Ashtavakra Geetaa in Bengali:
॥ অষ্টাবক্রগীতা ॥
॥ শ্রী ॥
অথ শ্রীমদষ্টাবক্রগীতা প্রারভ্যতে ॥
১
জনক উবাচ ॥
কথং জ্ঞানমবাপ্নোতি কথং মুক্তির্ভবিষ্যতি ।
বৈরাগ্যং চ কথং প্রাপ্তমেতদ্ ব্রূহি মম প্রভো ॥ ১-১ ॥
অষ্টাবক্র উবাচ ॥
মুক্তিমিচ্ছসি চেত্তাত বিষয়ান্ বিষবত্ত্যজ ।
ক্ষমার্জবদয়াতোষসত্যং পীয়ূষবদ্ ভজ ॥ ১-২ ॥
ন পৃথ্বী ন জলং নাগ্নির্ন বায়ুর্দ্যৌর্ন বা ভবান্ ।
এষাং সাক্ষিণমাত্মানং চিদ্রূপং বিদ্ধি মুক্তয়ে ॥ ১-৩ ॥
যদি দেহং পৃথক্ কৃত্য চিতি বিশ্রাম্য তিষ্ঠসি ।
অধুনৈব সুখী শান্তো বন্ধমুক্তো ভবিষ্যসি ॥ ১-৪ ॥
ন ৎবং বিপ্রাদিকো বর্ণো নাশ্রমী নাক্ষগোচরঃ ।
অসঙ্গোঽসি নিরাকারো বিশ্বসাক্ষী সুখী ভব ॥ ১-৫ ॥
ধর্মাধর্মৌ সুখং দুঃখং মানসানি ন তে বিভো ।
ন কর্তাসি ন ভোক্তাসি মুক্ত এবাসি সর্বদা ॥ ১-৬ ॥
একো দ্রষ্টাসি সর্বস্য মুক্তপ্রায়োঽসি সর্বদা ।
অয়মেব হি তে বন্ধো দ্রষ্টারং পশ্যসীতরম্ ॥ ১-৭ ॥
অহং কর্তেত্যহংমানমহাকৃষ্ণাহিদংশিতঃ ।
নাহং কর্তেতি বিশ্বাসামৃতং পীৎবা সুখী ভব ॥ ১-৮ ॥
একো বিশুদ্ধবোধোঽহমিতি নিশ্চয়বহ্নিনা ।
প্রজ্বাল্যাজ্ঞানগহনং বীতশোকঃ সুখী ভব ॥ ১-৯ ॥
যত্র বিশ্বমিদং ভাতি কল্পিতং রজ্জুসর্পবৎ ।
আনন্দপরমানন্দঃ স বোধস্ত্বং সুখং ভব ॥ ১-১০ ॥
মুক্তাভিমানী মুক্তো হি বদ্ধো বদ্ধাভিমান্যপি ।
কিংবদন্তীহ সত্যেয়ং যা মতিঃ সা গতির্ভবেৎ ॥ ১-১১ ॥
আত্মা সাক্ষী বিভুঃ পূর্ণ একো মুক্তশ্চিদক্রিয়ঃ ।
অসঙ্গো নিঃস্পৃহঃ শান্তো ভ্রমাৎসংসারবানিব ॥ ১-১২ ॥
কূটস্থং বোধমদ্বৈতমাত্মানং পরিভাবয় ।
আভাসোঽহং ভ্রমং মুক্ত্বা ভাবং বাহ্যমথান্তরম্ ॥ ১-১৩ ॥
দেহাভিমানপাশেন চিরং বদ্ধোঽসি পুত্রক ।
বোধোঽহং জ্ঞানখড্গেন তন্নিকৃত্য সুখী ভব ॥ ১-১৪ ॥
নিঃসঙ্গো নিষ্ক্রিয়োঽসি ৎবং স্বপ্রকাশো নিরঞ্জনঃ ।
অয়মেব হি তে বন্ধঃ সমাধিমনুতিষ্ঠতি ॥ ১-১৫ ॥
ৎবয়া ব্যাপ্তমিদং বিশ্বং ৎবয়ি প্রোতং যথার্থতঃ ।
শুদ্ধবুদ্ধস্বরূপস্ত্বং মা গমঃ ক্ষুদ্রচিত্ততাম্ ॥ ১-১৬ ॥
নিরপেক্ষো নির্বিকারো নির্ভরঃ শীতলাশয়ঃ ।
অগাধবুদ্ধিরক্ষুব্ধো ভব চিন্মাত্রবাসনঃ ॥ ১-১৭ ॥
সাকারমনৃতং বিদ্ধি নিরাকারং তু নিশ্চলম্ ।
এতত্তত্ত্বোপদেশেন ন পুনর্ভবসম্ভবঃ ॥ ১-১৮ ॥
যথৈবাদর্শমধ্যস্থে রূপেঽন্তঃ পরিতস্তু সঃ ।
তথৈবাঽস্মিন্ শরীরেঽন্তঃ পরিতঃ পরমেশ্বরঃ ॥ ১-১৯ ॥
একং সর্বগতং ব্যোম বহিরন্তর্যথা ঘটে ।
নিত্যং নিরন্তরং ব্রহ্ম সর্বভূতগণে তথা ॥ ১-২০ ॥
২
জনক উবাচ ॥
অহো নিরঞ্জনঃ শান্তো বোধোঽহং প্রকৃতেঃ পরঃ ।
এতাবন্তমহং কালং মোহেনৈব বিডম্বিতঃ ॥ ২-১ ॥
যথা প্রকাশয়াম্যেকো দেহমেনং তথা জগৎ ।
অতো মম জগৎসর্বমথবা ন চ কিঞ্চন ॥ ২-২ ॥
স শরীরমহো বিশ্বং পরিত্যজ্য ময়াধুনা ।
কুতশ্চিৎ কৌশলাদ্ এব পরমাত্মা বিলোক্যতে ॥ ২-৩ ॥
যথা ন তোয়তো ভিন্নাস্তরঙ্গাঃ ফেনবুদ্বুদাঃ ।
আত্মনো ন তথা ভিন্নং বিশ্বমাত্মবিনির্গতম্ ॥ ২-৪ ॥
তন্তুমাত্রো ভবেদ্ এব পটো যদ্বদ্ বিচারিতঃ ।
আত্মতন্মাত্রমেবেদং তদ্বদ্ বিশ্বং বিচারিতম্ ॥ ২-৫ ॥
যথৈবেক্ষুরসে ক্লৃপ্তা তেন ব্যাপ্তৈব শর্করা ।
তথা বিশ্বং ময়ি ক্লৃপ্তং ময়া ব্যাপ্তং নিরন্তরম্ ॥ ২-৬ ॥
আত্মজ্ঞানাজ্জগদ্ ভাতি আত্মজ্ঞানান্ন ভাসতে ।
রজ্জ্বজ্ঞানাদহির্ভাতি তজ্জ্ঞানাদ্ ভাসতে ন হি ॥ ২-৭ ॥
প্রকাশো মে নিজং রূপং নাতিরিক্তোঽস্ম্যহং ততঃ ।
যদা প্রকাশতে বিশ্বং তদাহং ভাস এব হি ॥ ২-৮ ॥
অহো বিকল্পিতং বিশ্বমজ্ঞানান্ময়ি ভাসতে ।
রূপ্যং শুক্তৌ ফণী রজ্জৌ বারি সূর্যকরে যথা ॥ ২-৯ ॥
মত্তো বিনির্গতং বিশ্বং ময়্যেব লয়মেষ্যতি ।
মৃদি কুম্ভো জলে বীচিঃ কনকে কটকং যথা ॥ ২-১০ ॥
