Ayyapa Ashtottara Shatanama Stotram in Gujarati:
॥ હરિહરાષ્ટોત્તરશતનામસ્તોત્રમ્ અથવા શ્રીહરિહરાત્મકસ્તોત્રમ્ ॥
શ્રીગણેશાય નમઃ ॥
ગોવિન્દ માધવ મુકુન્દ હરે મુરારે
શમ્ભો શિવેશ શશિશેખર શૂલપાણે ।
દામોદરાચ્યુત જનાર્દન વાસુદેવ
ત્યાજ્યા ભટા ય ઇતિ સન્તતમામનન્તિ ॥ ૧॥
ગઙ્ગાધરાન્ધકરિપો હર નીલકણ્ઠ
વૈકુણ્ઠ કૈટભરિપો કમઠાબ્જપાણે ।
ભૂતેશ ખણ્ડપરશો મૃડ ચણ્ડિકેશ
ત્યાજ્યા ભટા ય ઇતિ સન્તતમામનન્તિ ॥ ૨॥
વિષ્ણો નૃસિંહ મધુસૂદન ચક્રપાણે
ગૌરીપતે ગિરિશ શઙ્કર ચન્દ્રચૂડ ।
નારાયાણાસુરનિબર્હણ શાર્ઙ્ગપાણે
ત્યાજ્યા ભટા ય ઇતિ સન્તતમામનન્તિ ॥ ૩॥
મૃત્યુઞ્જયોગ્ર વિષમેક્ષણ કામશત્રો
શ્રીકાન્ત પીતવસનામ્બુદનીલ શૌરે ।
ઈશાન કૃત્તિવસન ત્રિદશૈકનાથ
ત્યાજ્યા ભટા ય ઇતિ સન્તતમામનન્તિ ॥ ૪॥
લક્ષ્મીપતે મધુરિપો પુરુષોત્તમાદ્ય
શ્રીકણ્ઠ દિગ્વસન શાન્ત પિનાકપાણે ।
આનન્દકન્દ ધરણીધર પદ્મનાભ
ત્યાજ્યા ભટા ય ઇતિ સન્તતમામનન્તિ ॥ ૫॥
સર્વેશ્વર ત્રિપુરસૂદન દેવદેવ
બ્રહ્મણ્યદેવ ગરુડધ્વજ શઙ્ખપાણે ।
ત્ર્યક્ષોરગાભરણ બાલમૃગાઙ્કમૌલે
ત્યાજ્યા ભટા ય ઇતિ સન્તતમામનન્તિ ॥ ૬॥
શ્રીરામ રાઘવ રમેશ્વર રાવણારે
ભૂતેશ મન્મથરિપો પ્રમથાધિનાથ ।
ચાણૂરમર્દન હૃષીકપતે મુરારે
ત્યાજ્યા ભટા ય ઇતિ સન્તતમામનન્તિ ॥ ૭॥
શૂલિન્ ગિરીશ રજનીશ કલાવતંસ
કંસપ્રણાશન સનાતન કેશિનાશ ।
ભર્ગ ત્રિનેત્ર ભવ ભૂતપતે પુરારે
ત્યાજ્યા ભટા ય ઇતિ સન્તતમામનન્તિ ॥ ૮॥
ગોપીપતે યદુપતે વસુદેવસૂનો
કર્પૂરગૌર વૃષભધ્વજ ભાલનેત્ર ।
ગોવર્ધનોદ્ધરણ ધર્મધુરીણ ગોપ
ત્યાજ્યા ભટા ય ઇતિ સન્તતમામનન્તિ ॥ ૯॥
સ્થાણો ત્રિલોચન પિનાકધર સ્મરારે
કૃષ્ણાનિરુદ્ધ કમલાકર કલ્મષારે ।
વિશ્વેશ્વર ત્રિપથગાર્દ્રજટાકલાપ
ત્યાજ્યા ભટા ય ઇતિ સન્તતમામનન્તિ ॥ ૧૦॥
અષ્ટોત્તરાધિકશતેન સુચારુનામ્નાં
સન્દર્ભિતાં લલિતરત્નકદમ્બકેન ।
સન્નાયકાં દૃઢગુણાં નિજકણ્ઠગતાં યઃ
કુર્યાદિમાં સ્રજમહો સ યમં ન પશ્યેત્ ॥ ૧૧॥
ગણાવૂચતુઃ ।
ઇત્થં દ્વિજેન્દ્ર નિજભૃત્યગણાન્સદૈવ
સંશિક્ષયેદવનિગાન્સ હિ ધર્મરાજઃ ।
અન્યેઽપિ યે હરિહરાઙ્કધરા ધરાયાં
તે દૂરતઃ પુનરહો પરિવર્જનીયાઃ ॥ ૧૨॥
અગસ્ત્ય ઉવાચ ।
યો ધર્મરાજરચિતાં લલિતપ્રબન્ધાં
નામાવલિં સકલકલ્મષબીજહન્ત્રીમ્ ।
ધીરોઽત્ર કૌસ્તુભભૃતઃ શશિભૂષણસ્ય
નિત્યં જપેત્સ્તનરસં ન પિબેત્સ માતુઃ ॥ ૧૩॥
ઇતિ શૃણ્વન્ કથાં રમ્યાં શિવશર્મા પ્રિયેઽનઘામ્ ।
પ્રહર્ષવક્ત્રઃ પુરતો દદર્શ સરસીં પુરીમ્ ॥ ૧૪॥
ઇતિ (શ્રીસ્કન્દપુરાણે કાશીખણ્ડે ધર્મરાજપ્રોક્તં
હરિહરાષ્ટોત્તરશતનામસ્તોત્રં સમ્પૂર્ણમ્ ।
Also Read:
Ayyappa Swamy Slokam – Sri Harihara Ashtottara Shatanama Stotram in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil