శ్రీకాలభైరవాష్టకమ్ Lyrics in Telugu:
అఙ్గసున్దరత్వనిన్దితాఙ్గజాతవైభవం
భృఙ్గసర్వగర్వహారిదేహకాన్తిశోభితమ్ ।
మఙ్గలౌఘదానదక్షపాదపద్మసంస్మృతిం
శృఙ్గశైలవాసినం నమామి కాలభైరవమ్ ॥ ౧॥
పాదనమ్రమూకలోకవాక్ప్రదానదీక్షితం
వేదవేద్యమీశమోదవార్ధిశుభ్రదీధితిమ్ ।
ఆదరేణ దేవతాభిరర్చితాఙ్ఘ్రిపఙ్కజం
శృఙ్గశైలవాసినం నమామి కాలభైరవమ్ ॥ ౨॥
అమ్బుజాక్షమిన్దువక్త్రమిన్దిరేశనాయకం
కమ్బుకణ్ఠమిష్టదానధూతకల్పపాదపమ్ ।
అమ్బరాదిభూతరూపమమ్బరాయితామ్బరం
శృఙ్గశైలవాసినం నమామి కాలభైరవమ్ ॥ ౩॥
మన్దభాగ్యమప్యరం సురేన్ద్రతుల్యవైభవం
సున్దరం చ కామతోఽపి సంవిధాయ సన్తతమ్ ।
పాలయన్తమాత్మజాతమాదరాత్పితా యథా
శృఙ్గశైలవాసినం నమామి కాలభైరవమ్ ॥ ౪॥
నమ్రకష్టనాశదక్షమష్టసిద్ధిదాయకం
కమ్రహాసశోభితుణ్డమచ్ఛగణ్డదర్పణమ్ ।
కున్దపుష్పమానచోరదన్తకాన్తిభాసురం
శృఙ్గశైలవాసినం నమామి కాలభైరవమ్ ॥ ౫॥
కాశికాదిదివ్యదేశవాసలోలమానసం
పాశివాయుకిన్నరేశముఖ్యదిగ్ధవార్చితమ్ ।
నాశితాఘవృన్దమఙ్ఘ్రినమ్రలోకయోగదం
శృఙ్గశైలవాసినం నమామి కాలభైరవమ్ ॥ ౬॥
సారమాగమస్య తుఙ్గసారమేయవాహనం
దారితాన్తరాన్ధ్యమాశు నైజమన్త్రజాపినామ్ ।
పూరితాఖిలేష్టమష్టమూర్తిదేహసమ్భవం
శృఙ్గశైలవాసినం నమామి కాలభైరవమ్ ॥ ౭॥
కాలభీతివారణం కపాలపాణిశోభితం
ఖణ్డితామరారిమిన్దుబాలశోభిమస్తకమ్ ।
చణ్డబుద్ధిదానదక్షమక్షతాత్మశాసనం
శృఙ్గశైలవాసినం నమామి కాలభైరవమ్ ॥ ౮॥
ఇతి శృఙ్గేరి శ్రీజగద్గురు శ్రీసచ్చిదానన్దశివాభినవనృసింహ-
భారతీస్వామిభిః విరచితం శ్రీకాలభైరవాష్టకం సమ్పూర్ణమ్ ।
