કાત્યાયન્યષ્ટકમ્ Lyrics in Gujarati:
શ્રીગણેશાય નમઃ ।
અવર્ષિસંજ્ઞં પુરમસ્તિ લોકે કાત્યાયની તત્ર વિરાજતે યા ।
પ્રસાદદા યા પ્રતિભા તદીયા સા છત્રપુર્યાં જયતીહ ગેયા ॥ ૧॥
ત્વમસ્ય ભિન્નૈવ વિભાસિ તસ્યાસ્તેજસ્વિની દીપજદીપકલ્પા ।
કાત્યાયની સ્વાશ્રિતદુઃખહર્ત્રી પવિત્રગાત્રી મતિમાનદાત્રી ॥ ૨॥
બ્રહ્મોરુવેતાલકસિંહદાઢોસુભૈરવૈરગ્નિગણાભિધેન ।
સંસેવ્યમાના ગણપત્યભિખ્યા યુજા ચ દેવિ સ્વગણૈરિહાસિ ॥ ૩॥
ગોત્રેષુ જાતૈર્જમદગ્નિભારદ્વાજાઽત્રિસત્કાશ્યપકૌશિકાનામ્ ।
કૌણ્ડિન્યવત્સાન્વયજૈશ્ચ વિપ્રૈર્નિજૈર્નિષેવ્યે વરદે નમસ્તે ॥ ૪॥
ભજામિ ગોક્ષીરકૃતાભિષેકે રક્તામ્બરે રક્તસુચન્દનાક્તે ।
ત્વાં બિલ્વપત્રીશુભદામશોભે ભક્ષ્યપ્રિયે હૃત્પ્રિયદીપમાલે ॥ ૫॥
ખડ્ગં ચ શઙ્ખં મહિષાસુરીયં પુચ્છં ત્રિશૂલં મહિષાસુરાસ્યે ।
પ્રવેશિતં દેવિ કરૈર્દધાને રક્ષાનિશં માં મહિષાસુરઘ્ને ॥ ૬॥
સ્વાગ્રસ્થબાણેશ્વરનામલિઙ્ગં સુરત્નકં રુક્મમયં કિરીટ્મ ।
શીર્ષે દધાને જય હે શરણ્યે વિદ્યુત્પ્રભે માં જયિનં કુરૂષ્વ ॥ ૭॥
નેત્રાવતીદક્ષિણપાર્શ્વસંસ્થે વિદ્યાધરૈર્નાગગણૈશ્ચ સેવ્યે ।
દયાઘને પ્રાપય શં સદાસ્માન્માતર્યશોદે શુભદે શુભાક્ષિ ॥ ૮॥
ઇદં કાત્યાયનીદેવ્યાઃ પ્રસાદાષ્ટકમિષ્ટદમ્ ।
કુમઠાચાર્યજં ભક્ત્યા પઠેદ્યઃ સ સુખી ભવેત્ ॥ ૯॥
॥ ઇતિ શ્રીકાત્યાયન્યષ્ટકં સમ્પૂર્ણમ્ ॥