অহো অহং নমো মহ্যং বিনাশো যস্য নাস্তি মে ।
ব্রহ্মাদিস্তম্বপর্যন্তং জগন্নাশোঽপি তিষ্ঠতঃ ॥ ২-১১ ॥
অহো অহং নমো মহ্যমেকোঽহং দেহবানপি ।
ক্বচিন্ন গন্তা নাগন্তা ব্যাপ্য বিশ্বমবস্থিতঃ ॥ ২-১২ ॥
অহো অহং নমো মহ্যং দক্ষো নাস্তীহ মৎসমঃ ।
অসংস্পৃশ্য শরীরেণ যেন বিশ্বং চিরং ধৃতম্ ॥ ২-১৩ ॥
অহো অহং নমো মহ্যং যস্য মে নাস্তি কিঞ্চন ।
অথবা যস্য মে সর্বং যদ্ বাঙ্মনসগোচরম্ ॥ ২-১৪ ॥
জ্ঞানং জ্ঞেয়ং তথা জ্ঞাতা ত্রিতয়ং নাস্তি বাস্তবম্ ।
অজ্ঞানাদ্ ভাতি যত্রেদং সোঽহমস্মি নিরঞ্জনঃ ॥ ২-১৫ ॥
দ্বৈতমূলমহো দুঃখং নান্যত্তস্যাঽস্তি ভেষজম্ ।
দৃশ্যমেতন্ মৃষা সর্বমেকোঽহং চিদ্রসোমলঃ ॥ ২-১৬ ॥
বোধমাত্রোঽহমজ্ঞানাদ্ উপাধিঃ কল্পিতো ময়া ।
এবং বিমৃশতো নিত্যং নির্বিকল্পে স্থিতির্মম ॥ ২-১৭ ॥
ন মে বন্ধোঽস্তি মোক্ষো বা ভ্রান্তিঃ শান্তো নিরাশ্রয়া ।
অহো ময়ি স্থিতং বিশ্বং বস্তুতো ন ময়ি স্থিতম্ ॥ ২-১৮ ॥
সশরীরমিদং বিশ্বং ন কিঞ্চিদিতি নিশ্চিতম্ ।
শুদ্ধচিন্মাত্র আত্মা চ তৎকস্মিন্ কল্পনাধুনা ॥ ২-১৯ ॥
শরীরং স্বর্গনরকৌ বন্ধমোক্ষৌ ভয়ং তথা ।
কল্পনামাত্রমেবৈতৎ কিং মে কার্যং চিদাত্মনঃ ॥ ২-২০ ॥
অহো জনসমূহেঽপি ন দ্বৈতং পশ্যতো মম ।
অরণ্যমিব সংবৃত্তং ক্ব রতিং করবাণ্যহম্ ॥ ২-২১ ॥
নাহং দেহো ন মে দেহো জীবো নাহমহং হি চিৎ ।
অয়মেব হি মে বন্ধ আসীদ্যা জীবিতে স্পৃহা ॥ ২-২২ ॥
অহো ভুবনকল্লোলৈর্বিচিত্রৈর্দ্রাক্ সমুত্থিতম্ ।
ময়্যনন্তমহাম্ভোধৌ চিত্তবাতে সমুদ্যতে ॥ ২-২৩ ॥
ময়্যনন্তমহাম্ভোধৌ চিত্তবাতে প্রশাম্যতি ।
অভাগ্যাজ্জীববণিজো জগৎপোতো বিনশ্বরঃ ॥ ২-২৪ ॥
ময়্যনন্তমহাম্ভোধাবাশ্চর্যং জীববীচয়ঃ ।
উদ্যন্তি ঘ্নন্তি খেলন্তি প্রবিশন্তি স্বভাবতঃ ॥ ২-২৫ ॥
৩
অষ্টাবক্র উবাচ ॥
অবিনাশিনমাত্মানমেকং বিজ্ঞায় তত্ত্বতঃ ।
তবাত্মজ্ঞানস্য ধীরস্য কথমর্থার্জনে রতিঃ ॥ ৩-১ ॥
আত্মাজ্ঞানাদহো প্রীতির্বিষয়ভ্রমগোচরে ।
শুক্তেরজ্ঞানতো লোভো যথা রজতবিভ্রমে ॥ ৩-২ ॥
বিশ্বং স্ফুরতি যত্রেদং তরঙ্গা ইব সাগরে ।
সোঽহমস্মীতি বিজ্ঞায় কিং দীন ইব ধাবসি ॥ ৩-৩ ॥
শ্রুৎবাপি শুদ্ধচৈতন্য আত্মানমতিসুন্দরম্ ।
উপস্থেঽত্যন্তসংসক্তো মালিন্যমধিগচ্ছতি ॥ ৩-৪ ॥
সর্বভূতেষু চাত্মানং সর্বভূতানি চাত্মনি ।
মুনের্জানত আশ্চর্যং মমৎবমনুবর্ততে ॥ ৩-৫ ॥
আস্থিতঃ পরমাদ্বৈতং মোক্ষার্থেঽপি ব্যবস্থিতঃ ।
আশ্চর্যং কামবশগো বিকলঃ কেলিশিক্ষয়া ॥ ৩-৬ ॥
উদ্ভূতং জ্ঞানদুর্মিত্রমবধার্যাতিদুর্বলঃ ।
আশ্চর্যং কামমাকাঙ্ক্ষেৎ কালমন্তমনুশ্রিতঃ ॥ ৩-৭ ॥
ইহামুত্র বিরক্তস্য নিত্যানিত্যবিবেকিনঃ ।
আশ্চর্যং মোক্ষকামস্য মোক্ষাদ্ এব বিভীষিকা ॥ ৩-৮ ॥
ধীরস্তু ভোজ্যমানোঽপি পীড্যমানোঽপি সর্বদা ।
আত্মানং কেবলং পশ্যন্ ন তুষ্যতি ন কুপ্যতি ॥ ৩-৯ ॥
চেষ্টমানং শরীরং স্বং পশ্যত্যন্যশরীরবৎ ।
সংস্তবে চাপি নিন্দায়াং কথং ক্ষুভ্যেৎ মহাশয়ঃ ॥ ৩-১০ ॥
মায়ামাত্রমিদং বিশ্বং পশ্যন্ বিগতকৌতুকঃ ।
অপি সন্নিহিতে মৃত্যৌ কথং ত্রস্যতি ধীরধীঃ ॥ ৩-১১ ॥
নিঃস্পৃহং মানসং যস্য নৈরাশ্যেঽপি মহাত্মনঃ ।
তস্যাত্মজ্ঞানতৃপ্তস্য তুলনা কেন জায়তে ॥ ৩-১২ ॥
স্বভাবাদ্ এব জানানো দৃশ্যমেতন্ন কিঞ্চন ।
ইদং গ্রাহ্যমিদং ত্যাজ্যং স কিং পশ্যতি ধীরধীঃ ॥ ৩-১৩ ॥
অন্তস্ত্যক্তকষায়স্য নির্দ্বন্দ্বস্য নিরাশিষঃ ।
যদৃচ্ছয়াগতো ভোগো ন দুঃখায় ন তুষ্টয়ে ॥ ৩-১৪ ॥
৪
জনক উবাচ ॥
হন্তাত্মজ্ঞানস্য ধীরস্য খেলতো ভোগলীলয়া ।
ন হি সংসারবাহীকৈর্মূঢৈঃ সহ সমানতা ॥ ৪-১ ॥
যৎ পদং প্রেপ্সবো দীনাঃ শক্রাদ্যাঃ সর্বদেবতাঃ ।
অহো তত্র স্থিতো যোগী ন হর্ষমুপগচ্ছতি ॥ ৪-২ ॥
