ ।
বুদ্ধ্যা নিশ্চিনুতে নাস্তি চিত্তেন জ্ঞায়তে নহি ॥ ১.৪৪॥

যোগিয়োগাদিকং নাস্তি সদা সর্বং সদা ন চ ।
অহোরাত্রাদিকং নাস্তি স্নানধ্যানাদিকং নহি ॥ ১.৪৫॥

ভ্রান্ত্যভ্রান্ত্যাদিকং নাস্তি নাস্ত্যনাত্মেতি নিশ্চিনু ।
বেদশ্শাস্ত্রং পুরাণং চ কার্যং কারণমীশ্বরঃ ॥ ১.৪৬॥

লোকো ভূতং জনস্ত্বৈক্যং সর্বং মিথ্যা ন সংশয়ঃ ।
বাচা বদতি যৎকিংচিৎসংকল্পৈঃ কল্প্যতে চ যৎ ॥ ১.৪৭॥

মনসা চিন্ত্যতে যদ্যৎ সর্বং মিথ্যা ন সংশয়ঃ ।
বুদ্ধ্যা নিশ্চীয়তে কিংচিচ্চিত্তে নিশ্চীয়তে ক্বচিৎ ॥ ১.৪৮॥

শাস্ত্রৈঃ প্রপংচ্যতে যদ্যৎ নেত্রেণৈব নিরীক্ষ্যতে ।
শ্রোত্রাভ্যাং শ্রূয়তে যদ্যদন্যৎসদ্ভাবমেব চ ॥ ১.৪৯॥

ৎবমহং তদিদং সোঽহমন্যৎ সদ্ভাবমেব চ ।
নেত্রং শ্রোত্রং গাত্রমেব মিথ্যেতি চ সুনিশ্চিতম্ ॥ ১.৫০॥

ইদং মিধ্যৈবনির্দিষ্টময়মিত্যেব কল্প্যতে ।
যদ্যৎসংভাব্যতে লোকে সর্বং সংকল্পসংভ্রমঃ ॥ ১.৫১॥

সর্বাধ্যাসং সর্বগোপ্যং সর্বভোগপ্রভেদকম্ ।
সর্বদোষপ্রভেদং চ নাস্ত্যনাত্মেতি নিশ্চিনু ॥ ১.৫২॥

মদীয়ং চ ৎবদীয়ং চ মমেতি চ তবেতি চ ।
মহ্যং তুভ্যং ময়েত্যাদি তৎসর্বং বিতথং ভবেৎ ॥ ১.৫৩॥

রক্ষকো বিষ্ণুরিত্যাদি ব্রহ্মা সৃষ্টেস্তু কারণম্ ।
সংহারে রুদ্র ইত্যেবং সর্বং মিথ্যেতি নিশ্চিনু ॥ ১.৫৪॥

স্নানং জপস্তপো হোমস্স্বাধ্যায়ো দেবপূজনম্ ।
মন্ত্রং তন্ত্রং চ সৎসঙ্গো গুণদোষবিজৃভণম্ ॥ ১.৫৫॥

অন্তঃকরণ সদ্ভাবোঽবিদ্যায়াশ্চ সংভবঃ ।
অনেককোটিব্রহ্মাণ্ডং সর্বং মিথ্যেতি নিশ্চিনু ॥ ১.৫৬॥

সর্বদেশিকবাক্যোক্তির্যেনকেনাপি নিশ্চিতা ।
দৃশ্যতে জগতি যদ্যৎ যদ্যজ্জগতি বীক্ষ্যতে ॥ ১.৫৭॥

বর্ততে জগতি যদ্যৎ সর্বং মিথ্যেতি নিশ্চিনু ।
যেনেকেনাক্ষরেণোক্তং যেনেকেন বিবর্ণিতম্ ॥ ১.৫৮॥

যেনেকেনাপি গদিতং যেনেকেনাপি মোদিতম্ ।
যেনেকেনাপি যদ্দত্তং যেনকেনাপি যৎকৃতম্ ॥ ১.৫৯॥

যত্রয়ত্র শুভং কর্ম যত্রয়ত্র চ দুষ্কৃতম্ ।
যদ্যৎকরোতি সত্যেন সর্বং মিথ্যেতি নিশ্চিনু ॥ ১.৬০॥

ইদং প্রপংচং যৎকিংচিৎ যদ্যজ্জগতি বিদ্যতে ।
দৃশ্যরূপং চ দৃগ্রূপং সর্বং শশবিষাণবৎ ॥ ১.৬১॥

শ্রী গুরুমূর্তিঃ ।
এবং শ্রুৎবা নিদাঘস্স ব্রহ্মন্ সংশয়বেষ্টিতঃ ।
ঋভুং পপ্রচ্ছ পুনরপ্যাত্মবিজ্ঞানসিদ্ধয়ে ॥ ১.৬২॥

নিদাঘঃ ।
স্বামিন্ মুমুক্ষোস্সংসারান্ মমারূপেণ বস্তুনা ।
প্রপংচিতেন ন ফলং ভবেদিতি মে মতিঃ ॥ ১.৬৩॥

যতস্ত্বদ্কথিতং ব্রহ্ম তত্ত্বমস্যাদ্যগোচরম্ ।
অখণ্ডৈকরসাতীতং মোক্ষাতীতং চ সদ্গুরো ॥ ১.৬৪॥

জ্ঞেয়ৎবাদিবিহীনং তৎ কথং জ্ঞাস্যাম্যহং নু বা ।
তজ্জ্ঞানেন ফলং কিং বা মোক্ষস্যৈব ফলৎবতঃ ॥ ১.৬৫॥

ফলমাস্তিক্যবুদ্ধ্যা স্যান্ ন চৈবংভূতবস্তুনঃ ।
ৎবদুক্ত নিশ্চয়ে সর্বসাংকর্যং চ প্রসজ্যতে ॥ ১.৬৬॥

যদ্যুক্ত ব্যতিরিক্তানাং সর্বেষাং স্যাদনাত্মতা ।
হেয়ৎবান্নৈব জিজ্ঞাস্যং কিংচিদপ্যত্র সিদ্ধ্যতি ॥ ১.৬৭॥

শশশৃংগ সমানৎবং যথাপ্রোক্তমনাত্মনাম্ ।
অত্যন্তারূপবত্ত্বেন তথা তৎসিদ্ধিরাত্মনঃ ॥ ১.৬৮॥

অথবা তৎ তথৈবাস্তাম্ অন্যথাবাপি মে গুরো ।
যজ্জ্ঞানেন ভবান্মুক্তির্ভবেৎ তদ্ ব্রূহি বেদিতুম্ ॥ ১.৬৯॥

এবম্ উক্তো নিদাঘেন কুশাগ্রমতিনা পরম্ ।
ঋভুস্সন্তুষ্টহৃদয়ঃ পুনরেবাব্রবীদিদম্ ॥ ১.৭০॥

ঋভুঃ ।
নিদাঘ সত্যমেবৈতত্ত্বদুক্তং যুক্তিগর্ভিতম্ ।
তথাপি যুক্তং মদ্বাক্যং ত্রৈবিদ্ধ্যাজ্জ্ঞেয়বস্তুনঃ ॥ ১.৭১॥

সগুণং নির্গুণং তাভ্যাম্ অন্যন্নিষ্প্রতিয়োগিকম্ ।
ব্রহ্মৈবং ত্রিবিধং লিন্গৈর্বেদান্তেষু হি বিশ্রুতম্ ॥ ১.৭২॥

তত্রাদ্যং হেয়গুণকং সোপাধিৎবান্মুমুক্ষুভিঃ ।
তত্ত্বমস্যাদিবাচ্যৎবাজ্জ্ঞেয়ং হেয়তয়াগ্রতঃ ॥ ১.৭৩॥

জীবেশ্বরবিভাগেন সগুণং দ্বিবিধং ভবেৎ ।
জীবশ্চ ত্রিবিধস্তদ্বদ্ ঈশশ্চাস্তাম্ ইদং তথা ॥ ১.৭৪॥

উপাদেয়ং দ্বিতীয়ং স্যান্নির্গুণং মোক্ষকাংক্ষিভিঃ ।
তত্ত্বমস্যাদিলক্ষ্যৎবাজ্জ্ঞেয়ং চাত্মতয়া ততঃ ॥ ১.৭৫॥

হেয়োপাদেয়শূন্যং তত্তৃতীয়ং প্রকৃতং যতঃ ।
মুক্তৈঃ প্রাপ্যম্ অতশ্শব্দমপি জ্ঞেয়ং মুমুক্ষুভিঃ ॥ ১.৭৬॥

ইদন্ত্বেনাপ্যহন্ত্বেন স্বৎবেনাপি নবেদ্যতা ।
তথাপ্যস্যাস্তি বেদ্যৎবং শ্রুত্যুক্তৎবান্ন নাস্তিতা ॥ ১.৭৭॥

মুক্তস্য স্বগতো ভেদো যদনাপ্তৌ ন নশ্যতি ।
তজ্জ্ঞানে ফলমেতৎস্যাৎ সর্বভেদনিবর্হণম্ ॥ ১.৭৮॥

অতোঽস্যালক্ষণৎবেন সদসদ্পরতাস্ত্যপি ।
শশশৃংগসমানৎবং নিদাঘাশক্যমীরিতুম্ ॥ ১.৭৯॥

বিশেষসত্তাঽভাবেপি সত্তাসামান্যতা যতঃ ।
নির্দ্বন্দ্বৎবেন সংসিদ্ধা ততস্সত্ত্বাদিকং ভবেৎ ॥ ১.৮০॥

অথবা শশশৃংগাদি সাদৃশ্যং ভবতু স্বতঃ ।
সিদ্ধান্ততা শ্রুতিপ্রোক্তা নৈরাশ্যস্য হি সুব্রত ॥ ১.৮১॥

ন তাবতা বিরোধোস্তি কশ্চিদপ্যধুনা তব ।
সংসারমোক্ষসিদ্ধ্যর্থম্ অস্যানুক্ততয়া ময়া ॥ ১.৮২॥

