ಶ್ರೀಗಾನ್ಧರ್ವಾಸಂಪ್ರಾರ್ಥನಾಷ್ಟಕಮ್ Lyrics in Kannada:
ಶ್ರೀಗಾನ್ಧರ್ವಾಸಂಪ್ರಾರ್ಥನಾಷ್ಟಕಮ್
ಶ್ರೀಶ್ರೀಗಾನ್ಧರ್ವಿಕಾಯೈ ನಮಃ ।
ವೃನ್ದಾವನೇ ವಿಹರತೋರಿಹ ಕಿಲೇಕುಂಜೇ
ಮತ್ತದ್ವಿಪಪ್ರವರಕೌತುಕವಿಭ್ರಮೇಣ ।
ಸನ್ದರ್ಶಯಸ್ವ ಯುವಯೋರ್ವದನಾರವಿನ್ದ
ದ್ವನ್ದ್ವಂ ವಿಧೇಹಿ ಮಯಿ ದೇವಿ ಕೃಪಾಂ ಪ್ರಸೀದ ॥ 1॥
ಹಾ ದೇವಿ ಕಾಕುಭರಗದ್ಗದಯಾದ್ಯ ವಾಚಾ
ಯಾಚೇ ನಿಪತ್ಯ ಭುವಿ ದಂಡವದುದ್ಭಟಾರ್ತಿಃ ।
ಅಸ್ಯ ಪ್ರಸಾದಮಬುಧಸ್ಯ ಜನಸ್ಯ ಕೃತ್ವಾ
ಗಾನ್ಧರ್ವಿಕೇ ನಿಜಗಣೇ ಗಣನಾಂ ವಿಧೇಹಿ ॥ 2॥
ಶ್ಯಾಮೇ ರಮಾರಮಣಸುನ್ದರತಾವರಿಷ್ಠ
ಸೌನ್ದರ್ಯಮೋಹಿತಸಮಸ್ತಜಗಜ್ಜನಸ್ಯ ।
ಶ್ಯಾಮಸ್ಯ ವಾಮಭುಜಬದ್ಧತನುಂ ಕದಾಹಂ
ತ್ವಾಮಿನ್ದಿರಾವಿರಲರೂಪಭರಾಂ ಭಜಾಮಿ ॥ 3॥
ತ್ವಾಂ ಪ್ರಚ್ಛದೇನ ಮುದಿರಚ್ಛವಿನಾ ಪಿಧಾಯ
ಮಂಜೀರಮುಕ್ತಚರಣಾಂ ಚ ವಿಧಾಯ ದೇವಿ ।
ಕುಂಜೇ ವ್ರಜೇನ್ದ್ರತನಯೇನ ವಿರಾಜಮಾನೇ
ನಕ್ತಂ ಕದಾ ಪ್ರಮುದಿತಾಮಭಿಸಾರಯಿಷ್ಯೇ ॥ 4॥
ಕುಂಜೇ ಪ್ರಸೂನಕುಲಕಲ್ಪಿತಕೇಲಿತಲ್ಪೇ
ಸಂವಿಷ್ಟಯೋರ್ಮಧುರನರ್ಮವಿಲಾಸಭಾಜೋಃ ।
ಲೋಕತ್ರಯಾಭರಣಯೋಶ್ಚರಣಾಮ್ಬುಜಾನಿ
ಸಂವಾಹಯಿಷ್ಯತಿ ಕದಾ ಯುವಯೋರ್ಜನೋಽಯಮ್ ॥ 5॥
ತ್ವತ್ಕುಂಡರೋಧಸಿ ವಿಲಾಸಪರಿಶ್ರಮೇಣ
ಸ್ವೇದಾಮ್ಬುಚುಮ್ಬಿವದನಾಮ್ಬುರುಹಶ್ರಿಯೋ ವಾಮ್ ।
ವೃನ್ದಾವನೇಶ್ವರಿ ಕದಾ ತರುಮೂಲಭಾಜೋ
ಸಂವೀಜಯಾಮಿ ಚಮರೀಚಯಚಾಮರೇಣ ॥ 6॥
ಲೀನಾಂ ನಿಕುಂಜಕುಹರೇ ಭವತೀಂ ಮುಕುನ್ದೇ
ಚಿತ್ರೈವ ಸೂಚಿತವತೀಂ ರುಚಿರಾಕ್ಷಿ ನಾಹಮ್ ।
ಭುಗ್ನಾಂ ಭ್ರುವಂ ನ ರಚಯೇತಿ ಮೃಷಾರುಷಾಂ ತ್ವಾಂ
ಅಗ್ರೇ ವ್ರಜೇನ್ದ್ರತನಯಸ್ಯ ಕದಾ ನು ನೇಷ್ಯೇ ॥ 7॥
ವಾಗ್ಯುದ್ಧಕೇಲಿಕುತುಕೇ ವ್ರಜರಾಜಸೂನುಂ
ಜಿತ್ವೋನ್ಮದಾಮಧಿಕದರ್ಪವಿಕಾಸಿಜಲ್ಪಾಮ್ ।
ಫುಲ್ಲಾಭಿರಾಲಿಭಿರನಲ್ಪಮುದೀರ್ಯಮಾಣ
ಸ್ತೋತ್ರಾಂ ಕದಾ ನು ಭವತೀಮವಲೋಕಯಿಷ್ಯೇ ॥ 8॥
ಯಃ ಕೋಽಪಿ ಸುಷ್ಠು ವೃಷಭಾನುಕುಮಾರಿಕಾಯಾಃ
ಸಂಪ್ರಾರ್ಥನಾಷ್ಟಕಮಿದಂ ಪಠತಿ ಪ್ರಪನ್ನಃ ।
ಸಾ ಪ್ರೇಯಸಾ ಸಹ ಸಮೇತ್ಯ ಧೃತಪ್ರಮೋದಾ
ತತ್ರ ಪ್ರಸಾದಲಹರೀಮುರರೀಕರೋತಿ ॥ 9॥
ಇತಿ ಶ್ರೀರೂಪಗೋಸ್ವಾಮಿವಿರಚಿತಸ್ತವಮಾಲಾಯಾಂ
ಶ್ರೀಗಾನ್ಧರ್ವಾಸಂಪ್ರಾರ್ಥನಾಷ್ಟಕಂ ಸಮ್ಪೂರ್ಣಮ್ ।