তজ্জ্ঞস্য পুণ্যপাপাভ্যাং স্পর্শো হ্যন্তর্ন জায়তে ।
ন হ্যাকাশস্য ধূমেন দৃশ্যমানাপি সঙ্গতিঃ ॥ ৪-৩ ॥
আত্মৈবেদং জগৎসর্বং জ্ঞাতং যেন মহাত্মনা ।
যদৃচ্ছয়া বর্তমানং তং নিষেদ্ধুং ক্ষমেত কঃ ॥ ৪-৪ ॥
আব্রহ্মস্তম্বপর্যন্তে ভূতগ্রামে চতুর্বিধে ।
বিজ্ঞস্যৈব হি সামর্থ্যমিচ্ছানিচ্ছাবিবর্জনে ॥ ৪-৫ ॥
আত্মানমদ্বয়ং কশ্চিজ্জানাতি জগদীশ্বরম্ ।
যদ্ বেত্তি তৎস কুরুতে ন ভয়ং তস্য কুত্রচিৎ ॥ ৪-৬ ॥
৫
অষ্টাবক্র উবাচ ॥
ন তে সঙ্গোঽস্তি কেনাপি কিং শুদ্ধস্ত্যক্তুমিচ্ছসি ।
সঙ্ঘাতবিলয়ং কুর্বন্নেবমেব লয়ং ব্রজ ॥ ৫-১ ॥
উদেতি ভবতো বিশ্বং বারিধেরিব বুদ্বুদঃ ।
ইতি জ্ঞাৎবৈকমাত্মানমেবমেব লয়ং ব্রজ ॥ ৫-২ ॥
প্রত্যক্ষমপ্যবস্তুৎবাদ্ বিশ্বং নাস্ত্যমলে ৎবয়ি ।
রজ্জুসর্প ইব ব্যক্তমেবমেব লয়ং ব্রজ ॥ ৫-৩ ॥
সমদুঃখসুখঃ পূর্ণ আশানৈরাশ্যযোঃ সমঃ ।
সমজীবিতমৃত্যুঃ সন্নেবমেব লয়ং ব্রজ ॥ ৫-৪ ॥
৬
জনক উবাচ ॥
আকাশবদনন্তোঽহং ঘটবৎ প্রাকৃতং জগৎ ।
ইতি জ্ঞানং তথৈতস্য ন ত্যাগো ন গ্রহো লয়ঃ ॥ ৬-১ ॥
মহোদধিরিবাহং স প্রপঞ্চো বীচিসঽন্নিভঃ ।
ইতি জ্ঞানং তথৈতস্য ন ত্যাগো ন গ্রহো লয়ঃ ॥ ৬-২ ॥
অহং স শুক্তিসঙ্কাশো রূপ্যবদ্ বিশ্বকল্পনা ।
ইতি জ্ঞানং তথৈতস্য ন ত্যাগো ন গ্রহো লয়ঃ ॥ ৬-৩ ॥
অহং বা সর্বভূতেষু সর্বভূতান্যথো ময়ি ।
ইতি জ্ঞানং তথৈতস্য ন ত্যাগো ন গ্রহো লয়ঃ ॥ ৬-৪ ॥
৭
জনক উবাচ ॥
ময়্যনন্তমহাম্ভোধৌ বিশ্বপোত ইতস্ততঃ ।
ভ্রমতি স্বান্তবাতেন ন মমাস্ত্যসহিষ্ণুতা ॥ ৭-১ ॥
ময়্যনন্তমহাম্ভোধৌ জগদ্বীচিঃ স্বভাবতঃ ।
উদেতু বাস্তমায়াতু ন মে বৃদ্ধির্ন চ ক্ষতিঃ ॥ ৭-২ ॥
ময়্যনন্তমহাম্ভোধৌ বিশ্বং নাম বিকল্পনা ।
অতিশান্তো নিরাকার এতদেবাহমাস্থিতঃ ॥ ৭-৩ ॥
নাত্মা ভাবেষু নো ভাবস্তত্রানন্তে নিরঞ্জনে ।
ইত্যসক্তোঽস্পৃহঃ শান্ত এতদেবাহমাস্তিতঃ ॥ ৭-৪ ॥
অহো চিন্মাত্রমেবাহমিন্দ্রজালোপমং জগৎ ।
ইতি মম কথং কুত্র হেয়োপাদেয়কল্পনা ॥ ৭-৫ ॥
৮
অষ্টাবক্র উবাচ ॥
তদা বন্ধো যদা চিত্তং কিঞ্চিদ্ বাঞ্ছতি শোচতি ।
কিঞ্চিন্ মুঞ্চতি গৃণ্হাতি কিঞ্চিদ্ দৃষ্যতি কুপ্যতি ॥ ৮-১ ॥
তদা মুক্তির্যদা চিত্তং ন বাঞ্ছতি ন শোচতি ।
ন মুঞ্চতি ন গৃণ্হাতি ন হৃষ্যতি ন কুপ্যতি ॥ ৮-২ ॥
তদা বন্ধো যদা চিত্তং সক্তং কাশ্বপি দৃষ্টিষু ।
তদা মোক্ষো যদা চিত্তমসক্তং সর্বদৃষ্টিষু ॥ ৮-৩ ॥
যদা নাহং তদা মোক্ষো যদাহং বন্ধনং তদা ।
মৎবেতি হেলয়া কিঞ্চিন্মা গৃহাণ বিমুঞ্চ মা ॥ ৮-৪ ॥
৯
অষ্টাবক্র উবাচ ॥
কৃতাকৃতে চ দ্বন্দ্বানি কদা শান্তানি কস্য বা ।
এবং জ্ঞাৎবেহ নির্বেদাদ্ ভব ত্যাগপরোঽব্রতী ॥ ৯-১ ॥
কস্যাপি তাত ধন্যস্য লোকচেষ্টাবলোকনাৎ ।
জীবিতেচ্ছা বুভুক্ষা চ বুভুৎসোপশমঃ গতাঃ ॥ ৯-২ ॥
অনিত্যং সর্বমেবেদং তাপত্রিতয়দূষিতম্ ।
অসারং নিন্দিতং হেয়মিতি নিশ্চিত্য শাম্যতি ॥ ৯-৩ ॥
কোঽসৌ কালো বয়ঃ কিং বা যত্র দ্বন্দ্বানি নো নৃণাম্ ।
তান্যুপেক্ষ্য যথাপ্রাপ্তবর্তী সিদ্ধিমবাপ্নুয়াৎ ॥ ৯-৪ ॥
নানা মতং মহর্ষীণাং সাধূনাং যোগিনাং তথা ।
দৃষ্ট্বা নির্বেদমাপন্নঃ কো ন শাম্যতি মানবঃ ॥ ৯-৫ ॥
কৃৎবা মূর্তিপরিজ্ঞানং চৈতন্যস্য ন কিং গুরুঃ ।
নির্বেদসমতায়ুক্ত্যা যস্তারয়তি সংসৃতেঃ ॥ ৯-৬ ॥
পশ্য ভূতবিকারাংস্ত্বং ভূতমাত্রান্ যথার্থতঃ ।
তৎক্ষণাদ্ বন্ধনির্মুক্তঃ স্বরূপস্থো ভবিষ্যসি ॥ ৯-৭ ॥
বাসনা এব সংসার ইতি সর্বা বিমুঞ্চ তাঃ ।
তত্ত্যাগো বাসনাত্যাগাৎস্থিতিরদ্য যথা তথা ॥ ৯-৮ ॥
১০
অষ্টাবক্র উবাচ ॥
বিহায় বৈরিণং কামমর্থং চানর্থসঙ্কুলম্ ।
ধর্মমপ্যেতয়োর্হেতুং সর্বত্রানাদরং কুরু ॥ ১০-১ ॥
স্বপ্নেন্দ্রজালবৎ পশ্য দিনানি ত্রীণি পঞ্চ বা ।