॥ ইতি শ্রী গুরুজ্ঞানবাসিষ্ঠে তত্ত্বনারায়ণে
জ্ঞানকাণ্ডস্য প্রথমপাদে তৃতীয়োঽধ্যায়ঃ এবং
শ্রী ঋভুগীতা প্রথমোঽধ্যায়ঃ সমাপ্তঃ ॥

দ্বিতীয়োঽধ্যায়ঃ ।
অথাতস্সম্প্রবক্ষ্যামি নিদাঘ শৃণু সাদরম্ ।
সংসারমোক্ষসিদ্ধ্যর্থং সরূপং ব্রহ্ম নির্গুণম্ ॥ ২.০১ ॥

তত্ত্বমস্যাদিবাক্যৈর্যল্লক্ষ্যং জীবাদিকারণম্ ।
নিত্যশুদ্ধবিবুদ্ধং চ নিত্যমুক্তং চ শাশ্বতম্ ॥ ২.০২ ॥

যৎসর্ববেদসিদ্ধান্তং যজ্জ্ঞানেনৈব মুক্ততা ।
জীবস্য যচ্চ সম্পূর্ণং তত্ত্বমেবাসি নির্মলম্ ॥ ২.০৩ ॥

ৎবমেব পরমাত্মাসি ৎবমেব পরমোগুরুঃ ।
ৎবমেবাকাশরূপোসি সাক্ষিহীনোসি সর্বদা ॥ ২.০৪ ॥

ৎবমেব সর্বভাবোসি ৎবং ব্রহ্মাসি নসংশয়ঃ ।
কালহীনোসি কালোসি সদা ব্রহ্মাসি চিদ্ঘনঃ ॥ ২.০৫ ॥

সর্বতস্সর্বরূপোসি চৈতন্যঘনবানসি ।
সর্বভূতান্তরস্থোসি কর্মাধ্যক্ষোসি নির্গুণঃ ॥ ২.০৬ ॥

সত্যোসি সিদ্ধোসি সনাতনোসি মুক্তোসি মোক্ষোসি মুদাঽমৃতোসি ।
দেবোসি শান্তোসি নিরাময়োসি ব্রহ্মাসি পূর্ণোসি পরাৎপরোসি ॥ ২.০৭ ॥

সমোসি সচ্চসি চিরন্তনোসি সত্যাদিবক্যৈঃ প্রতিবোধিতোসি ।
সর্বাঙ্গহীনোসি সদাস্থিতোসি ব্রহ্মেন্দ্ররুদ্রাদিবিভাবিতোসি ॥ ২.০৮ ॥

সর্বপ্রপংচভ্রমবর্জিতোসি সর্বেষু ভূতেষু চ ভাবিতোসি ।
সর্বত্র সঙ্কল্পবিবর্জিতোসি সর্বাগমান্তার্থবিভাবিতোসি ॥ ২.০৯ ॥

সর্বত্র সন্তোষসুখাসনোসি সর্বত্র গত্যাদিবিবর্জিতোসি ।
সর্বত্র লক্ষ্যাদি বিবর্জিতোসি ধ্যাতোসি বিষ্ণ্বাদিসুরৈরজস্রম্ ॥ ২.১০ ॥

চিদাকার স্বরূপোসি চিন্মাত্রোসি নিরঙ্কুশঃ ।
আত্মন্যেব স্থিতোসি ৎবং সর্বশূন্যোসি নিশ্চলঃ ॥ ২.১১ ॥

আনন্দোসি পরোসি ৎবমেকমেবাদ্বিতীয়কঃ ।
চিদ্ঘনানন্দরূপোসি পরিপূর্ণস্বরূপকঃ ॥ ২.১২ ॥

সদসি ৎবমভিজ্ঞোসি সোসি জানাসি বীক্ষ্যসি ।
সচ্চিদানন্দরূপোসি বাসুদেবোসি বৈ প্রভুঃ ॥ ২.১৩ ॥

অমৃতোসি বিভুশ্চসি চঞ্চলোস্যচলোহ্যসি ।
সর্বোসি সর্বহীনোসি শান্তাশান্তবিবর্জিতঃ ॥ ২.১৪ ॥

সত্তামাত্রপ্রকাশোসি সত্তাসামান্যকোহ্যসি ।
নিত্যসিদ্ধস্বরূপোসি সর্বসিদ্ধিবিবর্জিতঃ ॥ ২.১৫ ॥

ঈষণ্মাত্রবিশূন্যোসি হ্যণুমাত্রবিবর্জিতঃ ।
অস্তিৎববর্জিতোসি ৎবং নাস্তিৎবাদিবিবর্জিতঃ ॥ ২.১৬ ॥

লক্ষ্যলক্ষণহীনোসি নির্বিকারো নিরাময়ঃ ।
সর্বনাদান্তরোসি ৎবং কলাকাষ্ঠাদিবর্জিতঃ ॥ ২.১৭ ॥

ব্রহ্মবিষ্ণ্বীশহীনোসি স্বস্বরূপং প্রপশ্যসি ।
স্বস্বরূপাবশেষোসি স্বানন্দাব্ধৌ নিমজ্জসি ॥ ২.১৮ ॥

স্বাত্মরাজ্যে স্বমেবাসি স্বয়ংভাববিবর্জিতঃ ।
শিষ্টপূর্ণস্বরূপোসি স্বস্মাৎকিঞ্চিন্নপশ্যসি ॥ ২.১৯ ॥

স্বস্বরূপান্নচলসি স্বস্বরূপেণ জৃংভসি ।
স্বস্বরূপাদনন্যোসি হ্যহমেবাসি নিশ্চিনু ॥ ২.২০ ॥

ইদং প্রপঞ্চং যৎকিঞ্চিদ্যদ্যজ্জগতি বিদ্যতে ।
দৃশ্যরূপং চ দৃগ্রূপং সর্বং শশবিষাণবৎ ॥ ২.২১ ॥

লক্ষ্যলক্ষণহীনৎবাদ্যুক্ত্যানিষ্প্রতিয়োগিকম্ ।
ন মন্তব্যং যথায়োগ্যং লৌকিকৈস্ত্বং বিনিশ্চিনু ॥ ২.২২ ॥

নির্গুণং নির্মলং শান্তং ব্রহ্মসপ্রতিয়োগিকম্ ।
শুদ্ধান্তঃকরণজ্ঞেয়ং বেদোক্তং প্রকৃতং খলু ॥ ২.২৩ ॥

আত্মস্ত্বং সচ্চিদানন্দলক্ষ্ণৈর্লক্ষ্যমদ্বয়ম্ ।
ব্রহ্মৈবাস্মি ন দেহোঽয়মিতি চিত্তেঽবধারয় ॥ ২.২৪ ॥

দেহোঽহমিতি সঙ্কল্পস্তদন্তঃকরণং স্মৃতম্ ।
দেহোঽহমিতি সঙ্কল্পো মহান্ সংসার উচ্যতে ॥ ২.২৫ ॥

দেহোঽহমিতি সঙ্কল্পস্তদ্বন্ধ ইতি চোচ্যতে ।
দেহোঽহমিতি সঙ্কল্পস্তদ্দুঃখমিতি চোচয়্তে ॥ ২.২৬ ॥

দেহোঽহমিতি যজ্জ্ঞানং তদেব নরকং স্মৃতম্ ।
দেহোঽহমিতি সঙ্কল্পো জগৎসর্বং সমীর্যতে ॥ ২.২৭ ॥

দেহোঽহমিতি সঙ্কল্পো হৃদয়গ্রন্ধিরীরিতঃ ।
দেহোঽহমিতি যজ্জ্ঞানং তদসজ্জ্ঞানমেবচ ॥ ২.২৮ ॥

দেহোঽহমিতি যদ্বুদ্ধিঃ সা চাবিদ্যেতি ভণ্যতে ।
দেহোঽহমিতি যজ্জ্ঞানং তদেব দ্বৈতমুচ্যতে ॥ ২.২৯ ॥

দেহোঽহমিতি সঙ্কল্পস্সত্যজীবস্স এব চ ।
দেহোঽহমিতি যজ্জ্ঞানং পরিচ্ছিন্নমিতীরিতম্ ॥ ২.৩০ ॥

দেহোঽহমিতি সঙ্কল্পো মহাপাপমিতি স্ফুটম্ ।
দেহোঽহমিতি যা বুদ্ধিস্তৃষ্ণাদোষাঽঽময়ঃ কিল ॥ ২.৩১ ॥

যৎকিঞ্চিদপি সঙ্কল্পস্তাপত্রয়মিতীরিতম্ ।
তচ্চ সর্বং মনুষ্যাণাং মানসং হি নিগদ্যতে ॥ ২.৩২ ॥

কামং ক্রোধং বন্ধনং সর্বদুঃখং বিশ্বং দোষং কালনানাস্বরূপম্ ।
যৎকিঞ্চেদং সর্বসঙ্কল্পজাতং তৎকিঞ্চেদং মানসং সোম্য বিদ্ধি ॥ ২.৩৩ ॥

মন এব জগৎসর্বং মন এব মহারিপুঃ ।
মন এব হি সংসারো মন এব জগত্ত্রয়ম্ ॥ ২.৩৪ ॥

মন এব মহদ্দুঃখং মন এব জরাদিকম্ ।
মন এব হি কালশ্চ মন এব মলং তথা ॥ ২.৩৫ ॥

মন এব হি সঙ্কল্পো মন এব চ জীবকঃ ।
মন এব হি চিত্তং চ মনোঽহঙ্কার এব চ ॥ ২.৩৬ ॥

মন এব মহান্ বন্ধো মনোঽন্তঃকরণং চ তৎ ।
মন এব হি ভূমিশ্চ মন এব হি তজ্জলম্ ॥ ২.৩৭ ॥

মন এব হি তেজশ্চ মন এব মরুন্মহান্ ।
মন এব হি চকাশো মন এব হি শব্দকঃ ॥ ২.৩৮ ॥

স্পর্শরূপরসা গন্ধঃ কোশাঃ পঞ্চ মনোভবাঃ ।
জাগ্রৎস্বপ্নসুষুপ্ত্যাদি মনোময়মিতীরিতম্ ॥ ২.৩৯ ॥

দিক্পালা বসবো রুদ্রা আদিত্যাশ্চ মনোময়াঃ ।
দৃশ্যং বন্ধং দ্বন্দ্বজাতমজ্ঞানং মানসং স্মৃতম্ ॥ ২.৪০ ॥

সঙ্কল্পমেব যৎকিঞ্চিত্তত্তন্নাস্তীতি নিশ্চিনু ।
নাস্তি নাস্তি জগৎসর্বং গুরুশিষ্যাদিকং নিহি ॥ ২.৪১ ॥

ব্যবহারদশায়াং হি গুরুশিষ্যাদিকং ভবেৎ ।
পরমার্থদশায়াং তৎ কথং মুক্তৌ প্রসিদ্ধ্যতি ॥ ২.৪২ ॥

মুক্ত্যতীত দশায়াং চ প্রোচ্যতে পরমার্থতা ।
তথাপ্যসত্যহংতৃৎবান্মুক্তেরেবাস্তি মুখ্যযাঃ ॥ ২.৪৩ ॥

মনসা কল্পিতং সর্বং মনসা পরিপালিতম্ ।
মনসা সংস্মৃতং তস্মান্মন এবাস্তি কারণম্ ॥ ২.৪৪ ॥

মনসা সংস্মৃতং সর্বং মনসৈব চ বিস্মৃতম্ ।
মনসা ভাবিতং সর্বং মনসৈব হ্যভাবিতং ॥ ২.৪৫ ॥

মনসা দূষিতং সর্বং মনসৈব চ ভূষিতম্ ।
মনসা সুখবৃত্তিস্স্যান্মনসা দুঃখসঞ্চয়ঃ ॥ ২.৪৬ ॥

তস্মাৎসর্বনিদানং তন্মনস্সূক্ষ্মং পরাত্মনি ।
ৎবয়ি সচ্চিৎসুখাংবোধৌ কল্পিতং বিদ্ধি মায়যা ॥ ২.৪৭ ॥

ৎবদন্যস্য চ সর্বস্য কল্পিতৎবাদবোধতঃ ।
ৎবমেব সর্বসাক্ষী সন্ স্বয়ং ভাসি নিরন্তরম্ ॥ ২.৪৮ ॥

তব বোধস্বরূপৎবাৎ ৎবয়্যবোধস্য কা গতিঃ ।
মন্দবুদ্ধ্যা গতৌ সত্যামপি নাশস্স্বয়ং ভবেৎ ॥ ২.৪৯ ॥

নিত্যবোধস্বরূপস্ত্বং হ্যবোধপ্রতিয়োগিকঃ ।
ৎবয়ি তৎসন্নিবর্তেত তমস্সূর্যোদয়ে যথা ॥ ২.৫০ ॥

জ্ঞাতৃজ্ঞানেপ্রকল্প্যেতে যত্র জ্ঞেয়েঽদ্বয়ে ৎবয়ি ।
তস্যাখণ্ডস্বরূপৎবাৎ সর্বাধিষ্ঠানতোচিতা ॥ ২.৫১ ॥

মুমুক্ষুভিশ্চ বিজ্ঞেয়াস্স্বধর্মাস্সচ্চিদাদয়ঃ ।
সন্ময়শ্চিন্ময়শ্চত্মা তথানন্দময়ো যতঃ ॥ ২.৫২ ॥

চিদ্রূপস্য তবাত্মৎবাদনাত্মানস্ত্বচিন্ময়াঃ ।
অনাত্মনাং বিকারিৎবান্নির্বিকারস্ত্বমিষ্যসে ॥ ২.৫৩ ॥

বিকারস্য সমস্তস্যাপ্যবিদ্যাকল্পিতৎবতঃ ।
বিলয়ে নির্বিকারস্ত্বং বিদ্যাবানবশিষ্যসে ॥ ২.৫৪ ॥

বৃহদ্ ব্রহ্মাবশেষো হি নাশঃ কল্পিতবস্তুনঃ ।
যচ্ছেষাস্স্যুরিমে সর্বে স শেষী নিত্যতাং ব্রজেৎ ॥ ২.৫৫ ॥

শেষস্য শেষ্যনন্যৎবং বাস্তবং সর্বসম্মতম্ ।
শেষিণস্তু তবান্যৎবান্ন শেষস্যাস্তি নিত্যতা ॥ ২.৫৬ ॥

শেষিণশ্শেষসাপেক্ষ্যান্ন স্বাতন্ত্র্যেণ শেষিতা ।
ইতি বক্তুং ন শক্যং হি স্বমহিম্নি স্থিতৎবতঃ ॥ ২.৫৭ ॥

স্বস্যৈষ মহিমা সর্বব্যাপকৎবাদিলক্ষণঃ ।
সর্বশৃত্যাদি সংসিদ্ধঃ কাভীর্হীয়েত যুক্তিভিঃ ॥ ২.৫৮ ॥

ব্যাপ্যসাপেক্ষতা তস্য ব্যাপকস্যেতিচেচ্ছৃণু ।
ব্যাপ্যানপেক্ষং সিদ্ধির্হি ব্যাপকস্য নিজাশ্রয়াৎ ॥ ২.৫৯ ॥

ব্যাপ্যস্যৈব হি জীবস্য বিকারাপেক্ষয়া তথা ।
ব্যাপকাপেক্ষয়া চ স্যাৎ স্থিতির্ন ব্যাপকস্যতু ॥ ২.৬০ ॥

বিকারালংবনাভাবাৎস্বালংবনতয়াপি চ ।
সর্বালংবনতা সিদ্ধা ন স্বহানেশ্চ সঙ্গতিঃ ॥ ২.৬১ ॥

সর্বাধারস্য নাধারোঽপেক্ষ্যতেপি ক্বচিদ্বিভোঃ ।
স চেদাধারসাপেক্ষো ন সর্বাধারতাং ব্রজেৎ ॥ ২.৬২ ॥

সর্বাধারস্য চ ব্যোম্নো যথাত্মাধার ইষ্যতে ।
তথাত্মনোপি কশ্চিৎস্যাদিতি চেদ্বাঢমুচ্যতে ॥ ২.৬৩ ॥

আত্মৈবাত্মন আধার আত্মন্যেবাত্মনস্স্থিতেঃ ।
অনাত্মনো যথাঽনাত্মা কশ্চিদেবাস্তি চশ্রয়ঃ ॥ ২.৬৪ ॥

আত্মনোঽপি তু নানাৎবে স্যাদনাত্মাবিশেষতা ।
ইতি চেন্নৈষ ভেদো হি বিকারাবাশ্রয়ো ভবেৎ ॥ ২.৬৫ ॥

যথা ভবতি দেহস্য প্রাণ এবাশ্রয়ঃ পুনঃ ।
প্রাণস্য চশ্রয়ো দেহস্তথাত্মাঽনাত্মনোরপি ॥ ২.৬৬ ॥

অন্যোন্যাশ্রয়তা প্রাপ্তা তথা নাশো দ্বয়োরপি ।
ইতি চেদুক্তমেবৈতদাত্মা হি স্বাশ্রয়ো মতঃ ॥ ২.৬৭ ॥

আশ্রয়াশ্রয়ি বার্তা চ ব্যবহারে নিগদ্যতে ।
পরমার্থদশায়াং তু স্বস্মাদন্যন্নবিদ্যতে ॥ ২.৬৮ ॥

আত্মনস্স্বগতো ভেদো যোস্মিন্নভ্যুপগম্যতে ।
স কিং নিত্যোস্ত্যনিত্যোবেত্যেবং প্রশ্নে তু কথ্যতে ॥ ২.৬৯ ॥

লব্ধাত্মসম্যগ্বোধস্য তব যাবদিহস্থিতিঃ ।
তাবত্তস্যাবিনাশিৎবান্নিত্য এবেতি নির্ণয়ঃ ॥ ২.৭০ ॥

পশ্চদনিত্যতায়াশ্চ তব প্রষ্টুরভাবতঃ ।
স্বভেদানিত্যবার্তায়া নাবকাশোঽত্র বিদ্যতে ॥ ২.৭১ ॥

আত্মা স কিং ভবেদ্দ্রষ্টা দৃশ্যো বা কিন্নু দর্শনম্ ।
দ্রষ্টৃৎবে সতি জীবৎবাৎসংসারিৎবং প্রসজ্যতে ॥ ২.৭২ ॥

দৃশ্যৎবে তু ঘটাদীনামিবস্যাদ্বিষয়াত্মতা ।
দর্শনৎবে তু বৃত্তিৎবাজ্জাড্যমেব প্রসজ্যতে ॥ ২.৭৩ ॥

অসংসারী পরাত্মাঽসৌ স্বয়ং নির্বিষয়স্তথা ।
চৈতন্যরূপ ইত্যেতদ্ব্যর্থমেবেতি চেচ্ছৃণু ॥ ২.৭৪ ॥

দ্রষ্টৃৎবং তস্য বিদ্ধ্যেবং জীবেশাদীক্ষিতৃৎবতঃ ।
দৃশ্যৎবং চ তথা বিদ্ধি মুক্তৈর্দ্রষ্টৃৎবতস্স্বতঃ ॥ ২.৭৫ ॥

দর্শনৎবং চ সাক্ষিৎবাদ্দৃগ্রূপৎবাচ্চ তস্য বৈ ।
সংসারিৎবাদয়ো দোষাঃ প্রসজ্যন্তে ন তত্র বৈ ॥ ২.৭৬ ॥

অসংসারিণমাত্মানং সংসার্যাত্মা যদি স্বয়ং ।
পশ্যেত্তদাক্ষিরোগী সম্প্রপশ্যেচ্চ নিরঙ্কুশম্ ॥ ২.৭৭ ॥

অসম্ভবানি সর্বাণি সংভবেয়ুশ্চ বৈদিকাঃ ।
সিদ্ধান্তানিয়মাপেতাস্স্বেচ্ছাব্যাহার সংভবাৎ ॥ ২.৭৮ ॥

ইতি চেন্নৈব দোষোঽস্তি সংসারস্যাপবাদতঃ ।
বিশুদ্ধসৎবসম্পন্নস্সংসারী নির্মলো হি সঃ ॥ ২.৭৯ ॥

যদি জীবস্য সংসারস্স্বতস্সিদ্ধস্তথাঽখিলাঃ ।
উক্ত দোষাঃ প্রসজ্যেরন্নজ্ঞানাদ্ধ্যাগতো ন তে ॥ ২.৮০ ॥

