Templesinindiainfo

Best Spiritual Website

Keshavashtakam Lyrics in Kannada ಕೇಶವಾಷ್ಟಕಮ್

ಕೇಶವಾಷ್ಟಕಮ್ Lyrics in Kannada:

ನವಪ್ರಿಯಕಮಂಜರೀರಚಿತಕರ್ಣಪೂರಶ್ರಿಯಂ
ವಿನಿದ್ರತರಮಾಲತೀಕಲಿತಶೇಖರೇಣೋಜ್ಜ್ವಲಮ್ ।
ದರೋಚ್ಛ್ವಸಿತಯೂಥಿಕಾಗ್ರಥಿತವಲ್ಗುವೈಕಕ್ಷಕೃತ್
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 1॥

ಪಿಶಂಗಿ ಮಣಿಕಸ್ತನಿ ಪ್ರಣತಶೃಂಗಿ ಪಿಂಗೇಕ್ಷಣೇ
ಮೃದಂಗಮುಖಿ ಧೂಮಲೇ ಶವಲಿ ಹಂಸಿ ವಂಶೀಪ್ರಿಯೇ ।
ಇತಿ ಸ್ವಸುರಭಿಕುಲಂ ತರಲಮಾಹ್ವಯನ್ತಂ ಮುದಾ
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 2॥

ಘನಪ್ರಣಯಮೇದುರಾನ್ ಮಧುರನರ್ಮಗೋಷ್ಠೀಕಲಾ
ವಿಲಾಸನಿಲಯಾನ್ ಮಿಲದ್ವಿವಿಧವೇಶವಿದ್ಯೋತಿನಃ ।
ಸಖೀನ್ ಅಖಿಲಸಾರಯಾ ಪಥಿಷು ಹಾಸಯನ್ತಂ ಗಿರಾ
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 3॥

ಶ್ರಮಾಮ್ಬುಕಣಿಕಾವಲೀದರವಿಲೀಢಗಂಡಾನ್ತರಂ
ಸಮೂಢಾಗಿರಿಧಾತುಭಿರ್ಲಿಖಿತಚಾರುಪತ್ರಾಂಕುರಮ್ ।
ಉದಂಚದಲಿಮಂಡಲೀದ್ಯುತಿವಿಡಮ್ಬಿವಕ್ರಾಲಕಂ
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 4॥

ನಿಬದ್ಧನವತರ್ಣಕಾವಲಿವಿಲೋಕನೋತ್ಕಂಠಯಾ
ನಟತ್ಖುರಪುಟಾಂಚಲೈರಲಘುಭಿರ್ಭುವಂ ಭಿನ್ದತೀಮ್ ।
ಕಲೇನ ಧವಲಾಘಟಾಂ ಲಘು ನಿವರ್ತಯನ್ತಂ ಪುರೋ
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 5॥

ಪದ್ಮಾಂಕತತಿಭಿರ್ವರಾಂ ವಿರಚಯನ್ತಮಧ್ವಶ್ರಿಯಂ
ಚಲತ್ತರಲನೈಚಿಕೀನಿಚಯಧೂಲಿಧೂಮ್ರಸ್ರಜಮ್ ।
ಮರುಲ್ಲಹರಿಚಂಚಲೀಕೃತದುಕೂಲಚೂಡಾಂಚಲಂ
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 6॥

ವಿಲಾಸಮುರಲೀಕಲಧ್ವನಿಭಿರುಲ್ಲಸನ್ಮಾನಸಾಃ
ಕ್ಷಣಾದಖಿಲವಲ್ಲವೀಃ ಪುಲಕಯನ್ತಮನ್ತರ್ಗೃಹೇ ।
ಮುಹುರ್ವಿದಧತಂ ಹೃದಿ ಪ್ರಮುದಿತಾಂ ಚ ಗೋಷ್ಠೇಶ್ವರೀಂ
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 7॥

ಉಪೇತ್ಯ ಪಥಿ ಸುನ್ದರೀತತಿಭಿರಾಭಿರಭ್ಯರ್ಚಿತಂ
ಸ್ಮಿತಾಂಕುರಕರಮ್ಬಿತೈರ್ನಟದಪಾಂಗಭಂಗೀಶತೈಃ ।
ಸ್ತನಸ್ತವಕಸಂಚರನ್ನಯನಚಂಚರೀಕಾಂಚಲಂ
ವ್ರಜೇ ವಿಜಯಿನಂ ಭಜೇ ವಿಪಿನದೇಶತಃ ಕೇಶವಮ್ ॥ 8॥

ಇದಂ ನಿಖಿಲವಲ್ಲವೀಕುಲಮಹೋತ್ಸವೋಲ್ಲಾಸನಂ
ಕ್ರಮೇಣ ಕಿಲ ಯಃ ಪುಮಾನ್ ಪಠತಿ ಸುಷ್ಠು ಪದ್ಯಾಷ್ಟಕಮ್ ।
ತಮುಜ್ಜ್ವಲಧಿಯಂ ಸದಾ ನಿಜಪದಾರವಿನ್ದದ್ವಯೇ
ರತಿಂ ದದದಚಂಚಲಾಂ ಸುಖಯತಾದ್ ವಿಶಾಖಾಸಖಃ ॥ 9॥

ಇತಿ ಶ್ರೀರೂಪಗೋಸ್ವಾಮಿವಿರಚಿತಸ್ತವಮಾಲಾಯಾಂ ಶ್ರೀಕೇಶವಾಷ್ಟಕಂ ಸಮ್ಪೂರ್ಣಮ್ ।

Keshavashtakam Lyrics in Kannada ಕೇಶವಾಷ್ಟಕಮ್

Leave a Reply

Your email address will not be published. Required fields are marked *

Scroll to top