মিত্রক্ষেত্রধনাগারদারদায়াদিসম্পদঃ ॥ ১০-২ ॥
যত্র যত্র ভবেত্তৃষ্ণা সংসারং বিদ্ধি তত্র বৈ ।
প্রৌঢবৈরাগ্যমাশ্রিত্য বীততৃষ্ণঃ সুখী ভব ॥ ১০-৩ ॥
তৃষ্ণামাত্রাত্মকো বন্ধস্তন্নাশো মোক্ষ উচ্যতে ।
ভবাসংসক্তিমাত্রেণ প্রাপ্তিতুষ্টির্মুহুর্মুহুঃ ॥ ১০-৪ ॥
ৎবমেকশ্চেতনঃ শুদ্ধো জডং বিশ্বমসত্তথা ।
অবিদ্যাপি ন কিঞ্চিৎসা কা বুভুৎসা তথাপি তে ॥ ১০-৫ ॥
রাজ্যং সুতাঃ কলত্রাণি শরীরাণি সুখানি চ ।
সংসক্তস্যাপি নষ্টানি তব জন্মনি জন্মনি ॥ ১০-৬ ॥
অলমর্থেন কামেন সুকৃতেনাপি কর্মণা ।
এভ্যঃ সংসারকান্তারে ন বিশ্রান্তমভূন্ মনঃ ॥ ১০-৭ ॥
কৃতং ন কতি জন্মানি কায়েন মনসা গিরা ।
দুঃখমায়াসদং কর্ম তদদ্যাপ্যুপরম্যতাম্ ॥ ১০-৮ ॥
১১
অষ্টাবক্র উবাচ ॥
ভাবাভাববিকারশ্চ স্বভাবাদিতি নিশ্চয়ী ।
নির্বিকারো গতক্লেশঃ সুখেনৈবোপশাম্যতি ॥ ১১-১ ॥
ঈশ্বরঃ সর্বনির্মাতা নেহান্য ইতি নিশ্চয়ী ।
অন্তর্গলিতসর্বাশঃ শান্তঃ ক্বাপি ন সজ্জতে ॥ ১১-২ ॥
আপদঃ সম্পদঃ কালে দৈবাদেবেতি নিশ্চয়ী ।
তৃপ্তঃ স্বস্থেন্দ্রিয়ো নিত্যং ন বান্ছতি ন শোচতি ॥ ১১-৩ ॥
সুখদুঃখে জন্মমৃত্যূ দৈবাদেবেতি নিশ্চয়ী ।
সাধ্যাদর্শী নিরায়াসঃ কুর্বন্নপি ন লিপ্যতে ॥ ১১-৪ ॥
চিন্তয়া জায়তে দুঃখং নান্যথেহেতি নিশ্চয়ী ।
তয়া হীনঃ সুখী শান্তঃ সর্বত্র গলিতস্পৃহঃ ॥ ১১-৫ ॥
নাহং দেহো ন মে দেহো বোধোঽহমিতি নিশ্চয়ী ।
কৈবল্যমিব সম্প্রাপ্তো ন স্মরত্যকৃতং কৃতম্ ॥ ১১-৬ ॥
আব্রহ্মস্তম্বপর্যন্তমহমেবেতি নিশ্চয়ী ।
নির্বিকল্পঃ শুচিঃ শান্তঃ প্রাপ্তাপ্রাপ্তবিনির্বৃতঃ ॥ ১১-৭ ॥
নাশ্চর্যমিদং বিশ্বং ন কিঞ্চিদিতি নিশ্চয়ী ।
নির্বাসনঃ স্ফূর্তিমাত্রো ন কিঞ্চিদিব শাম্যতি ॥ ১১-৮ ॥
১২
জনক উবাচ ॥
কায়কৃত্যাসহঃ পূর্বং ততো বাগ্বিস্তরাসহঃ ।
অথ চিন্তাসহস্তস্মাদ্ এবমেবাহমাস্থিতঃ ॥ ১২-১ ॥
প্রীত্যভাবেন শব্দাদেরদৃশ্যৎবেন চাত্মনঃ ।
বিক্ষেপৈকাগ্রহৃদয় এবমেবাহমাস্থিতঃ ॥ ১২-২ ॥
সমাধ্যাসাদিবিক্ষিপ্তৌ ব্যবহারঃ সমাধয়ে ।
এবং বিলোক্য নিয়মমেবমেবাহমাস্থিতঃ ॥ ১২-৩ ॥ ।
হেয়োপাদেয়বিরহাদ্ এবং হর্ষবিষাদয়োঃ ।
অভাবাদদ্য হে ব্রহ্মন্ন্ এবমেবাহমাস্থিতঃ ॥ ১২-৪ ॥
আশ্রমানাশ্রমং ধ্যানং চিত্তস্বীকৃতবর্জনম্ ।
বিকল্পং মম বীক্ষ্যৈতৈরেবমেবাহমাস্থিতঃ ॥ ১২-৫ ॥
কর্মানুষ্ঠানমজ্ঞানাদ্ যথৈবোপরমস্তথা ।
বুধ্বা সম্যগিদং তত্ত্বমেবমেবাহমাস্থিতঃ ॥ ১২-৬ ॥
অচিন্ত্যং চিন্ত্যমানোঽপি চিন্তারূপং ভজত্যসৌ ।
ত্যক্ত্বা তদ্ভাবনং তস্মাদ্ এবমেবাহমাস্থিতঃ ॥ ১২-৭ ॥
এবমেব কৃতং যেন স কৃতার্থো ভবেদসৌ ।
এবমেব স্বভাবো যঃ স কৃতার্থো ভবেদসৌ ॥ ১২-৮ ॥
১৩
জনক উবাচ ॥
অকিঞ্চনভবং স্বাস্থং কৌপীনৎবেঽপি দুর্লভম্ ।
ত্যাগাদানে বিহায়াস্মাদহমাসে যথাসুখম্ ॥ ১৩-১ ॥
কুত্রাপি খেদঃ কায়স্য জিহ্বা কুত্রাপি খেদ্যতে ।
মনঃ কুত্রাপি তত্ত্যক্ত্বা পুরুষার্থে স্থিতঃ সুখম্ ॥ ১৩-২ ॥
কৃতং কিমপি নৈব স্যাদ্ ইতি সঞ্চিন্ত্য তত্ত্বতঃ ।
যদা যৎকর্তুমায়াতি তৎ কৃৎবাসে যথাসুখম্ ॥ ১৩-৩ ॥
কর্মনৈষ্কর্ম্যনির্বন্ধভাবা দেহস্থয়োগিনঃ ।
সংয়োগায়োগবিরহাদহমাসে যথাসুখম্ ॥ ১৩-৪ ॥
অর্থানর্থৌ ন মে স্থিত্যা গত্যা ন শয়নেন বা ।
তিষ্ঠন্ গচ্ছন্ স্বপন্ তস্মাদহমাসে যথাসুখম্ ॥ ১৩-৫ ॥
স্বপতো নাস্তি মে হানিঃ সিদ্ধির্যত্নবতো ন বা ।
নাশোল্লাসৌ বিহায়াস্মদহমাসে যথাসুখম্ ॥ ১৩-৬ ॥
সুখাদিরূপা নিয়মং ভাবেষ্বালোক্য ভূরিশঃ ।
শুভাশুভে বিহায়াস্মাদহমাসে যথাসুখম্ ॥ ১৩-৭ ॥
১৪
জনক উবাচ ॥
প্রকৃত্যা শূন্যচিত্তো যঃ প্রমাদাদ্ ভাবভাবনঃ ।
নিদ্রিতো বোধিত ইব ক্ষীণসংস্মরণো হি সঃ ॥ ১৪-১ ॥
