ശ്രീകാന്തിമതീശ്വര്യഷ്ടകം Lyrics in Malayalam:
॥ ശ്രീഃ ॥
ശ്രീമദ്വേണുവനേശ്വരസ്യ രമണീം ശീതാംശുബിംബാനനാം
ശിഞ്ജന്നൂപുരകോമലാങ്ഘ്രികമലാം കേയൂരഹാരാന്വിതാം ।
രത്നസ്യൂതകിരീടകുണ്ഡലധരാം ഹേലാവിനോദപ്രിയാം
ശ്രീമത്കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 1॥
തത്ത്വജ്ഞാനിഹൃദബ്ജമധ്യനിലയാം താംരാപഗാതീരഗാം
കാരുണ്യാംബുനിധിം തഡിത്തുലിതഭാം താലീദലശ്യാമലാം ।
ലീലാസൃഷ്ടിവിധായിനീം തനുഭൃതാം താത്പര്യബോധാപ്തയേ
തന്വീം കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 2॥
സങ്ഗീതാമൃതസിന്ധുമധ്യഭവനാം സാഹിത്യനിത്യാദരാം
സ്വാരസ്യാദ്ഭുതനാട്യവീക്ഷണപരാം സാലോക്യമുക്ത്യാദിദാം ।
സാധുഭ്യഃ സകലാമരാര്‍ഥിതമഹാസാംരാജ്യലക്ഷ്മീപ്രദാം
സാധ്വീം കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 3॥
കല്യാണീമഖിലാണ്ഡകോടിജനനീം കല്‍ഹാരദാമോജ്ജ്വലാം
കസ്തൂരീതിലകാഭിരാമനിടിലാം കഞ്ജാസനാരാധിതാം ।
കാമാരേഃകനകാചലേന്ദ്രധനുഷഃ കാരുണ്യവാരാന്നിധേഃ
കാന്താം കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 4॥
ഭക്താനാം ഭയജാലഭഞ്ജനകരീം ഭാന്വബ്ജശുക്രേക്ഷണാം
ഭാഗ്യോദാരഗുണാന്വിതാം ഭഗവതീം ഭണ്ഡാസുരധ്വംസിനീം ।
ഭാസ്വദ്രത്നകിരീടകുണ്ഡലധരാം ഭദ്രാസനാധ്യാസിനീം
ഭവ്യാം കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 5॥
ദേവാനാമഭയപ്രദാം വിധിനുതാം ദുഷ്ടാപഹന്ത്രീം സുഖാം
ദേശാനേകദിഗന്തമധ്യനിലയാം ദേഹാര്‍ധദാസ്യപ്രിയാം ।
മാധുര്യാകരചന്ദ്രഖണ്ഡമകുടാം ദേവാങ്ഗനാസേവിതാം
ദേവീം കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 6॥
ദുഷ്ടാടോപവിനാശനൈകനിപുണാം ദൌര്‍ഭാഗ്യവിച്ഛേദിനീം
ദുര്‍മാത്സര്യമദാഭിമാനമഥിനീം ദുഃഖാപഹാം പ്രാണിനാം ।
ദുര്‍വാരാമിതദൈത്യഭഞ്ജനകരീം ദുഃസ്വപ്നഹന്ത്രീം ശിവാം
ദുര്‍ഗാം കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 7॥
മന്ദസ്മേരമുഖാംബുജാം മരകതശ്യാമാം മഹാവൈഭവാം
മാതങ്ഗീം മഹിഷാസുരസ്യ ശമനീം മാതങ്ഗകുംഭസ്തനീം ।
മന്ദാരദ്രുമസന്നിഭാം സുമധുരാം സിംഹാസനാധ്യാസിതാം
മാന്യാം കാന്തിമതീശ്വരീം ഹൃദി ഭജേ ശ്രീരാജരാജേശ്വരീം ॥ 8॥
ഇതി ശൃങ്ഗേരി ശ്രീജഗദ്ഗുരു ശ്രീസച്ചിദാനന്ദശിവാഭിനവനൃസിംഹ-
ഭാരതീസ്വാമിഭിഃ വിരചിതം ശ്രീകാന്തിമതീശ്വര്യഷ്ടകം സമ്പൂര്‍ണം ।