କେଶଵାଷ୍ଟକମ୍ Lyrics in Oriya:
ନଵପ୍ରିୟକମଞ୍ଜରୀରଚିତକର୍ଣପୂରଶ୍ରିୟଂ
ଵିନିଦ୍ରତରମାଲତୀକଲିତଶେଖରେଣୋଜ୍ଜ୍ଵଲମ୍ ।
ଦରୋଚ୍ଛ୍ଵସିତୟୂଥିକାଗ୍ରଥିତଵଲ୍ଗୁଵୈକକ୍ଷକୃତ୍
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୧॥
ପିଶଙ୍ଗି ମଣିକସ୍ତନି ପ୍ରଣତଶୃଙ୍ଗି ପିଙ୍ଗେକ୍ଷଣେ
ମୃଦଙ୍ଗମୁଖି ଧୂମଲେ ଶଵଲି ହଂସି ଵଂଶୀପ୍ରିୟେ ।
ଇତି ସ୍ଵସୁରଭିକୁଲଂ ତରଲମାହ୍ଵୟନ୍ତଂ ମୁଦା
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୨॥
ଘନପ୍ରଣୟମେଦୁରାନ୍ ମଧୁରନର୍ମଗୋଷ୍ଠୀକଲା
ଵିଲାସନିଲୟାନ୍ ମିଲଦ୍ଵିଵିଧଵେଶଵିଦ୍ୟୋତିନଃ ।
ସଖୀନ୍ ଅଖିଲସାରୟା ପଥିଷୁ ହାସୟନ୍ତଂ ଗିରା
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୩॥
ଶ୍ରମାମ୍ବୁକଣିକାଵଲୀଦରଵିଲୀଢଗଣ୍ଡାନ୍ତରଂ
ସମୂଢାଗିରିଧାତୁଭିର୍ଲିଖିତଚାରୁପତ୍ରାଙ୍କୁରମ୍ ।
ଉଦଞ୍ଚଦଲିମଣ୍ଡଲୀଦ୍ୟୁତିଵିଡମ୍ବିଵକ୍ରାଲକଂ
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୪॥
ନିବଦ୍ଧନଵତର୍ଣକାଵଲିଵିଲୋକନୋତ୍କଣ୍ଠୟା
ନଟତ୍ଖୁରପୁଟାଞ୍ଚଲୈରଲଘୁଭିର୍ଭୁଵଂ ଭିନ୍ଦତୀମ୍ ।
କଲେନ ଧଵଲାଘଟାଂ ଲଘୁ ନିଵର୍ତୟନ୍ତଂ ପୁରୋ
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୫॥
ପଦ୍ମାଙ୍କତତିଭିର୍ଵରାଂ ଵିରଚୟନ୍ତମଧ୍ଵଶ୍ରିୟଂ
ଚଲତ୍ତରଲନୈଚିକୀନିଚୟଧୂଲିଧୂମ୍ରସ୍ରଜମ୍ ।
ମରୁଲ୍ଲହରିଚଞ୍ଚଲୀକୃତଦୁକୂଲଚୂଡାଞ୍ଚଲଂ
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୬॥
ଵିଲାସମୁରଲୀକଲଧ୍ଵନିଭିରୁଲ୍ଲସନ୍ମାନସାଃ
କ୍ଷଣାଦଖିଲଵଲ୍ଲଵୀଃ ପୁଲକୟନ୍ତମନ୍ତର୍ଗୃହେ ।
ମୁହୁର୍ଵିଦଧତଂ ହୃଦି ପ୍ରମୁଦିତାଂ ଚ ଗୋଷ୍ଠେଶ୍ଵରୀଂ
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୭॥
ଉପେତ୍ୟ ପଥି ସୁନ୍ଦରୀତତିଭିରାଭିରଭ୍ୟର୍ଚିତଂ
ସ୍ମିତାଙ୍କୁରକରମ୍ବିତୈର୍ନଟଦପାଙ୍ଗଭଙ୍ଗୀଶତୈଃ ।
ସ୍ତନସ୍ତଵକସଞ୍ଚରନ୍ନୟନଚଞ୍ଚରୀକାଞ୍ଚଲଂ
ଵ୍ରଜେ ଵିଜୟିନଂ ଭଜେ ଵିପିନଦେଶତଃ କେଶଵମ୍ ॥ ୮॥
ଇଦଂ ନିଖିଲଵଲ୍ଲଵୀକୁଲମହୋତ୍ସଵୋଲ୍ଲାସନଂ
କ୍ରମେଣ କିଲ ୟଃ ପୁମାନ୍ ପଠତି ସୁଷ୍ଠୁ ପଦ୍ୟାଷ୍ଟକମ୍ ।
ତମୁଜ୍ଜ୍ଵଲଧିୟଂ ସଦା ନିଜପଦାରଵିନ୍ଦଦ୍ଵୟେ
ରତିଂ ଦଦଦଚଞ୍ଚଲାଂ ସୁଖୟତାଦ୍ ଵିଶାଖାସଖଃ ॥ ୯॥
ଇତି ଶ୍ରୀରୂପଗୋସ୍ଵାମିଵିରଚିତସ୍ତଵମାଲାୟାଂ ଶ୍ରୀକେଶଵାଷ୍ଟକଂ ସମ୍ପୂର୍ଣମ୍ ।