ক্ব ধনানি ক্ব মিত্রাণি ক্ব মে বিষয়দস্যবঃ ।
ক্ব শাস্ত্রং ক্ব চ বিজ্ঞানং যদা মে গলিতা স্পৃহা ॥ ১৪-২ ॥
বিজ্ঞাতে সাক্ষিপুরুষে পরমাত্মনি চেশ্বরে ।
নৈরাশ্যে বন্ধমোক্ষে চ ন চিন্তা মুক্তয়ে মম ॥ ১৪-৩ ॥
অন্তর্বিকল্পশূন্যস্য বহিঃ স্বচ্ছন্দচারিণঃ ।
ভ্রান্তস্যেব দশাস্তাস্তাস্তাদৃশা এব জানতে ॥ ১৪-৪ ॥
১৫
অষ্টাবক্র উবাচ ॥
যথাতথোপদেশেন কৃতার্থঃ সত্ত্ববুদ্ধিমান্ ।
আজীবমপি জিজ্ঞাসুঃ পরস্তত্র বিমুহ্যতি ॥ ১৫-১ ॥
মোক্ষো বিষয়বৈরস্যং বন্ধো বৈষয়িকো রসঃ ।
এতাবদেব বিজ্ঞানং যথেচ্ছসি তথা কুরু ॥ ১৫-২ ॥
বাগ্মিপ্রাজ্ঞামহোদ্যোগং জনং মূকজডালসম্ ।
করোতি তত্ত্ববোধোঽয়মতস্ত্যক্তো বুভুক্ষভিঃ ॥ ১৫-৩ ॥
ন ৎবং দেহো ন তে দেহো ভোক্তা কর্তা ন বা ভবান্ ।
চিদ্রূপোঽসি সদা সাক্ষী নিরপেক্ষঃ সুখং চর ॥ ১৫-৪ ॥
রাগদ্বেষৌ মনোধর্মৌ ন মনস্তে কদাচন ।
নির্বিকল্পোঽসি বোধাত্মা নির্বিকারঃ সুখং চর ॥ ১৫-৫ ॥
সর্বভূতেষু চাত্মানং সর্বভূতানি চাত্মনি ।
বিজ্ঞায় নিরহঙ্কারো নির্মমস্ত্বং সুখী ভব ॥ ১৫-৬ ॥
বিশ্বং স্ফুরতি যত্রেদং তরঙ্গা ইব সাগরে ।
তত্ত্বমেব ন সন্দেহশ্চিন্মূর্তে বিজ্বরো ভব ॥ ১৫-৭ ॥
শ্রদ্ধস্ব তাত শ্রদ্ধস্ব নাত্র মোঽহং কুরুষ্ব ভোঃ ।
জ্ঞানস্বরূপো ভগবানাত্মা ৎবং প্রকৃতেঃ পরঃ ॥ ১৫-৮ ॥
গুণৈঃ সংবেষ্টিতো দেহস্তিষ্ঠত্যায়াতি যাতি চ ।
আত্মা ন গন্তা নাগন্তা কিমেনমনুশোচসি ॥ ১৫-৯ ॥
দেহস্তিষ্ঠতু কল্পান্তং গচ্ছৎবদ্যৈব বা পুনঃ ।
ক্ব বৃদ্ধিঃ ক্ব চ বা হানিস্তব চিন্মাত্ররূপিণঃ ॥ ১৫-১০ ॥
ৎবয়্যনন্তমহাম্ভোধৌ বিশ্ববীচিঃ স্বভাবতঃ ।
উদেতু বাস্তমায়াতু ন তে বৃদ্ধির্ন বা ক্ষতিঃ ॥ ১৫-১১ ॥
তাত চিন্মাত্ররূপোঽসি ন তে ভিন্নমিদং জগৎ ।
অতঃ কস্য কথং কুত্র হেয়োপাদেয়কল্পনা ॥ ১৫-১২ ॥
একস্মিন্নব্যযে শান্তে চিদাকাশেঽমলে ৎবয়ি ।
কুতো জন্ম কুতো কর্ম কুতোঽহঙ্কার এব চ ॥ ১৫-১৩ ॥
যত্ত্বং পশ্যসি তত্রৈকস্ত্বমেব প্রতিভাসসে ।
কিং পৃথক্ ভাসতে স্বর্ণাৎ কটকাঙ্গদনূপুরম্ ॥ ১৫-১৪ ॥
অয়ং সোঽহময়ং নাহং বিভাগমিতি সন্ত্যজ ।
সর্বমাত্মেতি নিশ্চিত্য নিঃসঙ্কল্পঃ সুখী ভব ॥ ১৫-১৫ ॥
তবৈবাজ্ঞানতো বিশ্বং ৎবমেকঃ পরমার্থতঃ ।
ৎবত্তোঽন্যো নাস্তি সংসারী নাসংসারী চ কশ্চন ॥ ১৫-১৬ ॥
ভ্রান্তিমাত্রমিদং বিশ্বং ন কিঞ্চিদিতি নিশ্চয়ী ।
নির্বাসনঃ স্ফূর্তিমাত্রো ন কিঞ্চিদিব শাম্যতি ॥ ১৫-১৭ ॥
এক এব ভবাম্ভোধাবাসীদস্তি ভবিষ্যতি ।
ন তে বন্ধোঽস্তি মোক্ষো বা কৃত্যকৃত্যঃ সুখং চর ॥ ১৫-১৮ ॥
মা সঙ্কল্পবিকল্পাভ্যাং চিত্তং ক্ষোভয় চিন্ময় ।
উপশাম্য সুখং তিষ্ঠ স্বাত্মন্যানন্দবিগ্রহে ॥ ১৫-১৯ ॥
ত্যজৈব ধ্যানং সর্বত্র মা কিঞ্চিদ্ হৃদি ধারয় ।
আত্মা ৎবং মুক্ত এবাসি কিং বিমৃশ্য করিষ্যসি ॥ ১৫-২০ ॥
১৬
অষ্টাবক্র উবাচ ॥
আচক্ষ্ব শৃণু বা তাত নানাশাস্ত্রাণ্যনেকশঃ ।
তথাপি ন তব স্বাস্থ্যং সর্ববিস্মরণাদ্ ঋতে ॥ ১৬-১ ॥
ভোগং কর্ম সমাধিং বা কুরু বিজ্ঞ তথাপি তে ।
চিত্তং নিরস্তসর্বাশমত্যর্থং রোচয়িষ্যতি ॥ ১৬-২ ॥
আয়াসাৎসকলো দুঃখী নৈনং জানাতি কশ্চন ।
অনেনৈবোপদেশেন ধন্যঃ প্রাপ্নোতি নির্বৃতিম্ ॥ ১৬-৩ ॥
ব্যাপারে খিদ্যতে যস্তু নিমেষোন্মেষয়োরপি ।
তস্যালস্য ধুরীণস্য সুখং নন্যস্য কস্যচিৎ ॥ ১৬-৪ ॥
ইদং কৃতমিদং নেতি দ্বন্দ্বৈর্মুক্তং যদা মনঃ ।
ধর্মার্থকামমোক্ষেষু নিরপেক্ষং তদা ভবেৎ ॥ ১৬-৫ ॥
বিরক্তো বিষয়দ্বেষ্টা রাগী বিষয়লোলুপঃ ।
গ্রহমোক্ষবিহীনস্তু ন বিরক্তো ন রাগবান্ ॥ ১৬-৬ ॥
হেয়োপাদেয়তা তাবৎসংসারবিটপাঙ্কুরঃ ।
স্পৃহা জীবতি যাবদ্ বৈ নির্বিচারদশাস্পদম্ ॥ ১৬-৭ ॥
প্রবৃত্তৌ জায়তে রাগো নির্বৃত্তৌ দ্বেষ এব হি ।
নির্দ্বন্দ্বো বালবদ্ ধীমান্ এবমেব ব্যবস্থিতঃ ॥ ১৬-৮ ॥
হাতুমিচ্ছতি সংসারং রাগী দুঃখজিহাসয়া ।
বীতরাগো হি নির্দুঃখস্তস্মিন্নপি ন খিদ্যতি ॥ ১৬-৯ ॥
যস্যাভিমানো মোক্ষেঽপি দেহেঽপি মমতা তথা ।
ন চ জ্ঞানী ন বা যোগী কেবলং দুঃখভাগসৌ ॥ ১৬-১০ ॥
হরো যদ্যুপদেষ্টা তে হরিঃ কমলজোঽপি বা ।
তথাপি ন তব স্বাথ্যং সর্ববিস্মরণাদৃতে ॥ ১৬-১১ ॥
১৭
অষ্টাবক্র উবাচ ॥
তেন জ্ঞানফলং প্রাপ্তং যোগাভ্যাসফলং তথা ।
তৃপ্তঃ স্বচ্ছেন্দ্রিয়ো নিত্যমেকাকী রমতে তু যঃ ॥ ১৭-১ ॥
ন কদাচিজ্জগত্যস্মিন্ তত্ত্বজ্ঞো হন্ত খিদ্যতি ।
যত একেন তেনেদং পূর্ণং ব্রহ্মাণ্ডমণ্ডলম্ ॥ ১৭-২ ॥
ন জাতু বিষয়াঃ কেঽপি স্বারামং হর্ষয়ন্ত্যমী ।
সল্লকীপল্লবপ্রীতমিবেভং নিম্বপল্লবাঃ ॥ ১৭-৩ ॥
যস্তু ভোগেষু ভুক্তেষু ন ভবত্যধিবাসিতঃ ।
অভুক্তেষু নিরাকাঙ্ক্ষী তদৃশো ভবদুর্লভঃ ॥ ১৭-৪ ॥
বুভুক্ষুরিহ সংসারে মুমুক্ষুরপি দৃশ্যতে ।
ভোগমোক্ষনিরাকাঙ্ক্ষী বিরলো হি মহাশয়ঃ ॥ ১৭-৫ ॥
ধর্মার্থকামমোক্ষেষু জীবিতে মরণে তথা ।
কস্যাপ্যুদারচিত্তস্য হেয়োপাদেয়তা ন হি ॥ ১৭-৬ ॥
বাঞ্ছা ন বিশ্ববিলয়ে ন দ্বেষস্তস্য চ স্থিতৌ ।
যথা জীবিকয়া তস্মাদ্ ধন্য আস্তে যথা সুখম্ ॥ ১৭-৭ ॥
কৃতার্থোঽনেন জ্ঞানেনেত্যেবং গলিতধীঃ কৃতী ।
পশ্যন্ শৃণ্বন্ স্পৃশন্ জিঘ্রন্ন্
অশ্নন্নাস্তে যথা সুখম্ ॥ ১৭-৮ ॥
শূন্যা দৃষ্টির্বৃথা চেষ্টা বিকলানীন্দ্রিয়াণি চ ।
ন স্পৃহা ন বিরক্তির্বা ক্ষীণসংসারসাগরে ॥ ১৭-৯ ॥
ন জাগর্তি ন নিদ্রাতি নোন্মীলতি ন মীলতি ।
অহো পরদশা ক্বাপি বর্ততে মুক্তচেতসঃ ॥ ১৭-১০ ॥
সর্বত্র দৃশ্যতে স্বস্থঃ সর্বত্র বিমলাশয়ঃ ।
সমস্তবাসনা মুক্তো মুক্তঃ সর্বত্র রাজতে ॥ ১৭-১১ ॥
পশ্যন্ শৃণ্বন্ স্পৃশন্ জিঘ্রন্ন্ অশ্নন্
গৃণ্হন্ বদন্ ব্রজন্ ।
ঈহিতানীহিতৈর্মুক্তো মুক্ত এব মহাশয়ঃ ॥ ১৭-১২ ॥
ন নিন্দতি ন চ স্তৌতি ন হৃষ্যতি ন কুপ্যতি ।
ন দদাতি ন গৃণ্হাতি মুক্তঃ সর্বত্র নীরসঃ ॥ ১৭-১৩ ॥
সানুরাগাং স্ত্রিয়ং দৃষ্ট্বা মৃত্যুং বা সমুপস্থিতম্ ।
অবিহ্বলমনাঃ স্বস্থো মুক্ত এব মহাশয়ঃ ॥ ১৭-১৪ ॥
সুখে দুঃখে নরে নার্যাং সম্পৎসু চ বিপৎসু চ ।
বিশেষো নৈব ধীরস্য সর্বত্র সমদর্শিনঃ ॥ ১৭-১৫ ॥
ন হিংসা নৈব কারুণ্যং নৌদ্ধত্যং ন চ দীনতা ।
নাশ্চর্যং নৈব চ ক্ষোভঃ ক্ষীণসংসরণে নরে ॥ ১৭-১৬ ॥
ন মুক্তো বিষয়দ্বেষ্টা ন বা বিষয়লোলুপঃ ।
অসংসক্তমনা নিত্যং প্রাপ্তাপ্রাপ্তমুপাশ্নুতে ॥ ১৭-১৭ ॥
সমাধানসমাধানহিতাহিতবিকল্পনাঃ ।
শূন্যচিত্তো ন জানাতি কৈবল্যমিব সংস্থিতঃ ॥ ১৭-১৮ ॥
নির্মমো নিরহঙ্কারো ন কিঞ্চিদিতি নিশ্চিতঃ ।
অন্তর্গলিতসর্বাশঃ কুর্বন্নপি করোতি ন ॥ ১৭-১৯ ॥
মনঃপ্রকাশসংমোহস্বপ্নজাড্যবিবর্জিতঃ ।
দশাং কামপি সম্প্রাপ্তো ভবেদ্ গলিতমানসঃ ॥ ১৭-২০ ॥
১৮
অষ্টাবক্র উবাচ ॥
যস্য বোধোদয়ে তাবৎস্বপ্নবদ্ ভবতি ভ্রমঃ ।
তস্মৈ সুখৈকরূপায় নমঃ শান্তায় তেজসে ॥ ১৮-১ ॥
অর্জয়িৎবাখিলান্ অর্থান্ ভোগানাপ্নোতি পুষ্কলান্ ।
ন হি সর্বপরিত্যাগমন্তরেণ সুখী ভবেৎ ॥ ১৮-২ ॥
কর্তব্যদুঃখমার্তণ্ডজ্বালাদগ্ধান্তরাত্মনঃ ।
কুতঃ প্রশমপীয়ূষধারাসারমৃতে সুখম্ ॥ ১৮-৩ ॥
ভবোঽয়ং ভাবনামাত্রো ন কিঞ্চিৎ পরমর্থতঃ ।
নাস্ত্যভাবঃ স্বভাবানাং ভাবাভাববিভাবিনাম্ ॥ ১৮-৪ ॥
ন দূরং ন চ সঙ্কোচাল্লব্ধমেবাত্মনঃ পদম্ ।
নির্বিকল্পং নিরায়াসং নির্বিকারং নিরঞ্জনম্ ॥ ১৮-৫ ॥
ব্যামোহমাত্রবিরতৌ স্বরূপাদানমাত্রতঃ ।
বীতশোকা বিরাজন্তে নিরাবরণদৃষ্টয়ঃ ॥ ১৮-৬ ॥
সমস্তং কল্পনামাত্রমাত্মা মুক্তঃ সনাতনঃ ।
ইতি বিজ্ঞায় ধীরো হি কিমভ্যস্যতি বালবৎ ॥ ১৮-৭ ॥
