నారాయణాష్టకమ్ Lyrics in Telugu:
వాత్సల్యాదభయప్రదానసమయాదార్త్తార్తినిర్వాపణాద్-
ఔదార్య్యాదఘశోషణాదగణితశ్రేయః పదప్రాపణాత్ ।
సేవ్యః శ్రీపతిరేక ఏవ జగతామేతేఽభవన్సాక్షిణః
ప్రహ్లాదశ్చ విభీషణశ్చ కరిరాట్ పాఞ్చాల్యహల్యాధ్రువః ॥ ౧॥
ప్రహ్లాదాస్తి యదీశ్వరో వద హరిః సర్వత్ర మే దర్శయ
స్తంభే చైవమితి బ్రువన్తమసురం తత్రావిరాసీద్ధరిః ।
వక్షస్తస్య విదారయన్నిజనఖైర్వాత్సల్యమాపాదయన్-
నార్త్తత్రాణపరాయణః స భగవాన్నారాయణో మే గతిః ॥ ౨॥
శ్రీరామోఽత్ర విభీషణోఽయమనఘో రక్షోభయాదాగతః
సుగ్రీవానయ పాలయైనమధునా పౌలస్త్యమేవాగతమ్ ।
ఇత్యుక్త్వాఽభయమస్య సర్వవిదితం యో రాఘవో దత్తవాన్-
ఆర్త్తత్రాణపరాయణః స భగవాన్నారాయణో మే గతిః ॥ ౩॥
నక్రగ్రస్తపదం సముద్ధృతకరం బ్రహ్మాదయో భోః సురా
రక్షన్తామితి దీనవాక్యకరిణం దేవేష్వశక్తేషు యః ।
మా భైషీరితి తస్య నక్రహననే చక్రాయుధః శ్రీధరో-
హ్యార్త్తత్రాణపరాయణః స భగవాన్నారాయణో మే గతిః ॥ ౪॥
భోః కృష్ణాచ్యుతః భోః కృపాలయ హరే భోః పాణ్డవానాం సఖే
క్వాసి క్వాసి సుయోధనాధ్యపహృతాం భో రక్ష మామాతురామ్ ।
ఇత్యుక్త్తోఽక్షయవస్త్రసంభృతతనుర్యోఽపాలయద్ద్రౌపదీమ్-
ఆర్త్తత్రాణపరాయణః స భగవాన్నారాయణో మే గతిః ॥ ౫॥
యత్పాదాబ్జనఖోదకం త్రిజగతాం పాపౌఘవిధ్వంసనం
యన్నామామృతపూరకం చ పిబతాం సంసారసన్తారకమ్ ।
పాషాణోఽపి యదఙిఘ్రపఙ్కరజసా శాపాన్మునేర్మోచితో
హ్యార్త్తత్రాణపరాయణః స భగవాన్నారాయణో మే గతిః ॥ ౬॥
పిత్రా భ్రాతరముత్తమాసనగతం హ్యౌత్తానపాదిర్ధ్రువో
దృష్ట్వా తత్సమమారురుక్షురధికం మాత్రాఽవమానం గతః ।
యం గత్వా శరణం యదాప తపసా హేమాద్రిసింహాసనం
హ్యార్త్తత్రాణపరాయణః స భగవాన్నారాయణో మే గతిః ॥ ౭॥
ఆర్త్తా విషణ్ణాః శిథిలాశ్చ భీతా ఘోరేశు చ వ్యాధిశు వర్తమానాః ।
సంకీర్త్య నారాయణశబ్దమాత్రం విముక్తదుఃఖాః సుఖినో భవన్తి ॥ ౮॥
ఇతి శ్రీకూరేశస్వామివిరచితం నారాయణాష్టకం సమ్పూర్ణమ్ ।
