ശ്രീഗോവര്‍ധനാഷ്ടകം 2 Lyrics in Malayalam:
ദ്വിതീയം ഗോവര്‍ധനാഷ്ടകം
ശ്രീഗോവര്‍ധനായ നമഃ ।
നീലസ്തംഭോജ്ജ്വലരുചിഭരൈര്‍മണ്ഡിതേ ബാഹുദണ്ഡേ
ഛത്രച്ഛായാം ദധദഘരിപോര്ലബ്ധസപ്താഹവാസഃ ।
ധാരാപാതഗ്ലപിതമനസാം രക്ഷിതാ ഗോകുലാനാം
കൃഷ്ണപ്രേയാന്‍ പ്രഥയതു സദാ ശര്‍മ ഗോവര്‍ധനോ നഃ ॥ 1॥
ഭീതോ യസ്മാദപരിഗണയന്‍ ബാന്ധവസ്നേഹബന്ധാന്‍
സിന്ധാവദ്രിസ്ത്വരിതമവിശത് പാര്‍വതീപൂര്‍വജോഽപി ।
യസ്തം ജംഭുദ്വിഷമകുരുത സ്തംഭസംഭേദശൂന്യം
സ പ്രൌഢാത്മാ പ്രഥയതു സദാ ശര്‍മ ഗോവര്‍ധനോ നഃ ॥ 2॥
ആവിഷ്കൃത്യ പ്രകടമുകുടാടോപമങ്ഗം സ്ഥവീയഃ
ശൈലോഽസ്മീതി സ്ഫുടമഭിദധത് തുഷ്ടിവിസ്ഫാരദൃഷ്ടിഃ ।
യസ്മൈ കൃഷ്ണഃ സ്വയമരസയദ് വല്ലവൈര്‍ദത്തമന്നം
ധന്യഃ സോഽയം പ്രഥയതു സദാ ശര്‍മ ഗോവര്‍ധനോ നഃ ॥ 3॥
അദ്യാപ്യൂര്‍ജപ്രതിപദി മഹാന്‍ ഭ്രാജതേ യസ്യ യജ്ഞഃ
കൃഷ്ണോപജ്ഞം ജഗതി സുരഭീസൈരിഭീക്രീഡയാഢ്യഃ ।
ശഷ്പാലംബോത്തമതടയാ യഃ കുടുംബം പശൂനാം
സോഽയം ഭൂയഃ പ്രഥയതു സദാ ശര്‍മ ഗോവര്‍ധനോ നഃ ॥ 4॥
ശ്രീഗാന്ധര്‍വാദയിതസരസീപദ്മസൌരഭ്യരത്നം
ഹൃത്വാ ശങ്കോത്കരപരവശൈരസ്വനം സഞ്ചരദ്ഭിഃ ।
അംഭഃക്ഷോദപ്രഹരികകുലേനാകുലേനാനുയാതൈ-
ര്‍വാതൈര്‍ജുഷ്ടൈഃ പ്രഥയതു സദാ ശര്‍മ ഗോവര്‍ധനോ നഃ ॥ 5॥
കംസാരാതേസ്തരിവിലസിതൈരാതരാനങ്ഗരങ്ഗൈ-
രാഭീരീണാം പ്രണയമഭിതഃ പാത്രമുന്‍മീലയന്ത്യാഃ ।
ധൌതഗ്രാവാവലിരമലിനൈര്‍മാനസാമര്‍ത്യസിന്ധോ-
ര്‍വീചിവ്രാതൈഃ പ്രഥയതു സദാ ശര്‍മ ഗോവര്‍ധനോ നഃ ॥ 6॥
യസ്യാധ്യക്ഷഃ സകലഹഠിനാമാദദേ ചക്രവര്‍തീ
ശുല്‍കം നാന്യദ് വ്രജമൃഗദൃശാമര്‍പണാദ് വിഗ്രഹസ്യ ।
ഘട്ടസ്യോച്ചൈര്‍മധുകരരുചസ്തസ്യ ധാമപ്രപഞ്ചൈഃ
ശ്യാമപ്രസ്ഥഃ പ്രഥയതു സദാ ശര്‍മ ഗോവര്‍ധനോ നഃ ॥ 7॥
ഗാന്ധര്‍വായാഃ സുരതകലഹോദ്ദാമതാവാവദൂകൈഃ
ക്ലാന്തശ്രോത്രോത്പലവലയിഭിഃ ക്ഷിപ്തപിഞ്ഛാവതംസൈഃ ।
കുഞ്ജൈസ്തല്‍പോപരി പരിലുഠദ്വൈജയന്തീപരീതൈഃ
പുണ്യാങ്ഗശ്രീഃ പ്രഥയതു സദാ ശര്‍മ ഗോവര്‍ധനോ നഃ ॥ 8॥
യസ്തുഷ്ടാത്മാ സ്ഫുടമനുപഠേച്ഛ്രദ്ധയാ ശുദ്ധയാന്ത-
ര്‍മേധ്യഃ പദ്യാഷ്ടകമചടുലഃ സുഷ്ഠു ഗോവര്‍ധനസ്യ ।
സാന്ദ്രം ഗോവര്‍ധനധരപദദ്വന്ദ്വശോണാരവിന്ദേ
വിന്ദന്‍ പ്രേമോത്കരമിഹ കരോത്യദ്രിരാജേ സ വാസം ॥ 9॥
ഇതി ശ്രീരൂപഗോസ്വാമിവിരചിതസ്തവമാലായാം ശ്രീഗിരീന്ദ്രവാസാനന്ദദം
നാമ ദ്വിതീയം ശ്രീഗോവര്‍ധനാഷ്ടകം സമ്പൂര്‍ണം ।