আত্মা ব্রহ্মেতি নিশ্চিত্য ভাবাভাবৌ চ কল্পিতৌ ।
নিষ্কামঃ কিং বিজানাতি কিং ব্রূতে চ করোতি কিম্ ॥ ১৮-৮ ॥
অয়ং সোঽহময়ং নাহমিতি ক্ষীণা বিকল্পনা ।
সর্বমাত্মেতি নিশ্চিত্য তূষ্ণীম্ভূতস্য যোগিনঃ ॥ ১৮-৯ ॥
ন বিক্ষেপো ন চৈকাগ্র্যং নাতিবোধো ন মূঢতা ।
ন সুখং ন চ বা দুঃখমুপশান্তস্য যোগিনঃ ॥ ১৮-১০ ॥
স্বারাজ্যে ভৈক্ষবৃত্তৌ চ লাভালাভে জনে বনে ।
নির্বিকল্পস্বভাবস্য ন বিশেষোঽস্তি যোগিনঃ ॥ ১৮-১১ ॥
ক্ব ধর্মঃ ক্ব চ বা কামঃ ক্ব চার্থঃ ক্ব বিবেকিতা ।
ইদং কৃতমিদং নেতি দ্বন্দ্বৈর্মুক্তস্য যোগিনঃ ॥ ১৮-১২ ॥
কৃত্যং কিমপি নৈবাস্তি ন কাপি হৃদি রঞ্জনা ।
যথা জীবনমেবেহ জীবন্মুক্তস্য যোগিনঃ ॥ ১৮-১৩ ॥
ক্ব মোহঃ ক্ব চ বা বিশ্বং ক্ব তদ্ ধ্যানং ক্ব মুক্ততা ।
সর্বসঙ্কল্পসীমায়াং বিশ্রান্তস্য মহাত্মনঃ ॥ ১৮-১৪ ॥
যেন বিশ্বমিদং দৃষ্টং স নাস্তীতি করোতু বৈ ।
নির্বাসনঃ কিং কুরুতে পশ্যন্নপি ন পশ্যতি ॥ ১৮-১৫ ॥
যেন দৃষ্টং পরং ব্রহ্ম সোঽহং ব্রহ্মেতি চিন্তয়েৎ ।
কিং চিন্তয়তি নিশ্চিন্তো দ্বিতীয়ং যো ন পশ্যতি ॥ ১৮-১৬ ॥
দৃষ্টো যেনাত্মবিক্ষেপো নিরোধং কুরুতে ৎবসৌ ।
উদারস্তু ন বিক্ষিপ্তঃ সাধ্যাভাবাৎকরোতি কিম্ ॥ ১৮-১৭ ॥
ধীরো লোকবিপর্যস্তো বর্তমানোঽপি লোকবৎ ।
ন সমাধিং ন বিক্ষেপং ন লোপং স্বস্য পশ্যতি ॥ ১৮-১৮ ॥
ভাবাভাববিহীনো যস্তৃপ্তো নির্বাসনো বুধঃ ।
নৈব কিঞ্চিৎকৃতং তেন লোকদৃষ্ট্যা বিকুর্বতা ॥ ১৮-১৯ ॥
প্রবৃত্তৌ বা নিবৃত্তৌ বা নৈব ধীরস্য দুর্গ্রহঃ ।
যদা যৎকর্তুমায়াতি তৎকৃৎবা তিষ্ঠতঃ সুখম্ ॥ ১৮-২০ ॥
নির্বাসনো নিরালম্বঃ স্বচ্ছন্দো মুক্তবন্ধনঃ ।
ক্ষিপ্তঃ সংস্কারবাতেন চেষ্টতে শুষ্কপর্ণবৎ ॥ ১৮-২১ ॥
অসংসারস্য তু ক্বাপি ন হর্ষো ন বিষাদতা ।
স শীতলমনা নিত্যং বিদেহ ইব রাজয়ে ॥ ১৮-২২ ॥
কুত্রাপি ন জিহাসাস্তি নাশো বাপি ন কুত্রচিৎ ।
আত্মারামস্য ধীরস্য শীতলাচ্ছতরাত্মনঃ ॥ ১৮-২৩ ॥
প্রকৃত্যা শূন্যচিত্তস্য কুর্বতোঽস্য যদৃচ্ছয়া ।
প্রাকৃতস্যেব ধীরস্য ন মানো নাবমানতা ॥ ১৮-২৪ ॥
কৃতং দেহেন কর্মেদং ন ময়া শুদ্ধরূপিণা ।
ইতি চিন্তানুরোধী যঃ কুর্বন্নপি করোতি ন ॥ ১৮-২৫ ॥
অতদ্বাদীব কুরুতে ন ভবেদপি বালিশঃ ।
জীবন্মুক্তঃ সুখী শ্রীমান্ সংসরন্নপি শোভতে ॥ ১৮-২৬ ॥
নানাবিচারসুশ্রান্তো ধীরো বিশ্রান্তিমাগতঃ ।
ন কল্পতে ন জাতি ন শৃণোতি ন পশ্যতি ॥ ১৮-২৭ ॥
অসমাধেরবিক্ষেপান্ ন মুমুক্ষুর্ন চেতরঃ ।
নিশ্চিত্য কল্পিতং পশ্যন্ ব্রহ্মৈবাস্তে মহাশয়ঃ ॥ ১৮-২৮ ॥
যস্যান্তঃ স্যাদহঙ্কারো ন করোতি করোতি সঃ ।
নিরহঙ্কারধীরেণ ন কিঞ্চিদকৃতং কৃতম্ ॥ ১৮-২৯ ॥
নোদ্বিগ্নং ন চ সন্তুষ্টমকর্তৃ স্পন্দবর্জিতম্ ।
নিরাশং গতসন্দেহং চিত্তং মুক্তস্য রাজতে ॥ ১৮-৩০ ॥
নির্ধ্যাতুং চেষ্টিতুং বাপি যচ্চিত্তং ন প্রবর্ততে ।
নির্নিমিত্তমিদং কিন্তু নির্ধ্যায়েতি বিচেষ্টতে ॥ ১৮-৩১ ॥
তত্ত্বং যথার্থমাকর্ণ্য মন্দঃ প্রাপ্নোতি মূঢতাম্ ।
অথবা যাতি সঙ্কোচমমূঢঃ কোঽপি মূঢবৎ ॥ ১৮-৩২ ॥
একাগ্রতা নিরোধো বা মূঢৈরভ্যস্যতে ভৃশম্ ।
ধীরাঃ কৃত্যং ন পশ্যন্তি সুপ্তবৎস্বপদে স্থিতাঃ ॥ ১৮-৩৩ ॥
অপ্রয়ত্নাৎ প্রয়ত্নাদ্ বা মূঢো নাপ্নোতি নির্বৃতিম্ ।
তত্ত্বনিশ্চয়মাত্রেণ প্রাজ্ঞো ভবতি নির্বৃতঃ ॥ ১৮-৩৪ ॥
শুদ্ধং বুদ্ধং প্রিয়ং পূর্ণং নিষ্প্রপঞ্চং নিরাময়ম্ ।
আত্মানং তং ন জানন্তি তত্রাভ্যাসপরা জনাঃ ॥ ১৮-৩৫ ॥
নাপ্নোতি কর্মণা মোক্ষং বিমূঢোঽভ্যাসরূপিণা ।
ধন্যো বিজ্ঞানমাত্রেণ মুক্তস্তিষ্ঠত্যবিক্রিয়ঃ ॥ ১৮-৩৬ ॥
মূঢো নাপ্নোতি তদ্ ব্রহ্ম যতো ভবিতুমিচ্ছতি ।
অনিচ্ছন্নপি ধীরো হি পরব্রহ্মস্বরূপভাক্ ॥ ১৮-৩৭ ॥
নিরাধারা গ্রহব্যগ্রা মূঢাঃ সংসারপোষকাঃ ।
