શ્રીગોપાલદેવાષ્ટકમ્ Lyrics in Gujarati:
મધુરમૃદુલચિત્તઃ પ્રેમમાત્રૈકવિત્તઃ
સ્વજનરચિતવેષઃ પ્રાપ્તશોભાવિશેષઃ ।
વિવિધમણિમયાલઙ્કારવાન્ સર્વકાલં
સ્ફુરતુ હૃદિ સ એવ શ્રીલગોપાલદેવઃ ॥ ૧॥
નિરુપમગુણરૂપઃ સર્વમાધુર્યભૂપઃ
શ્રિતતનુરુચિદાસ્યઃ કોટિચન્દ્રસ્તુતાસ્યઃ ।
અમૃતવિજયિહાસ્યઃ પ્રોચ્છલચ્ચિલ્લિલાસ્યઃ
સ્ફુરતુ હૃદિ સ એવ શ્રીલગોપાલદેવઃ ॥ ૨॥
ધૃતનવપરભાગઃ સવ્યહસ્તસ્થિતાગઃ
પ્રકટિતનિજકક્ષઃ પ્રાપ્તલાવણ્યલક્ષઃ ।
કૃતનિજજનરક્ષઃ પ્રેમવિસ્તારદક્ષઃ
સ્ફુરતુ હૃદિ સ એવ શ્રીલગોપાલદેવઃ ॥ ૩॥
ક્રમવલદનુરાગસ્વપ્રિયાપાઙ્ગભાગ
ધ્વનિતરસવિલાસજ્ઞાનવિજ્ઞાપિહાસઃ ।
સ્મૃતરતિપતિયાગઃ પ્રીતિહંસીતડાગઃ
સ્ફુરતુ હૃદિ સ એવ શ્રીલગોપાલદેવઃ ॥ ૪॥
મધુરિમભરમગ્ને ભાત્યસવ્યેઽવલગ્ને
ત્રિવલિરલસવત્ત્વાત્યસ્ય પુષ્ટાનતત્વાત્ ।
ઇતરત ઇહ તસ્યા મારરેખેવ રસ્યા
સ્ફુરતુ હૃદિ સ એવ શ્રીલગોપાલદેવઃ ॥ ૫॥
વહતિ વલિતહર્ષં વાહયંશ્ચાનુવર્ષં
ભજતિ ચ સગણં સ્વં ભોજયન્ યોઽર્પયન્ સ્વમ્ ।
ગિરિમુકુટમણિં શ્રીદામવન્મિત્રતાશ્રીઃ
સ્ફુરતુ હૃદિ સ એવ શ્રીલગોપાલદેવઃ ॥ ૬॥
અધિધરમનુરાગં માધવેન્દ્રસ્ય તન્વં-
સ્તદમલહૃદયોત્થાં પ્રેમસેવાં વિવૃણ્વન્ ।
પ્રકટિતનિજશક્ત્યા વલ્લભાચાર્યભક્ત્યા
સ્ફુરતુ હૃદિ સ એવ શ્રીલગોપાલદેવઃ ॥ ૭॥
પ્રતિદિનમધુનાપિ પ્રેક્ષ્યતે સર્વદાપિ
પ્રણયસુરસચર્યા યસ્ય વર્યા સપર્યા ।
ગણયતુ કતિ ભોગાન્ કઃ કૃતી તત્પ્રયોગાન્
સ્ફુરતુ હૃદિ સ એવ શ્રીલગોપાલદેવઃ ॥ ૮॥
ગિરિધરવરદેવસ્યાષ્ટકેનેમમેવ
સ્મરતિ નિશિ દિને વા યો ગૃહે વા વને વા ।
અકુટિલહૃદયસ્ય પ્રેમદત્વેન તસ્ય
સ્ફુરતુ હૃદિ સ એવ શ્રીલગોપાલદેવઃ ॥ ૯॥
ઇતિ શ્રીવિશ્વનાથચક્રવર્તિઠક્કુરવિરચિતસ્તવામૃતલહર્યાં
શ્રીગોપાલદેવાષ્ટકં સમ્પૂર્ણમ્ ।
