ଶ୍ରୀମାତୃପଦପଙ୍କଜାଷ୍ଟକମ୍ Lyrics in Oriya:
ମାତସ୍ତ୍ଵତ୍ପଦପଙ୍କଜଂ କଲ୍ୟତାଂ ଚେତୋଽମ୍ବୁଜେ ସନ୍ତତଂ
ମାନାଥାମ୍ବୁଜସମ୍ଭଵାଦ୍ରିତନୟାକାନ୍ତୈଃ ସମାରାଧିତମ୍ ।
ଵାଞ୍ଛାପୂରଣନିର୍ଜିତାମରମହୀରୁଡ୍ଗର୍ଵସର୍ଵସ୍ଵକମ୍
ଵାଚଃ ସୂକ୍ତିସୁଧାରସଦ୍ରଵମୁଚୋ ନିର୍ୟାନ୍ତି ଵକ୍ତ୍ରୋଦରାତ୍ ॥ ୧॥
ମାତସ୍ତ୍ଵତ୍ପଦପଙ୍କଜଂ ମୁନିମନଃକାସାରଵାସାଦରଂ
ମାୟାମୋହମହାନ୍ଧକାରମିହିରଂ ମାନାତିଗପ୍ରାଭଵମ୍ ।
ମାତଙ୍ଗାଭିମତିଂ ସ୍ଵକୀୟଗମନୈର୍ନିର୍ମୂଲୟତ୍କୌତୁକା-
ଦ୍ଵନ୍ଦେଽମନ୍ଦତପଃଫଲାପ୍ୟନମନସ୍ତୋତ୍ରାର୍ଚନାପ୍ରକ୍ରମମ୍ ॥ ୨॥
ମାତସ୍ତ୍ଵତ୍ପଦପଙ୍କଜଂ ପ୍ରଣମତାମାନନ୍ଦଵାରାନ୍ନିଧେ
ରାକାଶାରଦପୂର୍ଣଚନ୍ଦ୍ରନିକରଂ କାମାହିପକ୍ଷୀଶ୍ଵରମ୍ ।
ଵୃନ୍ଦଂ ପ୍ରାଣଭୃତାଂ ସ୍ଵନାମ ଵଦତାମତ୍ୟାଦରାତ୍ସତ୍ଵରଂ
ଷଦ୍ଭାଷାସରିଦୀଶ୍ଵରଂ ପ୍ରତିଦଧତ୍ଷାଣ୍ମାତୁରାର୍ଚ୍ୟଂ ଭଜେ ॥ ୩॥
କାମଂ ଫାଲତଲେ ଦୁରକ୍ଷରତତିର୍ଦୈଵୀ ମମାସ୍ତାଂ ନ ଭୀ-
ର୍ମାତସ୍ତ୍ଵତ୍ପଦପଙ୍କଜୋତ୍ଥରଜସା ଲୁମ୍ପାମି ତାଂ ନିଶ୍ଚିତମ୍ ।
ମାର୍କଣ୍ଡେୟମୁନିର୍ୟଥା ଭଵପଦାମ୍ଭୋଜାର୍ଚନାପ୍ରାଭଵାତ୍
କାଲଂ ତଦ୍ଵଦହଂ ଚତୁର୍ମୁଖମୁଖାମ୍ଭୋଜାତସୂର୍ୟପ୍ରଭେ ॥ ୪॥
ପାପାନି ପ୍ରଶମଂ ନୟାଶୁ ମମତାଂ ଦେହେନ୍ଦ୍ରିୟପ୍ରାଣଗାଂ
କାମାଦୀନପି ଵୈରିଣୋ ଦୃଢତରାନ୍ମୋକ୍ଷାଧ୍ଵଵିଘ୍ନପ୍ରଦାନ୍ ।
ସ୍ନିଗ୍ଧାନ୍ପୋଷୟ ସନ୍ତତଂ ଶମଦମଧ୍ୟାନାଦିମାନ୍ମୋଦତୋ
ମାତସ୍ତ୍ଵତ୍ପଦପଙ୍କଜଂ ହୃଦି ସଦା କୁର୍ଵେ ଗିରାଂ ଦେଵତେ ॥ ୫॥
ମାତସ୍ତ୍ଵତ୍ପଦପଙ୍କଜସ୍ୟ ମନସା ଵାଚା କ୍ରିୟାତୋଽପି ଵା
ୟେ କୁର୍ଵନ୍ତି ମୁଦାନ୍ଵହଂ ବହୁଵିଧୈର୍ଦିଵ୍ୟୈଃ ସୁମୈରର୍ଚନାମ୍ ।
ଶୀଘ୍ରଂ ତେ ପ୍ରଭଵନ୍ତି ଭୂମିପତୟୋ ନିନ୍ଦନ୍ତି ଚ ସ୍ଵଶ୍ରିୟା
ଜମ୍ଭାରାତିମପି ଧ୍ରୁଵଂ ଶତମଖୀକଷ୍ଟାପ୍ତନାକଶ୍ରିୟମ୍ ॥ ୬॥
ମାତସ୍ତ୍ଵତ୍ପଦପକଜଂ ଶିରସି ୟେ ପଦ୍ମାଟଵୀମଧ୍ୟତ-
ଶ୍ଚନ୍ଦ୍ରାଭଂ ପ୍ରଵିଚିନ୍ତୟନ୍ତି ପୁରୁଷାଃ ପୀୟୂଷଵର୍ଷ୍ୟନ୍ୟହମ୍ ।
ତେ ମୃତ୍ୟୁଂ ପ୍ରଵିଜିତ୍ୟ ରୋଗରହିତାଃ ସମ୍ୟଗ୍ଦୃଢାଙ୍ଗାଶ୍ଚିରଂ
ଜୀଵନ୍ତ୍ୟେଵ ମୃଣାଲକୋମଲଵପୁଷ୍ମନ୍ତଃ ସୁରୂପା ଭୁଵି ॥ ୭॥
ମାତସ୍ତ୍ଵତ୍ପଦପଙ୍କଜଂ ହୃଦି ମୁଦା ଧ୍ୟାୟନ୍ତି ୟେ ମାନଵାଃ
ସଚ୍ଚିଦ୍ରୂପମଶେଷଵେଦଶିରସାଂ ତାତ୍ପର୍ୟଗମ୍ୟଂ ମୁହୁଃ ।
ଅତ୍ୟାଗେଽପି ତନୋରଖଣ୍ଡପରମାନନ୍ଦଂ ଵହନ୍ତଃ ସଦା
ସର୍ଵଂ ଵିଶ୍ଵମିଦଂ ଵିନାଶି ତରସା ପଶ୍ୟନ୍ତି ତେ ପୂରୁଷାଃ ॥ ୮॥
ଇତି ଶୃଙ୍ଗେରି ଶ୍ରୀଜଗଦ୍ଗୁରୁ ଶ୍ରୀସଚ୍ଚିଦାନନ୍ଦଶିଵାଭିନଵନୃସିଂହ-
ଭାରତୀସ୍ଵାମିଭିଃ ଵିରଚିତଂ ଶ୍ରୀମାତୃପଦପଙ୍କଜାଷ୍ଟକଂ ସମ୍ପୂର୍ଣମ୍ ।
