ശ്രീപരമഗുരുപ്രഭുവരാഷ്ടകം Lyrics in Malayalam:
പ്രപന്നജനനീവൃതി ജ്വലതി സംസൃതിര്‍ജ്വാലയാ
യദീയനയനോദിതാതുലകൃപാതിവൃഷ്ടിര്‍ദ്രുതം ।
വിധൂയ ദവഥും കരോത്യമലഭക്തിവാപ്യൌചിതീം
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 1॥
യദാസ്യകമലോദിതാ വ്രജഭുവോ മഹിംനാം തതിഃ
ശ്രുതാ ബത വിസര്‍ജയേത്പതികലത്രപുത്രാലയാന്‍ ।
കലിന്ദതനയാതടീ വനകുടീരവാസം നയേത്
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 2॥
വ്രജാംബുജദൃശാം കഥം ഭവതി ഭാവഭൂമാ കഥം
ഭവേദനുഗതിഃ കഥം കിമിഹ സാധനം കോഽധികൃത് ।
ഇതി സ്ഫുടമവൈതി കോ യദുപദേശഭാഗ്യം വിനാ
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 3॥
തപസ്വിയതികര്‍മിണാം സദസി താര്‍കികാനാം തഥാ
പ്രതിസ്വമതവൈദുഷീപ്രകടനോഢഗര്‍വശ്രിയാം ।
വിരാജതി രവിര്യഥാ തമസി യഃ സ്വഭക്ത്യോജസാ
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 4॥
കിമദ്യ പരിധാസ്യതേ കിമഥ ഭോജ്യതേ രാധയാ
സമം മദനമോഹനോ മദനകോടിനിമജ്ജിതഃ ।
ഇതീഷ്ടവരിവസ്യയാ നയതി യോഽഷ്ടയാമാന്‍ സദാ
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 5॥
മൃദങ്ഗകരതാലികാമധുരകീര്‍തനേ നര്‍തയന്‍
ജനാന്‍ സുകൃതിനോ നടന്‍ സ്വയമപി പ്രമോദാംബുധൌ ।
നിമജ്ജതി ദൃഗംബുഭിഃപുലകസങ്കുലഃസ്നാതി യഃ
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 6॥
സമം ഭഗവതോ ജനൈഃ പ്രവരഭക്തിശാസ്ത്രോദിതം
രസം സുരസയന്‍മുഹുഃ പരിജനാംശ്ച യഃ സ്വാദയന്‍ ।
സ്വശിഷ്യശതവേഷ്ടിതോ ജയതി ചക്രവര്‍ത്യാഖ്യയാ
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 7॥
സ്ഥിതിഃ സുരസരിത്തടേ മദനമോഹനോ ജീവനം
സ്പൃഹാ രസികസങ്ഗമേ ചതുരിമാ ജനോദ്ധാരണേ ।
ഘൃണാ വിഷയിഷു ക്ഷമാ ഝടിതി യസ്യ ചാനുവ്രജേ
സ കൃഷ്ണചരണഃ പ്രഭുഃ പ്രദിശതു സ്വപാദാമൃതം ॥ 8॥
ഇദം പ്രഭുവരാഷ്ടകം പഠതി യസ്തദീയോ ജന-
സ്തദങ്ഘ്രികമലേഷ്ടധീഃ സ ഖലു രങ്ഗവത്പ്രേമഭാക് ।
വിലാസഭൃതമഞ്ജുല്യാല്യതികൃപൈകപാത്രീഭവന്‍
നികുഞ്ജനിലയാധിപാവചിരമേവ തൌ സേവതേ ॥ 9॥
ഇതി ശ്രീമദ്വിശ്വനാഥചക്രവര്‍തിവിരചിതം
ശ്രീശ്രീപരമഗുരുപ്രഭുവരാഷ്ടകം സമ്പൂര്‍ണം ।