জীবস্য যদি সংসারো ব্রহ্মণস্তদভাবতঃ ।
ব্রহ্মাত্মৎবোপদেশোঽয়ময়ুক্ত ইতি চেচ্ছৃণু ॥ ২.৮১ ॥

উক্তজীবৈকদেশস্য হ্যসংসারিৎবমন্বহম্ ।
ততস্তত্ত্বোপদেশেস্মিন্ নিদাঘাস্ত্যনবদ্যতা ॥ ২.৮২ ॥

তস্মাৎসর্বগতং সত্যসুখবোধৈকলক্ষণম্ ।
ব্রহ্মাস্মীতি বিজানীহি কেবলং ৎবমসংশয়ম্ ॥ ২.৮৩ ॥

মুক্ত্যৈ জ্ঞেয়ং চ তদ্ ব্রহ্ম সচ্চিদানন্দলক্ষণম্ ।
নৎবলক্ষণমন্যৎস্যাদিতি চোক্তং ন বিস্মর ॥ ২.৮৪ ॥

॥ ইতি শ্রী গুরুজ্ঞানবাসিষ্ঠে তত্ত্বনারায়ণে
জ্ঞানকাণ্ডস্য প্রথমপাদে চতুর্থোঽধ্যায়ঃ এবং
শ্রী ঋভুগীতা দ্বিতীয়োঽধ্যায়ঃ সমাপ্তঃ ॥

তৃতীয়োঽধ্যায়ঃ ।
পুনর্জ্ঞানং প্রবক্ষ্যামি নিদাঘ শৃণু সাদরম্ ।
ব্রহ্মণোঽতি দুরূহৎবাদসকৃচ্ছ্রাব্যমেব তৎ ॥ ৩.০১ ॥

সর্বং চিন্ময়ং বিদ্ধি সর্বং সচ্চিন্ময়ং ততম্ ।
সচ্চিদানন্দমদ্বৈতং সচ্চিদানন্দমব্যযম্ ॥ ৩.০২ ॥

সচ্চিদানন্দমাত্রং হি সচ্চিদানন্দমন্যকম্ ।
সচ্চিদানন্দরূপোঽহং সচ্চিদানন্দমেব খম্ ॥ ৩.০৩ ॥

সচ্চিদানন্দমেব ৎবং সচ্চিদানন্দকোঽস্ম্যহম্ ।
মনোবুদ্ধিরহঙ্কারচিত্তসঙ্ঘাতকা অমী ॥ ৩.০৪ ॥

ন ৎবং নাহং নচন্যদ্বা সর্বং ব্রহ্মৈব কেবলম্ ।
ন বাক্যং ন পদং বেদং নাক্ষরং ন জডং ক্বচিৎ ॥ ৩.০৫ ॥

ন মধ্যং নাদি নান্তং বা ন সত্যং ন নিবন্ধনম্ ।
ন দুঃখং ন সুখং ভাবং ন মায়া প্রকৃতিস্তথা ॥ ৩.০৬ ॥

ন দেহং ন মুখং ঘ্রাণং ন জিহ্বা ন চ তালুনী ।
ন দন্তোষ্ঠৌ ললাটং চ নিশ্বাসোচ্ছ্বাস এব চ ॥ ৩.০৭ ॥

ন স্বেদমস্থিমাসং চ ন রক্তং ন চ মূত্রকম্ ।
ন দূরং নান্তিকং নাহং নোদরং ন কিরীটকম্ ॥ ৩.০৮ ॥

ন হস্তপাদচলনং ন শাস্ত্রং ন চ শাসনম্ ।
ন বেত্তা বেদনং বেদ্যং ন জাগ্রৎস্বপ্নসুপ্তয়ঃ ॥ ৩.০৯ ॥

তুর্যাতীতং ন মে কিঞ্চিৎসর্বং সচ্চিন্ময়ং ততম্ ।
নাধ্যাত্মিকং নাধিভূতং নাধিদৈবং ন মায়িকম্ ॥ ৩.১০ ॥

ন বিশ্বস্তৈজসঃ প্রাজ্ঞঃ বিরাট্সূত্রাত্মকেশ্বরাঃ ।
ন গমাগমচেষ্টা চ ন নষ্ষ্টং ন প্রয়োজনম্ ॥ ৩.১১ ॥

ত্যাজ্যং গ্রাহ্যং ন দূষ্যং বা হ্যমেধ্যং মেধ্যকং তথা ।
ন পীনং ন কৃশং ক্লেদং ন কালং দেশভাষণম্ ॥ ৩.১২ ॥

ন সর্বং ন ভয়ং চৈতন্ন বৃক্ষতৃণপর্বতাঃ ।
ন ধ্যানং যোগসংসিদ্ধির্নব্রহ্মক্ষত্রবৈশ্যকম্ ॥ ৩.১৩ ॥

ন পক্ষী ন মৃগো নাগী ন লোভো মোহ এব চ ।
ন মদো ন চ মাৎসর্যং কামক্রোধাদয়স্তথা ॥ ৩.১৪ ॥

ন স্ত্রীশূদ্রবিডালাদি ভক্ষ্যভোজ্যাদিকং চ যৎ ।
ন প্রৌঢহীননাস্তিক্যং ন বার্তাবসরোস্তি হি ॥ ৩.১৫ ॥

ন লৌকিকো ন লোকোবা ন ব্যাপারো ন মূঢতা ।
ন ভোক্তা ভোজনং ভোজ্যং মাতৃমানং ন মেয়কম্ ॥ ৩.১৬॥

ন শত্রুমিত্রপুত্রাদি ন মাতা ন পিতা স্বসা।
ন জন্ম ন মৃতির্বৃদ্ধির্ন দেহোঽহমিতি ভ্রমঃ ॥ ৩.১৭ ॥

ন শূন্যং নাপি চশূন্যং নান্তঃকরণসংস্মৃতিঃ ।
ন রাত্রির্নদিবা নক্তং ন ব্রহ্মা ন হরিশ্শিবঃ ॥ ৩.১৮ ॥

ন বারপক্ষমাসাদি বৎসরং ন চ চঞ্চলম্ ।
ন ব্রহ্মলোকো বৈকুণ্ঠো ন কৈলাসো ন চন্যকঃ ॥ ৩.১৯ ॥

ন স্বর্গো ন চ দেবেন্দ্রো নাগ্নিলোকো ন চগ্নিকঃ ।
ন যমো ন যমলোকো বা ন লোকা লোকপালকাঃ ॥ ৩.২০ ॥

ন ভূর্ভুবস্স্বস্ত্রৈলোক্যং ন পাতাল়ং ন ভূতলং ।
নাবিদ্যা ন চ বিদ্যা চ ন মায়া প্রকৃতির্ন চ ॥ ৩.২১ ॥

ন স্থিরং ক্ষণিকং নাশো ন গতির্ন চ ধাবনম্ ।
ন ধ্যাতব্যং ন মে স্নানং ন মন্ত্রো ন জপঃ ক্বচিৎ ॥ ৩.২২ ॥

ন পদার্থং ন পূজার্হং নাভিষেকং ন চর্চনং ।
ন পুষ্পং ন ফলং পত্রং গন্ধপুষ্পাদিধূপকম্ ॥ ৩.২৩ ॥

ন স্তোত্রং ন নমস্কারো ন প্রদক্ষিণমণ্বপি ।
ন প্রার্থনা পৃথগ্ভাবো ন হবির্নাস্তি বন্দনম্ ॥ ৩.২৪ ॥

ন হোমো ন চ কর্মাণি ন দুর্বাক্যং সুভাষণম্ ।
ন গায়ত্রী ন বা সন্ধির্ন মনস্যং ন দুঃস্থিতিঃ ॥ ৩.২৫ ॥

ন দুরাশা ন দুষ্টাত্মা ন চণ্ডালো ন পৌল্কসঃ ।
ন দুস্সহং দুরালাপং ন কিরাতো ন কৈতবম্ ॥ ৩.২৬ ॥

ন পক্ষপাতং পক্ষং বা ন বিভূষণতস্করৌ ।
ন চ ডংভো ডাংভিকো বা ন হীনো নাধিকো নরঃ ॥ ৩.২৭ ॥

নৈকং দ্বয়ং ত্রয়ং তুর্যং ন মহৎবং ন চল্পতা ।
ন পূর্ণং ন পরিচ্ছিন্নং ন কাশী ন ব্রতং তপঃ ॥ ৩.২৮ ॥

ন গোত্রং ন কুলং সূত্রং ন বিভুৎবং ন শূন্যতা ।
ন স্ত্রীর্ন যোষিন্নো বৃদ্ধা ন কন্যা ন বিতন্তুকা ॥ ৩.২৯ ॥

ন সূতকং ন জাতং বা নান্তর্মুখসুবিভ্রমঃ ।
ন মহাবাক্যমৈক্যং বা নাণিমাদিবিভূতয়ঃ ॥ ৩.৩০ ॥

এবং সলক্ষণং ব্রহ্ম ব্যতিরেকমুখেন বৈ ।
নিদাঘ ৎবং বিজানীহি ব্রহ্মেতরনিষেধতঃ ॥ ৩.৩১ ॥

ব্রহ্মণঃ প্রকৃতস্যাত্র দ্বিবিধং প্রতিপাদনং ।
অসন্নিষেধরূপং সদ্বিধিরূপং চ তত্র তু ॥ ৩.৩২ ॥

আত্মা নিষেধরূপেণ তুভ্যং সম্প্রতিপাদিতঃ ।
অথাদ্য বিধিরূপেণ শৃণু সম্প্রতিপাদ্যতে ॥ ৩.৩৩ ॥

সর্বং চৈতন্যমাত্রৎবাৎসর্বদোষস্সদানহি ।
সর্বং সন্মাত্ররূপৎবাৎসচ্চিদানন্দরূপকম্ ॥ ৩.৩৪ ॥

ব্রহ্মৈব সর্বং নান্যোঽস্মি তদহং তদহং তথা ।
তদেবাহং তদেবাহং ব্রহ্মৈবাহং সনাতনম্ ॥ ৩.৩৫ ॥

