অষ্টভুজাষ্টকম্ Lyrics in Bengali:
বেদান্তদেশিককৃতম্ ।
(কাঞ্চ্যাং)
গজেন্দ্ররক্ষাত্বরিতং ভবন্তং গ্রাহৈরিবাহং বিষয়ৈর্বিকৃষ্টঃ ।
অপারবিজ্ঞানদয়ানুভাবমাপ্তং সতামষ্টভুজং প্রপদ্যে ॥ ১॥
ত্বদেকশেষোঽহমনাত্মতন্ত্রস্ত্বত্পাদলিপ্সাং দিশতা ত্বয়ৈব ।
অসত্সমোঽপ্যষ্টভুজাস্পদেশ সত্তামিদানীমুপলম্ভিতোঽস্মি ॥ ২॥
স্বরূপরূপাস্ত্রবিভূষণাদ্যৈঃ পরত্বচিন্তাং ত্বয়ি দুর্নিবারাম্ ।
ভোগে মৃদূপক্রমতামভীপ্সন্ শীলাদিভির্বারয়সীব পুংসাম্ ॥ ৩॥
শক্তিং শরণ্যান্তরশব্দভাজাং সারং চ সন্তোল্য ফলান্তরাণাম্ ।
ত্বদ্দাস্যহেতোস্ত্বয়ি নির্বিশঙ্কং ন্যস্তাত্মনাং নাথ বিভর্ষি ভারম্ ॥ ৪॥
অভীতিহেতোরনুবর্তনীয়ং নাথ ত্বদন্যং ন বিভাবয়ামি ।
ভয়ং কুতঃ স্যাত্ত্বয়ি সানুকম্পে রক্ষা কুতঃ স্যাত্ত্বয়ি জাতরোষে ॥ ৫॥
ত্বদেকতন্ত্রং কমলাসহায় স্বেনৈব মাং রক্ষিতুমর্হসি ত্বম্ ।
ত্বয়ি প্রবৃত্তে মম কিং প্রয়াসৈস্ত্বয়্যপ্রবৃত্তে মম কিং প্রয়াসৈঃ ॥ ৬॥
সমাধিভঙ্গেষ্বপি সম্পতত্সু শরণ্যভূতে ত্বয়ি বদ্ধকক্ষ্যে ।
অপত্রপে সোঢুমকিঞ্চনোঽহং দূরাধিরোহং পতনং চ নাথ ॥ ৭॥
প্রাপ্তাভিলাষং ত্বদনুগ্রহান্মাং পদ্মানিষেব্যে তব পাদপদ্মে ।
আদেহপাতাদপরাধদূরমাত্মান্তকৈঙ্কর্যরসং বিধেয়াঃ ॥ ৮॥
প্রপন্নজনপাথেয়ং প্রপিত্সূনাং রসায়নম্ ।
শ্রেয়সে জগতামেতচ্ছ্রীমদষ্টভুজাষ্টকম্ ॥ ৯॥
শরণাগতসন্ত্রাণত্বরা দ্বিগুণবাহুনা ।
হরিণা বেঙ্কটেশীয়া স্তুতিঃ স্বীক্রিয়তামিয়ম্ ॥ ১০॥
ইতি বেদান্তদেশিককৃতং অষ্টভুজাষ্টকং সম্পূর্ণম্ ।