శ్రీదేవరాజాష్టకమ్ Lyrics in Telugu:
దేవరాజాష్టకమ్
(కాఞ్చ్యాం వరదరాజ క్షేత్రే)
నమస్తే హస్తిశైలేశ శ్రీమన్నమ్బుజలోచన ।
శరణం త్వాం ప్రపన్నోఽస్మి ప్రణతార్తిహరాచ్యుత ॥ ౧॥
సమస్తప్రాణిసన్త్రాణప్రవీణకరుణోల్బణాః ।
విలసన్తు కటాక్షాస్తే మయ్యస్మిన్ జగతాం పతే ॥ ౨॥
నిన్దితాచారకరణం నివృత్తం కృత్యకర్మణః ।
పాపీయాంసమమర్యాదం పాహి మాం వరద ప్రభో ॥ ౩॥
సంసారమరుకాన్తారే దుర్వ్యాధివ్యాఘ్రభీషిణే ।
విషయక్షుద్రగుల్మాఢ్యే తృషాపాదపశాలిని ॥ ౪॥
పుత్రదారగృహక్షేత్రమృగతృష్ణామ్బుపుష్కలే ।
కృత్యాకృత్యవివేకాన్ధం పరిభ్రాన్తమితస్తతః ॥ ౫॥
అజస్రం జాతతృష్ణార్తమవసన్నాఙ్గమక్షమమ్ ।
క్షీణశక్తిబలారోగ్యం కేవలం క్లేశసంశ్రయమ్ ॥ ౬॥
సన్తప్తం వివిధైర్దుఃఖైర్దుర్వచైరేవమాదిభిః ।
దేవరాజ దయాసిన్ధో దేవదేవ జగత్పతే ॥ ౭॥
త్వదీక్షణసుధాసిన్ధువీచివిక్షేపశీకరైః ।
కారుణ్యమారుతానీతైశ్శీతలైరభిషిఞ్చ మామ్ ॥ ౮॥
ఇతి శ్రీకాఞ్చీపూర్ణవిరచితం దేవరాజాష్టకం సమ్పూర్ణమ్ ।