ব্রহ্মৈবাহং ন সংসারী ব্রহ্মৈবাহং ন মে মনঃ ।
ব্রহ্মৈবাহং ন মে সিদ্ধির্ব্রহ্মৈবাহং ন চেন্দ্রিয়ম্ ॥ ৩.৩৬ ॥

ব্রহ্মৈবাহং ন দেহোঽহং ব্রহ্মৈবাহং ন গোচরঃ ।
ব্রহ্মৈবাহং ন জীবোঽহং ব্রহ্মৈবাহং ন ভেদ ভূঃ ॥ ৩.৩৭ ॥

ব্রহ্মৈবাহং জডো নাহমহং ব্রহ্ম ন মে মৃতিঃ ।
ব্রহ্মৈবাহং ন চ প্রাণো ব্রহ্মৈবাহং পরাৎপরম্ ॥ ৩.৩৮ ॥

ইদং ব্রহ্ম পরং ব্রহ্ম সত্যং ব্রহ্ম প্রভুর্হি সঃ ।
কালো ব্রহ্ম কলা ব্রহ্ম সুখং ব্রহ্ম স্বয়ংপ্রভম্ ॥ ৩.৩৯ ॥

একং ব্রহ্ম দ্বয়ং ব্রহ্ম মোহো ব্রহ্ম শমাদিকম্ ।
দোষো ব্রহ্ম গুণো ব্রহ্ম দিশশ্শান্তর্বিভুঃ প্রভুঃ ॥ ৩.৪০ ॥

লোকা ব্রহ্ম গুরুর্ব্রহ্ম শিষ্যো ব্রহ্ম সদাশিবঃ ।
পূর্বং ব্রহ্ম পরং ব্রহ্ম শুদ্ধং ব্রহ্ম শুভাশুভম্ ॥ ৩.৪১ ॥

জীব এব সদা ব্রহ্ম সচ্চিদানন্দমস্ম্যহম্ ।
সর্বং ব্রহ্মময়ং প্রোক্তং সর্বং ব্রহ্মময়ং জগৎ ॥ ৩.৪২ ॥

স্বয়ং ব্রহ্ম ন সন্দেহঃ স্বস্মাদন্যন্ন কিঞ্চন ।
সর্বমাত্মৈব শুদ্ধাত্মা সর্বং চিন্মাত্রমব্যযম্ ॥ ৩.৪৩ ॥

নিত্যনির্মলরূপাত্মা হ্যাত্মনোন্যন্ন কিঞ্চন ।
অণুমাত্রলসদ্রূপমণুমাত্রমিদং জগৎ ॥ ৩.৪৪ ॥

অণুমাত্রং শরীরং বা হ্যণুমাত্রমসত্যকম্ ।
অণুমাত্রং মনশ্চিত্তমণুমত্রাপ্যহঙ্কৃতিঃ ॥ ৩.৪৫ ॥

অণুমাত্রা চ বুদ্ধিশ্চ হ্যণুমাত্রোঽপি জীবকম্ ।
অণুমাত্রমিদং চিত্তং সর্বমপ্যণুমাত্রকম্ ॥ ৩.৪৬ ॥

ব্রহ্মৈব সর্বং চিন্মাত্রং ব্রহ্মমাত্রং জগত্ত্রয়ম্ ।
আনন্দং পরমানন্দমন্যৎকিঞ্চিন্নকিঞ্চন ॥ ৩.৪৭ ॥

চৈতন্যমাত্রমোঙ্কারং ব্রহ্মৈব ভবতি স্বয়ম্ ।
অহমেব জগৎসর্বমহমেব পরংপদম্ ॥ ৩.৪৮ ॥

অহমেব গুণাতীতোস্ম্যহমেব পরাৎপরঃ ।
অহমেব পরংব্রহ্ম হ্যহমেব গুরোর্গুরুঃ ॥ ৩.৪৯ ॥

অহমেবাখিলাধারোস্ম্যহমেব সুখাৎসুখম্ ।
আত্মনোন্যজ্জগন্নাস্তি হ্যাত্মনোন্যৎসুখং ন চ ॥ ৩.৫০ ॥

আত্মনোন্যা গতির্নাস্তি সর্বমাত্মময়ং জগৎ ।
আত্মনোন্যন্নহি ক্বাপি আতমনোন্যত্তৃণং ন হি ॥ ৩.৫১ ॥

আত্মনোন্যত্তুষং নাস্তি সর্বমাত্মময়ং জগৎ ।
ব্রহ্মমাত্রমিদং সর্বং ব্রহ্মমাত্রমসন্ন হি ॥ ৩.৫২ ॥

ব্রহ্মমাত্রমিদং সর্বং স্বয়ং ব্রহ্মৈব কেবলম্ ।
ব্রহ্মমাত্রং ব্রতং সর্বং ব্রহ্মমাত্রং রসং সুখম্ ॥ ৩.৫৩ ॥

ব্রহ্মমাত্রং চিদাকাশং সচ্চিদানন্দমদ্বয়ংম্ ।
ব্রহ্মণোন্যতরং নাস্তি ব্রহ্মণোন্যন্ন কিঞ্চন ॥ ৩.৫৪ ॥

ব্রহ্মণোন্যদহং নাস্তি ব্রহ্মণোন্যৎফলং নহি ।
ব্রহ্মণোন্যৎপদং নাস্তি ব্রহ্মণোন্যৎপদং নহি ॥ ৩.৫৫ ॥

ব্রহ্মণোন্যদ্গুরুর্নাস্তি ব্রহ্মণোন্যদসদ্বপুঃ ।
ব্রহ্মণোন্যন্নচহন্তা ৎবত্তেদং তেন হি ক্বচিৎ ॥ ৩.৫৬ ॥

স্বয়ং ব্রহ্মাত্মকং বিদ্ধি স্বস্মাদন্যন্নকিঞ্চন ।
যৎকিঞ্চিদ্দৃশ্যতে লোকে যৎকিঞ্চিদ্ভাষ্যতে জনৈঃ ॥ ৩.৫৭ ॥

যৎকিঞ্চিৎক্রিয়তে নিত্যং যৎকিঞ্চিদ্গম্যতে জনৈঃ ।
যৎকিঞ্চিদ্ভুজ্যতে ক্বাপি তৎসর্বমসদেব হি ॥ ৩.৫৮ ॥

কর্তৃভেদং ক্রিয়াভেদং গুণভেদং রসাদিকম্ ।
লিঙ্গভেদমিদং সর্বমসদেব সদা সুখম্ ॥ ৩.৫৯ ॥

কালভেদং দেশভেদং বস্তুভেদং জয়াজয়ম্ ।
যদ্যদ্ভেদং চ তৎসর্বমসদেবহি কেবলম্ ॥ ৩.৬০ ॥

অসদন্তঃকরণমসদেবেন্দ্রিয়াদিকম্ ।
অসৎপ্রাণাদিকং সর্বং সঙ্ঘাতমসদাত্মকম্ ॥ ৩.৬১ ॥

অসত্যং পঞ্চকোশাখ্যমসত্যাঃ পঞ্চদেবতাঃ ।
অসত্যং ষড্বিকারাদি হ্যসত্যমরিবর্গকম্ ॥৩.৬২ ॥

অসত্যষ্ষদৃতুশ্চৈব হ্যসত্যষ্ষড্রসস্সদা ।
সপ্তর্ষয়োপ্যসত্যাস্তেপ্যসত্যাস্সপ্তসাগরাঃ ॥ ৩.৬৩ ॥

সচ্চিদানন্দমাত্রোহমনুৎপন্নমিদং জগৎ ।
আত্মৈবাহং পরংসত্যো নান্যাস্সংসারদৃষ্টয়ঃ ॥ ৩.৬৪ ॥

সত্যমানন্দরূপোহং চিদ্ঘনানন্দবিগ্রহঃ ।
অহমেব পরানন্দোঽস্ম্যহমেব পরাৎপরঃ ॥ ৩.৬৫ ॥

জ্ঞানাকারমিদং সর্বং জ্ঞানানন্দোহমদ্বয়ঃ ।
জ্ঞানপ্রকাশরূপোহং জ্ঞানানন্দৈকবিগ্রহঃ ॥ ৩.৬৬ ॥

যেন জ্ঞাতমিদং জ্ঞানমজ্ঞানধ্বান্তনাশকঃ ।
জ্ঞানেনাজ্ঞাননাশেন স হি জ্ঞানী সমীর্যতে ॥৩.৬৭ ॥

জ্ঞানং যথা দ্বিধা প্রোক্তং স্বরূপং বৃত্তিরিত্যপি ।
অজ্ঞানং চ তথা বিদ্ধি মূলং চ প্রতিবন্ধ্কম্ ॥ ৩.৬৮ ॥

যথা জ্ঞানং বিনা লোকে কিঞ্চিদেব ন সিদ্ধ্যতি ।
তথা জ্ঞানং বিনা লোকে ক্বচিন্মুক্তির্ন সিদ্ধ্যতি ॥ ৩.৬৯ ॥

জ্ঞানদ্বয়ং তথাঽজ্ঞানদ্বয়মপ্যত্রবর্ষ্মণি ।
সর্বদা ভান্তি জীবানং জ্ঞানাজ্ঞানোক্তিদর্শনাৎ ॥ ৩.৭০ ॥

জ্ঞানস্য ক্ব তিরোভাবো জ্ঞানস্যাবির্ভবস্তথা ।
দৃষ্টস্সর্বত্র লোকেস্মিন্ দুর্লভোহি বিপর্যযঃ ॥ ৩.৭১ ॥

জ্ঞানং সর্বান্তরং ভাতি কূটস্থাত্মস্বরূপকম্ ।
প্রজ্ঞামাত্রমিদং সূক্ষ্মং কোঽপি জানাতি পুণ্যকৃৎ ॥ ৩.৭২ ॥

প্রজ্ঞায়াং কল্পিতাং প্রজ্ঞাং প্রজ্ঞয়ৈব বিহায় যঃ ।
প্রজ্ঞামাত্রেণ সন্তিষ্টেৎ স প্রজ্ঞাবানিতীর্যতে ॥ ৩.৭৩ ॥

