Jatayu Kruta Sri Rama Stotram in English:
॥ śrī rāma stutiḥ (jaṭāyu kr̥tam) ॥
jaṭāyuruvāca |
agaṇitaguṇamapramēyamādyaṁ
sakalajagatsthitisamyamādihētum |
uparamaparamaṁ paramātmabhūtaṁ
satatamahaṁ praṇatō:’smi rāmacandram || 1 ||
niravadhisukhamindirākaṭākṣaṁ
kṣapitasurēndracaturmukhādiduḥkham |
naravaramaniśaṁ natō:’smi rāmaṁ
varadamahaṁ varacāpabāṇahastam || 2 ||
tribhuvanakamanīyarūpamīḍyaṁ
raviśatabhāsuramīhitapradānam |
śaraṇadamaniśaṁ surāgamūlē
kr̥tanilayaṁ raghunandanaṁ prapadyē || 3 ||
bhavavipinadavāgnināmadhēyaṁ
bhavamukhadaivatadaivataṁ dayālum |
danujapatisahasrakōṭināśaṁ
ravitanayāsadr̥śaṁ hariṁ prapadyē || 4 ||
aviratabhavabhāvanātidūraṁ
bhavavimukhairmunibhiḥ sadaiva dr̥śyam |
bhavajaladhisutāraṇāṅghripōtaṁ
śaraṇamahaṁ raghunandanaṁ prapadyē || 5 ||
giriśagirisutāmanōnivāsaṁ
girivaradhāriṇamīhitābhirāmam |
suravaradanujēndrasēvitāṅghriṁ
suravaradaṁ raghunāyakaṁ prapadyē || 6 ||
paradhanaparadāravarjitānāṁ
paraguṇabhūtiṣu tuṣṭamānasānām |
parahitaniratātmanāṁ susēvyaṁ
raghuvaramambujalōcanaṁ prapadyē || 7 ||
smitaruciravikāsitānanābja-
matisulabhaṁ surarājanīlanīlam |
sitajalaruhacārunētraśōbhaṁ
raghupatimīśagurōrguruṁ prapadyē || 8 ||
harikamalajaśambhurūpabhēdā-
ttvamiha vibhāsi guṇatrayānuvr̥ttaḥ |
raviriva jalapūritōdapātrē-
ṣvamarapatistutipātramīśamīḍē || 9 ||
ratipatiśatakōṭisundarāṅgaṁ
śatapathagōcarabhāvanāvidūram |
yatipatihr̥dayē sadā vibhātaṁ
raghupatimārtiharaṁ prabhuṁ prapadyē || 10 ||
ityēvaṁ stuvatastasya
prasannō:’bhūdraghūttamaḥ |
uvāca gaccha bhadraṁ tē
mama viṣṇōḥ parampadam || 11 ||
śr̥ṇōti ya idaṁ stōtram
likhēdvā niyataḥ paṭhēt |
sa yāti mama sārūpyaṁ
maraṇē matsmr̥tiṁ labhēt || 12 ||
iti rāghavabhāṣitaṁ tadā
śrutavān harṣasamākulō dvijaḥ ||
raghunandanasāmyamāsthitaḥ
prayayau brahmasupūjitaṁ padam || 13 ||
iti śrīmadadhyātmarāmāyaṇē araṇyakāṇḍē aṣṭamē sargē jaṭāyu kr̥ta śrī rāma stōtram ||
Also Read:
Jatayu Kruta Sri Rama Stotram Lyrics in Hindi | English | Kannada | Telugu | Tamil