శ్రీగాన్ధర్వాసంప్రార్థనాష్టకమ్ Lyrics in Telugu:
శ్రీగాన్ధర్వాసంప్రార్థనాష్టకమ్
శ్రీశ్రీగాన్ధర్వికాయై నమః ।
వృన్దావనే విహరతోరిహ కిలేకుఞ్జే
మత్తద్విపప్రవరకౌతుకవిభ్రమేణ ।
సన్దర్శయస్వ యువయోర్వదనారవిన్ద
ద్వన్ద్వం విధేహి మయి దేవి కృపాం ప్రసీద ॥ ౧॥
హా దేవి కాకుభరగద్గదయాద్య వాచా
యాచే నిపత్య భువి దణ్డవదుద్భటార్తిః ।
అస్య ప్రసాదమబుధస్య జనస్య కృత్వా
గాన్ధర్వికే నిజగణే గణనాం విధేహి ॥ ౨॥
శ్యామే రమారమణసున్దరతావరిష్ఠ
సౌన్దర్యమోహితసమస్తజగజ్జనస్య ।
శ్యామస్య వామభుజబద్ధతనుం కదాహం
త్వామిన్దిరావిరలరూపభరాం భజామి ॥ ౩॥
త్వాం ప్రచ్ఛదేన ముదిరచ్ఛవినా పిధాయ
మఞ్జీరముక్తచరణాం చ విధాయ దేవి ।
కుఞ్జే వ్రజేన్ద్రతనయేన విరాజమానే
నక్తం కదా ప్రముదితామభిసారయిష్యే ॥ ౪॥
కుఞ్జే ప్రసూనకులకల్పితకేలితల్పే
సంవిష్టయోర్మధురనర్మవిలాసభాజోః ।
లోకత్రయాభరణయోశ్చరణామ్బుజాని
సంవాహయిష్యతి కదా యువయోర్జనోఽయమ్ ॥ ౫॥
త్వత్కుణ్డరోధసి విలాసపరిశ్రమేణ
స్వేదామ్బుచుమ్బివదనామ్బురుహశ్రియో వామ్ ।
వృన్దావనేశ్వరి కదా తరుమూలభాజో
సంవీజయామి చమరీచయచామరేణ ॥ ౬॥
లీనాం నికుఞ్జకుహరే భవతీం ముకున్దే
చిత్రైవ సూచితవతీం రుచిరాక్షి నాహమ్ ।
భుగ్నాం భ్రువం న రచయేతి మృషారుషాం త్వాం
అగ్రే వ్రజేన్ద్రతనయస్య కదా ను నేష్యే ॥ ౭॥
వాగ్యుద్ధకేలికుతుకే వ్రజరాజసూనుం
జిత్వోన్మదామధికదర్పవికాసిజల్పామ్ ।
ఫుల్లాభిరాలిభిరనల్పముదీర్యమాణ
స్తోత్రాం కదా ను భవతీమవలోకయిష్యే ॥ ౮॥
యః కోఽపి సుష్ఠు వృషభానుకుమారికాయాః
సంప్రార్థనాష్టకమిదం పఠతి ప్రపన్నః ।
సా ప్రేయసా సహ సమేత్య ధృతప్రమోదా
తత్ర ప్రసాదలహరీమురరీకరోతి ॥ ౯॥
ఇతి శ్రీరూపగోస్వామివిరచితస్తవమాలాయాం
శ్రీగాన్ధర్వాసంప్రార్థనాష్టకం సమ్పూర్ణమ్ ।