বহিঃ প্রজ্ঞাং সদোৎসৃজ্যাপ্যন্তঃ প্রজ্ঞাং চ যো বুধঃ ।
কয়াপি প্রজ্ঞয়োপেতঃ প্রজ্ঞাবানিতি কথ্যতে ॥ ৩.৭৪ ॥

প্রজ্ঞৈব যস্য নেত্রং স্যৎ প্রজ্ঞৈব শ্রোত্রমিন্দ্রিয়ম্ ।
অন্যচ্চ সর্বং প্রজ্ঞৈব স প্রাজ্ঞঃ পুরুষোত্তমঃ ॥ ৩.৭৫ ॥

প্রজ্ঞয়া জায়তে সর্বং প্রজ্ঞয়া পাল্যতেঽখিলম্ ।
প্রজ্ঞয়া ক্ষীয়তে সর্বং তস্মাৎপ্রজ্ঞাং সমাশ্রয় ॥ ৩.৭৬ ॥

প্রজ্ঞাহীনমসৎসর্বং প্রজ্ঞাহীনং জডং খলু ।
প্রজ্ঞাহীনং সদা দুঃখং তস্মাৎপ্রজ্ঞাং সমাশ্রয় ॥ ৩.৭৭ ॥

ন বিনা প্রজ্ঞয়া পুণ্যং ন লোকঃ প্রজ্ঞয়া বিনা ।
বিনা ন প্রজ্ঞয়াঽভীষ্টং তস্মাৎপ্রজ্ঞাং সমাশ্রয় ॥ ৩.৭৮ ॥

সুসূক্ষ্ময়া ধিয়া প্রজ্ঞামিমাং তাং জ্ঞপ্তিসঞ্জ্ঞিকাম্ ।
জ্ঞাৎবা ভবভবান্মুক্তো নির্গুণব্রহ্মরূপিণীম্ ॥ ৩.৭৯ ॥

জাগ্রদাদ্যাস্ববস্থাসু যা জ্ঞপ্তিস্ত্রিসৃষু স্বয়ম্ ।
আভাসতোপ্যনুস্যূতা জ্ঞপ্তিস্সা নির্মলা স্বতঃ ॥ ৩.৮০ ॥

জ্ঞপ্তিস্সা সাক্ষিণী নিত্যা তুর্যা সর্বশ্রুতীরিতা ।
বিষয়জ্ঞপ্তিসন্ত্যাগাৎ জ্ঞায়তে বিবুধৈস্স্বতঃ ॥ ৩.৮১ ॥

জ্ঞপ্তিরেব পরংব্রহ্ম জ্ঞপ্তিরেব পরং পদম্ ।
জ্ঞপ্তিরেব পরো মোক্ষো জ্ঞপ্তিরেব পরং সুখম্ ॥ ৩.৮২ ॥

জ্ঞপ্তিরেব পরাচার্যো জ্ঞপ্তিরেব পরামৃতম্ ।
জ্ঞপ্তিরেব পরাতৃপ্তির্জ্ঞপ্তিরেব পরাগতিঃ ॥ ৩.৮৩ ॥

তস্মাৎজ্ঞপ্তিং সমাশ্রিত্য বিজ্ঞপ্তিধিষণাং ত্যজ ।
অজ্ঞপ্তের্দুঃখহেতুৎবাৎসুখার্থীজ্ঞপ্তিমাশ্রয় ॥ ৩.৮৪ ॥

অজ্ঞপ্তি বোষয়ো জীবঃ কূটস্থো জ্ঞপ্তি গোচরঃ ।
হেয়োপাদেয়তা সিদ্ধা ধর্মধর্মিৎবতস্তয়োঃ ॥ ৩.৮৫ ॥

অহংপ্রত্যযশব্দাভ্যাং বিজ্ঞেয়ো জীবসঞ্জ্ঞকঃ ।
অস্মৎপ্রত্যযশব্দাভ্যাং জ্ঞেয়ো কূটস্থসঞ্জ্ঞকঃ ॥ ৩.৮৬ ॥

যদহং প্রত্যযী জীবস্তদ্যুষ্মৎপ্রত্যযী চ সঃ ।
ৎবমহং শব্দয়োরৈক্যাত্তৎসাক্ষী প্রত্যগাহ্বয়ঃ ॥ ৩.৮৭ ॥

অস্মৎপ্রত্যযিনং সাক্ষিচৈতন্যাত্মকমদ্বয়ম্ ।
কূটস্থং প্রত্যগাত্মানং সাক্ষাদ্বিষয়িণং পরম্ ॥ ৩.৮৮ ॥

জহি জ্ঞাৎবা তদন্যং ৎবমহংপ্রত্যযিনং বহিঃ ।
সাক্ষ্যং জীবং চিদাভাসং পরাঞ্চং বিষয়ং স্বতঃ ॥ ৩.৮৯ ॥

দৃগ্দৃশ্যভূতয়োরত্র জীবাত্মপ্রত্যগাত্মনোঃ ।
বিবেকেন পরং সৌখ্যং নিদাঘ ব্রজ সন্ততম্ ॥ ৩.৯০ ॥

॥ ইতি শ্রী গুরুজ্ঞানবাসিষ্ঠে তত্ত্বনারায়ণে
জ্ঞানকাণ্ডস্য প্রথমপাদে পঞ্চমোঽধ্যায়ঃ এবং
শ্রী ঋভুগীতা তৃতীয়োঽধ্যায়ঃ সমাপ্তঃ ॥

চতুর্থোঽধ্যায়ঃ ।
পুনর্জ্ঞানং প্রবক্ষ্যামি জাগ্রদাদি বিলক্ষণম্ ।
তুরীয়ব্রহ্মরূপং তদ্যদ্জ্ঞাৎবা মোক্ষ্যসেঽশুভাৎ ॥ ৪.০১ ॥

ঊর্ণনাভির্যথাতন্তূন্ সৃজতে সংহরত্যপি ।
জাগ্রৎস্বপ্নে তথা জীবো গচ্ছত্যাগচ্ছতে পুনঃ ॥ ৪.০২ ॥

নেত্রে জাগরিতং বিদ্যাৎকণ্ঠে স্বপ্নং সমাবিশেৎ ।
সুষুপ্তং হৃদয়স্থং তু তুরীয়ং মূর্ধ্নি সংস্থিতম্ ॥ ৪.০৩ ॥

যতো বচো নিবর্তন্তে অপ্রাপ্য মনসা সহ ।
আনন্দমেতজ্জীবস্য যজ্জ্ঞাৎবা মুচ্যতে বুধঃ ॥ ৪.০৪ ॥

সর্বব্যাপিনমাত্মানং ক্ষীরেসর্পিরিবার্পিতম্ ।
আত্মবিদ্যা তপোমূলং তদ্ ব্রহ্মোপনিষৎপদং ॥ ৪.০৫ ॥

শ্রী গুরুমূর্তিঃ ।
ঋভুণোক্তমিদং শ্রুৎবা নিদাঘস্সংশয়াকুলঃ ।
পপ্রচ্ছ সদ্গুরুং শান্তং সাবধানেন চেতসা ॥ ৪.০৬ ॥

নিদাঘঃ ।
ভগবন্ ভবতা পূর্বং যতোবাচ ইতি শ্রুতেঃ ।
আনন্দো ব্রহ্মণঃ প্রোক্তো জীবস্যৎবধুনোচ্যতে ॥ ৪.০৭ ॥

আনন্দময়সংজ্ঞস্য জীবস্যোক্তশ্চ যদ্যপি ।
শ্রুতৌ তথাপি হেয়ৎবান্নতদীয়ো ভবেদ্ধি সঃ ॥ ৪.০৮ ॥

নাবাঙ্মনসগম্যৎবং জীবস্য খলু যুজ্যতে ।
নানন্দস্য চ বেদ্যৎববচনাদ্ ব্রহ্মণোহি তৎ ॥ ৪.০৯ ॥

এবং পৃষ্টো মুনিশ্রেষ্টো নিদাঘেন মহাত্মনা ।
ঋভুঃ প্রোবাচ সর্বজ্ঞো ব্রহ্মন্ সস্মিতমাদরাৎ ॥ ৪.১০ ॥

ব্রহ্মোক্তং জীবশব্দেন হ্যবাঙ্মনসগোচরম্ ।
মোক্ষাতীতদশায়াং যজ্জীবস্তদ্ ব্রহ্মতাং ব্রজেৎ ॥ ৪.১১ ॥

পূর্বোত্তরবিরোধো বা মদ্বাক্যেষু ন তদ্ভবেৎ ।
শ্রুত্যর্থস্যোপরোধো বা সম্যগালোচ্য নিশ্চিনু ॥ ৪.১২ ॥

উপসংক্রমিতব্যো যদানন্দময় উচ্যতে ।
বেদ্যৎবং তস্যচসিদ্ধং পুচ্ছস্যাবিষয়ৎবতঃ ॥ ৪.১৩ ॥

তস্মাৎস্বয়ং সদাপূর্ণঃ পঞ্চমস্য বিকারিণঃ ।
আত্মস্থানীয় আনন্দ ইহ বেদ্য ইতি স্থিতিঃ ॥ ৪.১৪ ॥

ভৃগবে বরুণেনৈবং তৈত্তিরীয়াভিদশ্রুতৌ ।
পঞ্চমস্য বিকারিৎবং ন প্রোক্তমিতিচেচ্ছৃণু ॥ ৪.১৫ ॥

ময়ট্প্রয়োগাভাবেন হেতুনা নির্বিকারতা ।
ন শঙ্ক্যা পূর্বপর্যায়েষ্বন্নাদিষ্বপ্যদর্শনাৎ ॥ ৪.১৬ ॥

অতষ্ষষ্টং পরংব্রহ্ম পঞ্চমেনোপলক্ষিতম্ ।
নির্গুণং ভৃগবে পিত্রা প্রোক্তমিত্যবধারয় ॥ ৪.১৭ ॥

প্রাচুর্যার্থকতায়াং তু ময়টো নির্বিকারিণঃ ।
সচ্চিদানন্দরূপস্য ব্রহ্মণো বেদ্যতা ভবেৎ ॥ ৪.১৮ ॥

