ശ്രീദീനബന്ധ്വഷ്ടകം Lyrics in Malayalam:
യസ്മാദിദം ജഗദുദേതി ചതുര്‍മുഖാദ്യം യസ്മിന്നവസ്ഥിതമശേഷമശേഷമൂലേ ।
യത്രോപയാതി വിലയം ച സമസ്തമന്തേ ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 1॥
ചക്രം സഹസ്രകരചാരു കരാരവിന്ദേ ഗുര്‍വീ ഗദാ ദരവരശ്ച വിഭാതി യസ്യ ।
പക്ഷീന്ദ്രപൃഷ്ഠപരിരോപിതപാദപദ്മോ ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 2॥
യേനോദ്ധൃതാ വസുമതീ സലിലേ നിമഗ്നാ നഗ്നാ ച പാണ്ഡവവധൂഃ സ്ഥഗിതാ ദുകൂലൈഃ ।
സമ്മോചിതോ ജലചരസ്യ മുഖാദ്ഗജേന്ദ്രോ ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 3॥
യസ്യാര്‍ദ്രദൃഷ്ടിവശതസ്തു സുരാഃ സമൃദ്ധിം കോപേക്ഷണേന ദനുജാ വിലയം വ്രജന്തി ।
ഭീതാശ്ചരന്തി ച യതോഽര്‍കയമാനിലാദ്യാഃ ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 4॥
ഗായന്തി സാമകുശലാ യമജം മഖേഷു ധ്യായന്തി ധീരമതയോ യതയോ വിവിക്തേ ।
പശ്യന്തി യോഗിപുരുഷാഃ പുരുഷം ശരീരേ ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 5॥
ആകാരരൂപഗുണയോഗവിവര്‍ജിതോഽപി ഭക്താനുകമ്പനനിമിത്തഗൃഹീതമൂര്‍തിഃ ।
യഃ സര്‍വഗോഽപി കൃതശേഷശരീരശയ്യോ ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 6॥
യസ്യാങ്ഘ്രിപങ്കജമനിദ്രമുനീന്ദ്രവൃന്ദൈ- രാരാധ്യതേ ഭവദവാനലദാഹശാന്ത്യൈ ।
സര്‍വാപരാധമവിചിന്ത്യ മമാഖിലാത്മാ ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 7॥
യന്നാമകീര്‍തനപരഃ ശ്വപചോഽപി നൂനം ഹിത്വാഖിലം കലിമലം ഭുവനം പുനാതി ।
ദഗ്ധ്വാ മമാഘമഖിലം കരുണേക്ഷണേന ദൃഗ്ഗോചരോ ഭവതു മേഽദ്യ സ ദീനബന്ധുഃ ॥ 8॥
ദീനബന്ധ്വഷ്ടകം പുണ്യം ബ്രഹ്മാനന്ദേന ഭാഷിതം ।
യഃ പഠേത് പ്രയതോ നിത്യം തസ്യ വിഷ്ണുഃ പ്രസീദതി ॥ 9॥
ഇതി ശ്രീപരമഹംസസ്വാമിബ്രഹ്മാനന്ദവിരചിതം ശ്രീദീനബന്ധ്വഷ്ടകം സമ്പൂര്‍ണം॥
