Ramapatya Ashtakam Text in Oriya:
॥ ରମାପତ୍ୟଷ୍ଟକମ୍ ॥
ଶ୍ରୀଗଣେଶାୟ ନମଃ ॥
ଜଗଦାଦିମନାଦିମଜଂ ପୁରୁଷଂ ଶରଦମ୍ବରତୁଲ୍ୟତନୁଂ ଵିତନୁମ୍ ।
ଧୃତକଞ୍ଜରଥାଙ୍ଗଗଦଂ ଵିଗଦଂ ପ୍ରଣମାମି ରମାଧିପତିଂ ତମହମ୍ ॥ ୧॥
କମଲାନନକଞ୍ଜରତଂ ଵିରତଂ ହୃଦି ୟୋଗିଜନୈଃ କଲିତଂ ଲଲିତମ୍ ।
କୁଜନୈଃ ସୁଜନୈରଲଭଂ ସୁଲଭଂ ପ୍ରଣମାମି ରମାଧିପତିଂ ତମହମ୍ ॥ ୨॥
ମୁନିଵୃନ୍ଦହୃଦିସ୍ଥପଦଂ ସୁପଦଂ ନିଖିଲାଧ୍ଵରଭାଗଭୁଜଂ ସୁଭୁଜମ୍ ।
ହୃତଵାସଵମୁଖ୍ୟମଦଂ ଵିମଦଂ ପ୍ରଣମାମି ରମାଧିପତିଂ ତମହମ୍ ॥ ୩॥
ହୃତଦାନଵଦୃପ୍ତବଲଂ ସୁବଲଂ ସ୍ଵଜନାସ୍ତସମସ୍ତମଲଂ ଵିମଲମ୍ ।
ସମପାସ୍ତ ଗଜେନ୍ଦ୍ରଦରଂ ସୁଦରଂ ପ୍ରଣମାମି ରମାଧିପତିଂ ତମହମ୍ ॥ ୪॥
ପରିକଲ୍ପିତସର୍ଵକଲଂ ଵିକଲଂ ସକଲାଗମଗୀତଗୁଣଂ ଵିଗୁଣମ୍ ।
ଭଵପାଶନିରାକରଣଂ ଶରଣଂ ପ୍ରଣମାମି ରମାଧିପତିଂ ତମହମ୍ ॥ ୫॥
ମୃତିଜନ୍ମଜରାଶମନଂ କମନଂ ଶରଣାଗତଭୀତିହରଂ ଦହରମ୍ ।
ପରିତୁଷ୍ଟରମାହୃଦୟଂ ସୁଦୟଂ ପ୍ରଣମାମି ରମାଧିପତିଂ ତମହମ୍ ॥ ୬॥
ସକଲାଵନିବିମ୍ବଧରଂ ସ୍ଵଧରଂ ପରିପୂରିତସର୍ଵଦିଶଂ ସୁଦୃଶମ୍ ।
ଗତଶୋକମଶୋକକରଂ ସୁକରଂ ପ୍ରଣମାମି ରମାଧିପତିଂ ତମହମ୍ ॥ ୭॥
ମଥିତାର୍ଣଵରାଜରସଂ ସରସଂ ଗ୍ରଥିତାଖିଲଲୋକହୃଦଂ ସୁହୃଦମ୍ ।
ପ୍ରଥିତାଦ୍ଭୁତଶକ୍ତିଗଣଂ ସୁଗଣଂ ପ୍ରଣମାମି ରମାଧିପତିଂ ତମହମ୍ ॥ ୮॥
ସୁଖରାଶିକରଂ ଭଵବନ୍ଧହରଂ ପରମାଷ୍ଟକମେତଦନନ୍ୟମତିଃ ।
ପଠତୀହ ତୁ ୟୋଽନିଶମେଵ ନରୋ ଲଭତେ ଖଲୁ ଵିଷ୍ଣୁପଦଂ ସ ପରମ୍ ॥ ୯॥
ଇତି ଶ୍ରୀପରମହଂସସ୍ଵାମିବ୍ରହ୍ମାନନ୍ଦଵିରଚିତଂ ଶ୍ରୀରମାପତ୍ୟଷ୍ଟକଂ ସମ୍ପୂର୍ଣମ୍ ॥