শারীরৎবাভিদানেন পূর্বানন্দময়স্য তু ।
বিকারিৎবং পুনস্স্পষ্টমুপসংক্রমণেন চ ॥ ৪.১৯ ॥

নানুকর্ষশ্চ পুচ্ছস্য পূর্বপূর্বস্য দৃশ্যতে ।
উত্তরোত্তরকোশে প্রাক্তত্তদাত্মানুকর্ষণাৎ ॥ ৪.২০ ॥

উপসংক্রমণং চোক্তং ময়ডন্তস্য কেবলম্ ।
আনন্দস্য ততোন্যস্য ন পরাত্মতয়া খলু ॥ ৪.২১ ॥

ব্রহ্মবিৎপরমাপ্নোতীত্যাদৌ দ্বৈবিধ্যমীরিতম্ ।
যত্তৎসরূপারূপাভ্যাং ব্রহ্মণোন্তে চ নিশ্চিনু ॥ ৪.২২ ॥

আত্মস্থানীয়চিদ্রূপানন্দব্রহ্মবিদোমুনে ।
প্রারব্ধান্তে পুচ্ছভূতাঽরূপব্রহ্মাপ্তিরিষ্যতে ॥ ৪.২৩ ॥

প্রতিষ্ঠাশব্দগম্যৎবাৎসর্বশেষিৎবতোপি চ ।
শাস্ত্রস্যারূপবদ্ ব্রহ্মপ্রাধান্যং যদ্যপি স্থিতম্ ॥ ৪.২৪ ॥

তথাপিবেদ্যতাঽভাবাদরূপস্য মুমুক্ষুভিঃ ।
আনন্দরূপবদ্ ব্রহ্মপ্রাধান্যং মুখ্যমিষ্যতে ॥ ৪.২৫ ॥

মোদপ্রমোদয়োশ্চৈবং সতি বেদ্যৎবমাপতেৎ ।
ইতিচেন্নৈষ দোষোস্তি তয়োর্ব্রহ্মাংশতা যতঃ ॥ ৪.২৬ ॥

ব্রহ্মণস্স্বগতে ভেদে নিত্যসিদ্ধে মুমুক্ষুবঃ ।
উপেক্ষিতুং সমর্থাস্স্যুর্নিদাঘ কথমত্র তে ॥ ৪.২৭ ॥

স্থূলার্থদর্শিনো যে বৈ শুষ্কাদ্বৈতসমাশ্রয়াঃ ।
তেষাং সাবয়বৎবাদি দোষস্স্ফুরতু চেতসি ॥ ৪.২৮ ॥

ন তাবতা ত্রিপাচ্ছ্রুত্যাদ্যনুরোধেন নিশ্চিতম্ ।
স্বভেদং বিদুষাং কিঞ্চিচ্ছিদ্যতে মুক্তজন্মনাম্ ॥ ৪.২৯ ॥

সূক্ষ্মবুদ্ধ্যা বিচরে হি স্বাত্মভেদঃ প্রকাশতে ।
অত্যন্তাভেদবার্তায়াং পুচ্ছগায়াং ফলং কিমু ॥ ৪.৩০ ॥

এতে কোশা হি পঞ্চৈব তিস্রোঽবস্থাস্সমীরিতাঃ ।
জাগ্রদাদ্যাঃ ক্রমেণৈতদ্ভেদং চ শৃণু সাদরম্ ॥ ৪.৩১ ॥

আদ্যা জাগরিতাঽবস্থা দ্বিতীয়া স্বপ্নসংজ্ঞিকা ।
তৃতীয়া সুপ্তিরূপান্যা তুরীয়া চিৎসুখাত্মিকা ॥ ৪.৩২ ॥

আদ্যাভিমানী বিশ্বাখ্যো দ্বিতীয়স্তৈজসস্স্মৃতঃ ।
তৃতীয়ঃ প্রাজ্ঞ এতেভ্যো কূটস্থ ইতরঃ প্রভুঃ ॥ ৪.৩৩ ॥

বহিঃপ্রজ্ঞো বিভুর্বিশ্বো হ্যন্তঃপ্রজ্ঞস্তু তৈজসঃ ।
ঘনপ্রজ্ঞস্তথা প্রাজ্ঞ এক এব ত্রিথা স্থিতঃ ॥ ৪.৩৪ ॥

দক্ষিণাক্ষিমুখে বিশ্বো মনস্যতন্তস্তু তৈজসঃ ।
আকাশে চ হৃদি প্রাজ্ঞস্ত্রিথা দেহে ব্যবস্থিতঃ ॥ ৪.৩৫ ॥

বিশ্বো হি স্থূলভুঙ্নিত্যং তৈজসঃ প্রবিবিক্তভুক্ ।
আনন্দভুক্তথা প্রাজ্ঞস্ত্রিথা ভোগং নিবোধ চ ॥ ৪.৩৬ ॥

স্থূলং তর্পয়তে বিশ্বং প্রবিবিক্তং তু তৈজসম্ ।
আনন্দশ্চ তথা প্রাজ্ঞং ত্রিথা তৃপ্তিং নিবোধ চ ॥ ৪.৩৭ ॥

ত্রিষু ধামসু যদ্ভোজ্যং ভোক্তা যশ্চ প্রকীর্তিতঃ ।
বেদৈতদুভয়ং যস্তু স ভুঞ্জানো ন লিপ্যতে ॥ ৪.৩৮ ॥

প্রভবস্সর্বভাবানাং সতামিতি বিনিশ্চয়ঃ ।
সর্বং জনয়তি প্রাণশ্চেতোংশূন্পুরুষঃ পৃথক্ ॥ ৪.৩৯ ॥

বিভূতিং প্রসবন্ত্বন্যে মন্যন্তে সৃষ্টিচিন্তকাঃ ।
স্বপ্নমায়াস্বরূপেতি সৃষ্টিরন্যৈর্বিকল্পিতা ॥ ৪.৪০ ॥

ইচ্ছামাত্রং প্রভোস্সৃষ্টিরিতি সৃষ্টৌ বিনিশ্চিতাঃ ।
কালাৎপ্রসূতিং ভূতানাং মন্যন্তে কালচিন্তকাঃ ॥ ৪.৪১ ॥

ভোগার্থং সৃষ্টিরিত্যন্যে ক্রীডার্থমিতিচপরে ।
দেবস্যৈষ স্বভাবোয়মাপ্তকামস্য কা স্পৃহা ॥ ৪.৪২ ॥

আপ্তকামস্য দেবস্য তুর্যস্যোক্তস্য সুব্রত ।
স্বরূপং প্রোচ্যতে সম্যঙ্নিদাঘ শৃণু তত্ত্বতঃ ॥ ৪.৪৩ ॥

নান্তঃপ্রজ্ঞং বহিঃপ্রজ্ঞং ন প্রজ্ঞং নোভয়াত্মকং ।
ন প্রজ্ঞানঘনং প্রজ্ঞং নাপ্রজ্ঞং ন চ কেবলম্ ॥ ৪.৪৪ ॥

ইদংৎবে নতদ্গ্রাহ্যমদৃশ্যং চপ্যলক্ষণম্ ।
অচিন্ত্যাব্যবহার্যং চব্যপদেশং পৃথক্তয়া ॥ ৪.৪৫ ॥

একাত্মপ্রত্যযং সারং প্রপঞ্চোপশমং শিবং ।
শান্তং চতুর্থমদ্বৈতং মন্যন্তে ব্রহ্মবাদিনঃ ॥ ৪.৪৬ ॥

স আত্মা স হি বিজ্ঞেয়ঃ সর্বৈরপি মুমুক্ষুভিঃ ।
তুর্যাত্মজ্ঞানহীনানাং ন মুক্তিস্যাদ্কদাচন ॥ ৪.৪৭ ॥

নিবৃত্তেস্সর্বদুঃখানামীশানঃ প্রভুরব্যযঃ ।
অদ্বৈতস্সর্বভাবানাং দেবস্তুর্যো বিভুস্স্মৃতঃ ॥ ৪.৪৮ ॥

কার্যকারণবদ্ধৌ তাবিষ্যেতে বিশ্বতৈজসৌ ।
প্রাজ্ঞঃ কারণবদ্ধস্তু দ্বৌ তৌ তুর্যে ন সিদ্ধ্যতঃ ॥ ৪.৪৯ ॥

নাত্মানং ন পরং চৈব ন সত্যং নাপিচনৃতং ।
প্রাজ্ঞঃ কিংচ ন সংবেত্তি তুর্যং তৎসর্বদৃক্সদা ॥ ৪.৫০ ॥

দ্বৈতস্যাগ্রহণং তুল্যমুভয়োঃ প্রাজ্ঞতুর্যযোঃ ।
বীজনিদ্রায়ুতঃ প্রাজ্ঞস্সা চ তুর্যে ন বিদ্যতে ॥ ৪.৫১ ॥

স্বপ্ননিদ্রায়ুতাবাদ্যৌ প্রাজ্ঞস্ত্বস্বপ্ননিদ্রয়া ।
ন নিদ্রাং নৈব চ স্বপ্নং তুর্যে পশ্যন্তি নিশ্চিতাঃ ॥ ৪.৫২ ॥

অন্যথাগৃহ্ণতস্স্বপ্নো নিদ্রা তত্ত্বমজানতঃ ।
বিপর্যাসে তয়োঃ ক্ষীণে তুরীয়ং পদমশ্নুতে ॥ ৪.৫৩ ॥

অনাদিমায়যা সুপ্তো যদা জীবঃ প্রবুধ্যতে ।
অজমদ্বৈতমস্বপ্নমনিদ্রং বুধ্যতে তদা ॥ ৪.৫৪ ॥

প্রপঞ্চো যদি বিদ্যেত নিবর্তেত ন সংশয়ঃ ।
মায়ামাত্রমিদং দ্বৈতমদ্বৈতং পরমার্থতঃ ॥ ৪.৫৫ ॥

বিকল্পো বিনিবর্তেত কল্পিতো যদি কেনচিৎ ।
উপদেশাদয়ং বাদো জ্ঞাতে দ্বৈতং ন বিদ্যতে ॥ ৪.৫৬ ॥

