মণিকর্ণিকাষ্টকম্ Lyrics in Bengali:
ত্বত্তীরে মণিকর্ণিকে হরিহরৌ সায়ুজ্যমুক্তিপ্রদৌ
বাদন্তৌ কুরুতঃ পরস্পরমুভৌ জন্তোঃ প্রয়াণোত্সবে ।
মদ্রূপো মনুজোঽয়মস্তু হরিণা প্রোক্তঃ শিবস্তত্ক্ষণাত্
তন্মধ্যাদ্ভৃগুলাঞ্ছনো গরুডগঃ পীতাম্বরো নির্গতঃ ॥ ১॥
ইন্দ্রাদ্যাস্ত্রিদশাঃ পতন্তি নিয়তং ভোগক্ষয়ে য়ে পুন
র্জায়ন্তে মনুজাস্ততোপি পশবঃ কীটাঃ পতঙ্গাদয়ঃ ।
য়ে মাতর্মণিকর্ণিকে তব জলে মজ্জন্তি নিষ্কল্মষাঃ
সায়ুজ্যেঽপি কিরীটকৌস্তুভধরা নারায়ণাঃ স্যুর্নরাঃ ॥ ২॥
কাশী ধন্যতমা বিমুক্তনগরী সালংকৃতা গঙ্গয়া
তত্রেয়ং মণিকর্ণিকা সুখকরী মুক্তির্হি তত্কিংকরী ।
স্বর্লোকস্তুলিতঃ সহৈব বিবুধৈঃ কাশ্যা সমং ব্রহ্মণা
কাশী ক্ষোণিতলে স্থিতা গুরুতরা স্বর্গো লঘুত্বং গতঃ ॥ ৩॥
গঙ্গাতীরমনুত্তমং হি সকলং তত্রাপি কাশ্যুত্তমা
তস্যাং সা মণিকর্ণিকোত্তমতমা য়েত্রেশ্বরো মুক্তিদঃ ।
দেবানামপি দুর্লভং স্থলমিদং পাপৌঘনাশক্ষমং
পূর্বোপার্জিতপুণ্যপুঞ্জগমকং পুণ্যৈর্জনৈঃ প্রাপ্যতে ॥ ৪॥
দুঃখাম্ভোধিগতো হি জন্তুনিবহস্তেষাং কথং নিষ্কৃতিঃ
জ্ঞাত্বা তদ্বি বিরিঞ্চিনা বিরচিতা বারাণসী শর্মদা ।
লোকাঃস্বর্গসুখাস্ততোঽপি লঘবো ভোগান্তপাতপ্রদাঃ
কাশী মুক্তিপুরী সদা শিবকরী ধর্মার্থমোক্ষপ্রদা ॥ ৫॥
একো বেণুধরো ধরাধরধরঃ শ্রীবত্সভূষাধরঃ
য়োঽপ্যেকঃ কিল শংকরো বিষধরো গঙ্গাধরো মাধবঃ ।
য়ে মাতর্মণিকর্ণিকে তব জলে মজ্জন্তি তে মানবাঃ
রুদ্রা বা হরয়ো ভবন্তি বহবস্তেষাং বহুত্বং কথম্ ॥ ৬॥
ত্বত্তীরে মরণং তু মঙ্গলকরং দেবৈরপি শ্লাধ্যতে
শক্রস্তং মনুজং সহস্রনয়নৈর্দ্রষ্টুং সদা তত্পরঃ ।
আয়ান্তং সবিতা সহস্রকিরণৈঃ প্রত্যুগ্দতোঽভূত্সদা
পুণ্যোঽসৌ বৃষগোঽথবা গরুডগঃ কিং মন্দিরং য়াস্যতি ॥ ৭॥
মধ্যাহ্নে মণিকর্ণিকাস্নপনজং পুণ্যং ন বক্তুং ক্ষমঃ
স্বীয়ৈরব্ধশতৈশ্চতুর্মুখধরো বেদার্থদীক্ষাগুরুঃ ।
য়োগাভ্যাসবলেন চন্দ্রশিখরস্তত্পুণ্যপারংগতঃ
ত্বত্তীরে প্রকরোতি সুপ্তপুরুষং নারায়ণং বা শিবম্ ॥ ৮॥
কৃচ্ছৈর্ঃ কোটিশতৈঃ স্বপাপনিধনং য়চ্চাশ্বমেধৈঃ ফলং
তত্সর্বে মণিকর্ণিকাস্নপনজে পুণ্যে প্রবিষ্টং ভবেত্ ।
স্নাত্বা স্তোত্রমিদং নরঃ পঠতি চেত্সংসারপাথোনিধিং
তীর্ত্বা পল্বলবত্প্রয়াতি সদনং তেজোময়ং ব্রহ্মণঃ ॥ ৯॥
ইতি শ্রীমত্পরমহংসপরিব্রাজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছংকরভগবতঃ কৃতৌ
মণিকর্ণিকাষ্টকং সম্পূর্ণম্ ॥