নিদাঘঃ ।
ভগবন্ কথমদ্বৈতং ব্রহ্মদ্বৈবিধ্যবাদিনঃ ।
ভবতোভিমতং তত্র সংশয়ো মে ভবত্যলম্ ॥ ৪.৫৭ ॥

ঋভুঃ ।
দ্বৈতপ্রপঞ্চশূন্যেস্মিন্ নির্গুণে পূর্ণচিদ্ঘনে ।
ব্রহ্মণ্যদ্বৈতসংসিদ্ধির্যতো নান্যত্র সর্বধা ॥ ৪.৫৮ ॥

অতস্সরূপারূপাভ্যাং ব্রহ্মদ্বৈবিধ্যবাদিনঃ ।
মমৈবাদ্বৈতবাদিৎবন্নারূপাদ্বৈতবাদিনঃ ॥ ৪.৫৯ ॥

দ্বৈতাদ্বৈতোভয়াতীতে ব্য্বহারাদ্যগোচরে ।
নীরূপে ব্রহ্মণি প্রাজ্ঞাঽদ্বৈতবাদঃ কথং ভবেৎ ॥ ৪.৬০ ॥

দ্বৈতাচিদ্রূপকার্যস্যাদ্বৈতচিদ্রূপকারণাৎ ।
নিবৃত্তিস্যাদ্যথাদীপাত্তমসো নৎবরূপতঃ ॥ ৪.৬১ ॥

অতো নাদ্বৈতসিদ্ধিস্যাৎকথঞ্চিদপি সত্তম ।
অরূপাগোচরব্রহ্মবাদিনাং তাদৃশে মতে ॥ ৪.৬২ ॥

চিদ্রূপব্রহ্মতাদাত্ম্যং জীবস্য হি বিবক্ষিতম্ ।
নারূপবাক্যদূরৎবাত্তন্নাদ্বৈতমরূপিণাম্ ॥ ৪.৬৩ ॥

যদ্যপ্যরূপব্রহ্মৎবং জীবস্যান্তে প্রসিদ্ধ্যতি ।
তথাপ্যদ্বৈতিতাং বক্তুং ন শক্যং দ্বন্দ্বহানিতঃ ॥ ৪.৬৪ ॥

বাচ্যবাচকহীনে চ লক্ষ্যলক্ষণবর্জিতে ।
কথমদ্বৈতশব্দোয়ং সাবকাশো ভবেন্মুনে ॥ ৪.৬৫ ॥

নিদাঘঃ ।
দেবতাপুরুষাদ্যৈর্হি বেদশব্দৈস্সমীর্যতে ।
তস্যৌপনিষদৎবস্যাব্যভিচরোস্ত্যরূপিণঃ ॥ ৪.৬৬ ॥

ততোস্য শব্দগম্যৎবাৎ প্রষ্টব্যৎবং ময়া ভবেৎ ।
বাচ্যৎবং চ ৎবয়েত্যদ্য মন্যে শ্রীগুরুনায়ক ॥ ৪.৬৭ ॥

ঋভুঃ ।
অরূপব্রহ্মবিষয়াশ্শ্ব্দাস্সন্ত্যেব যদ্যপি ।
তেনৌপনিষদৎবং চ কথঞ্চিত্তস্য সিদ্ধ্যতি ॥ ৪.৬৮ ॥

তথাপি প্রশ্নয়োগ্যৎবং বাচ্যৎবং বা ন সিদ্ধ্যতি ।
রূঢ্যর্থমাত্রবত্ত্বেনালক্ষকৎবাদয়োগতঃ ॥ ৪.৬৯ ॥

যোগার্থবদ্ভিশ্শব্দৈর্হি লক্ষকৈর্বাচকৈশ্চ বা ।
শিষ্যেভ্যঃ প্রোচ্যতে সত্যংবস্তু শ্রীগুরুমূর্তিভিঃ ॥ ৪.৭০ ॥

অরূপবস্তুনঃ প্রশ্নঃ প্রতিষিদ্ধশ্শ্রুতৌ যতঃ ।
যাজ্ঞবল্ক্যেন গার্গ্যৈ তন্নৎবং প্রষ্টুমিহার্হসি ॥ ৪.৭১ ॥

তস্মাৎ তুরীয়ং সদ্ ব্রহ্ম যোগবৃত্ত্যৈব লক্ষণৈঃ ।
সচ্চিদানন্দপূর্বৈস্ত্বং মদুক্তং বিদ্ধি মুক্তয়ে ॥ ৪.৭২ ॥

জাগ্রত্যন্নময়ং কোশং স্থূলদেহং চ বিদ্ধি বৈ ।
স্বপ্নে প্রণমনোজ্ঞানময়াস্সূক্ষ্মবপুস্ততঃ ॥ ৪.৭৩ ॥

সুষুপ্তৌ কারণং দেহমানন্দময়কোশকম্ ।
তুরীয়ে ৎবশরীরং তচ্চিদ্রূপং কোশবর্জিতম্ ॥ ৪.৭৪ ॥

স এব মায়াপরিমোহিতাত্মা শরীরমাস্থায় করোতি সর্বম্ ।
স্ত্র্যন্নপানাদি বিচিত্রভোগৈস্স এব জাগ্রৎপরিতৃপ্তিমেতি ॥ ৪.৭৫ ॥

স্বপ্নেঽপি জীবস্সুখদুঃখভোক্তা স্বমায়যা কল্পিতবিশ্বলোকে ।
সুষুপ্তিকালে সকলে বিলীনে তমোভিভূতস্সুখরূপমেতি ॥ ৪.৭৬ ॥

পুনশ্চ জন্মান্তরকর্ময়োগাৎস এব জীবস্স্বপিতিপ্রবুদ্ধঃ ।
পুরত্রয়ে ক্রীডতি যস্তু জীবস্ততস্তু জাতং সকলং বিচিত্রম্ ॥ ৪.৭৭ ॥

আধারমানন্দমখণ্ডবোধং যস্মিন্ লয়ং যাতি পুরত্রয়ং চ ।
যৎসর্ববেদান্তরহস্যতত্ত্বং যৎপূর্ণচৈতন্যনিজস্বরূপং ॥ ৪.৭৮ ॥

এতস্মাজ্জায়তে প্রাণো মনস্সর্বেন্দ্রিয়াণি চ ।
খং বায়ুর্জ্যোতিরাপঃ পৃথ্বী সর্বস্য ধারিণী ॥ ৪.৭৯ ॥

যৎপরংব্রহ্ম সর্বাত্মা বিশ্বস্যায়তনং মহৎ ।
সূক্ষ্মাৎসূক্ষ্মতরং নিত্যং তত্ত্বমেব ৎবমেব তৎ ॥ ৪.৮০ ॥

জাগ্রৎস্বপ্নসুষুপ্ত্যাদিপ্রপঞ্চং যৎপ্রকাশতে ।
তদ্ ব্রহ্মাহমিতিজ্ঞাৎবা সর্ববন্ধৈঃ প্রমুচ্যতে ॥ ৪.৮১ ॥

ত্রিষু ধামসু যদ্ভোজ্যং ভোক্তা ভোগশ্চ যদ্ভবেৎ ।
তেভ্যো বিলক্ষণস্সাক্ষি চিন্মাত্রোহং সদাশিবঃ ॥ ৪.৮২ ॥

ময়্যেব সকলং জাতং ময়ি সর্বং প্রতিষ্ঠিতম্ ।
ময়ি সর্বং লয়ং যাতি তদ্ ব্রহ্মাদ্বয়মস্ম্যহম্ ॥ ৪.৮৩ ॥

অণোরণীয়ানহমেব তদ্বন্মহানহং বিশ্বমিদং বিচিত্রম্ ।
পুরাতনোঽহং পুরুষোঽহমীশো হিরণ্ময়োঽহং শিবরূপমস্মি ॥ ৪.৮৪ ॥

অপাণিপাদোঽহমচিন্ত্যশক্তিঃ পশ্যাম্যচক্ষুস্সশ্রুণোম্যকর্ণঃ ।
অহং বিজানামি বিবিক্তরূপো ন চস্তি বেত্তা মম চিৎসদাঽহং ॥ ৪.৮৫ ॥

বেদৈরনেকৈরহমেব বেদ্যো বেদান্তকৃদ্বেদবিদেবচহম্ ।
ন পুণ্যপাপে মম নাস্তি নাশো ন জন্মদেহেন্দ্রিয়বুদ্ধিরস্তি ॥ ৪.৮৬ ॥

ন ভূমিরাপো মম বহ্নিরস্তি ন চনিলোমেঽস্তি ন চম্বরং চ ।
এবং বিদিৎবা পরমার্থরূপং গুহাশয়ং নিষ্কল়মদ্বিতীয়ম্ ॥ ৪.৮৭ ॥

অখণ্ডমাদ্যন্তবিহীনমেকং তেজোময়ানন্দঘনস্বরূপম্ ।
সমস্তসাক্ষিং সদসদ্বিহীনং প্রয়াতি শুদ্ধং পরমার্থতত্ত্বম্ ॥ ৪.৮৮ ॥

শ্রী গুরুমূর্তিঃ ।
এবং শ্রুৎবা নিদাঘস্স ঋভুবক্ত্রাদ্যদার্থতঃ ।
ব্রহ্মৈবাহমিতি জ্ঞাৎবা কৃতকৃত্যোঽভবদ্বিধে ॥ ৪.৮৯ ॥

যতস্ত্বং চ পরাত্মানং শ্রুতবানসি মন্মুখাৎ ।
ৎবং চ ধন্যঃ পুনঃ পৃচ্ছ শ্রোতব্যান্তরমস্তিচেৎ ॥ ৪.৯০ ॥

॥ ইতি শ্রী গুরুজ্ঞানবাসিষ্ঠে তত্ত্বনারায়ণে
জ্ঞানকাণ্ডস্য প্রথমপাদে ষষ্ঠোঽধ্যায়ঃ এবং
শ্রী ঋভুগীতাখ্যোঽয়ং গ্রন্থস্সমাপ্তঃ ॥

॥ ওঁ তৎসৎ ॥

Also Read:

Gurujnanavasishtha’s Ribhu Gita in Hindi | English | Bengali | Gujarati | Kannada | Malayalam | Oriya | Telugu | Tamil

Add Comment

Click here to post a comment