এতস্যানর্থমূলস্য মূলচ্ছেদঃ কৃতো বুধৈঃ ॥ ১৮-৩৮ ॥
ন শান্তিং লভতে মূঢো যতঃ শমিতুমিচ্ছতি ।
ধীরস্তত্ত্বং বিনিশ্চিত্য সর্বদা শান্তমানসঃ ॥ ১৮-৩৯ ॥
ক্বাত্মনো দর্শনং তস্য যদ্ দৃষ্টমবলম্বতে ।
ধীরাস্তং তং ন পশ্যন্তি পশ্যন্ত্যাত্মানমব্যযম্ ॥ ১৮-৪০ ॥
ক্ব নিরোধো বিমূঢস্য যো নির্বন্ধং করোতি বৈ ।
স্বারামস্যৈব ধীরস্য সর্বদাসাবকৃত্রিমঃ ॥ ১৮-৪১ ॥
ভাবস্য ভাবকঃ কশ্চিন্ ন কিঞ্চিদ্ ভাবকোপরঃ ।
উভয়াভাবকঃ কশ্চিদ্ এবমেব নিরাকুলঃ ॥ ১৮-৪২ ॥
শুদ্ধমদ্বয়মাত্মানং ভাবয়ন্তি কুবুদ্ধয়ঃ ।
ন তু জানন্তি সংমোহাদ্যাবজ্জীবমনির্বৃতাঃ ॥ ১৮-৪৩ ॥
মুমুক্ষোর্বুদ্ধিরালম্বমন্তরেণ ন বিদ্যতে ।
নিরালম্বৈব নিষ্কামা বুদ্ধির্মুক্তস্য সর্বদা ॥ ১৮-৪৪ ॥
বিষয়দ্বীপিনো বীক্ষ্য চকিতাঃ শরণার্থিনঃ ।
বিশন্তি ঝটিতি ক্রোডং নিরোধৈকাগ্রসিদ্ধয়ে ॥ ১৮-৪৫ ॥
নির্বাসনং হরিং দৃষ্ট্বা তূষ্ণীং বিষয়দন্তিনঃ ।
পলায়ন্তে ন শক্তাস্তে সেবন্তে কৃতচাটবঃ ॥ ১৮-৪৬ ॥
ন মুক্তিকারিকাং ধত্তে নিঃশঙ্কো যুক্তমানসঃ ।
পশ্যন্ শৃণ্বন্ স্পৃশন্ জিঘ্রন্নশ্নন্নাস্তে যথাসুখম্ ॥ ১৮-৪৭ ॥
বস্তুশ্রবণমাত্রেণ শুদ্ধবুদ্ধির্নিরাকুলঃ ।
নৈবাচারমনাচারমৌদাস্যং বা প্রপশ্যতি ॥ ১৮-৪৮ ॥
যদা যৎকর্তুমায়াতি তদা তৎকুরুতে ঋজুঃ ।
শুভং বাপ্যশুভং বাপি তস্য চেষ্টা হি বালবৎ ॥ ১৮-৪৯ ॥
স্বাতন্ত্র্যাৎসুখমাপ্নোতি স্বাতন্ত্র্যাল্লভতে পরম্ ।
স্বাতন্ত্র্যান্নির্বৃতিং গচ্ছেৎস্বাতন্ত্র্যাৎ পরমং পদম্ ॥ ১৮-৫০ ॥
অকর্তৃৎবমভোক্তৃৎবং স্বাত্মনো মন্যতে যদা ।
তদা ক্ষীণা ভবন্ত্যেব সমস্তাশ্চিত্তবৃত্তয়ঃ ॥ ১৮-৫১ ॥
উচ্ছৃঙ্খলাপ্যকৃতিকা স্থিতির্ধীরস্য রাজতে ।
ন তু সস্পৃহচিত্তস্য শান্তির্মূঢস্য কৃত্রিমা ॥ ১৮-৫২ ॥
বিলসন্তি মহাভোগৈর্বিশন্তি গিরিগহ্বরান্ ।
নিরস্তকল্পনা ধীরা অবদ্ধা মুক্তবুদ্ধয়ঃ ॥ ১৮-৫৩ ॥
শ্রোত্রিয়ং দেবতাং তীর্থমঙ্গনাং ভূপতিং প্রিয়ম্ ।
দৃষ্ট্বা সম্পূজ্য ধীরস্য ন কাপি হৃদি বাসনা ॥ ১৮-৫৪ ॥
ভৃত্যৈঃ পুত্রৈঃ কলত্রৈশ্চ দৌহিত্রৈশ্চাপি গোত্রজৈঃ ।
বিহস্য ধিক্কৃতো যোগী ন যাতি বিকৃতিং মনাক্ ॥ ১৮-৫৫ ॥
সন্তুষ্টোঽপি ন সন্তুষ্টঃ খিন্নোঽপি ন চ খিদ্যতে ।
তস্যাশ্চর্যদশাং তাং তাং তাদৃশা এব জানতে ॥ ১৮-৫৬ ॥
কর্তব্যতৈব সংসারো ন তাং পশ্যন্তি সূরয়ঃ ।
শূন্যাকারা নিরাকারা নির্বিকারা নিরাময়াঃ ॥ ১৮-৫৭ ॥
অকুর্বন্নপি সঙ্ক্ষোভাদ্ ব্যগ্রঃ সর্বত্র মূঢধীঃ ।
কুর্বন্নপি তু কৃত্যানি কুশলো হি নিরাকুলঃ ॥ ১৮-৫৮ ॥
সুখমাস্তে সুখং শেতে সুখমায়াতি যাতি চ ।
সুখং বক্তি সুখং ভুঙ্ক্তে ব্যবহারেঽপি শান্তধীঃ ॥ ১৮-৫৯ ॥
স্বভাবাদ্যস্য নৈবার্তির্লোকবদ্ ব্যবহারিণঃ ।
মহাহৃদ ইবাক্ষোভ্যো গতক্লেশঃ সুশোভতে ॥ ১৮-৬০ ॥
নিবৃত্তিরপি মূঢস্য প্রবৃত্তি রুপজায়তে ।
প্রবৃত্তিরপি ধীরস্য নিবৃত্তিফলভাগিনী ॥ ১৮-৬১ ॥
পরিগ্রহেষু বৈরাগ্যং প্রায়ো মূঢস্য দৃশ্যতে ।
দেহে বিগলিতাশস্য ক্ব রাগঃ ক্ব বিরাগতা ॥ ১৮-৬২ ॥
ভাবনাভাবনাসক্তা দৃষ্টির্মূঢস্য সর্বদা ।
ভাব্যভাবনয়া সা তু স্বস্থস্যাদৃষ্টিরূপিণী ॥ ১৮-৬৩ ॥
সর্বারম্ভেষু নিষ্কামো যশ্চরেদ্ বালবন্ মুনিঃ ।
ন লেপস্তস্য শুদ্ধস্য ক্রিয়মাণেঽপি কর্মণি ॥ ১৮-৬৪ ॥
স এব ধন্য আত্মজ্ঞঃ সর্বভাবেষু যঃ সমঃ ।
পশ্যন্ শৃণ্বন্ স্পৃশন্ জিঘ্রন্ন্ অশ্নন্নিস্তর্ষমানসঃ ॥ ১৮-৬৫ ॥
ক্ব সংসারঃ ক্ব চাভাসঃ ক্ব সাধ্যং ক্ব চ সাধনম্ ।
আকাশস্যেব ধীরস্য নির্বিকল্পস্য সর্বদা ॥ ১৮-৬৬ ॥
স জয়ত্যর্থসংন্যাসী পূর্ণস্বরসবিগ্রহঃ ।
অকৃত্রিমোঽনবচ্ছিন্নে সমাধির্যস্য বর্ততে ॥ ১৮-৬৭ ॥
বহুনাত্র কিমুক্তেন জ্ঞাততত্ত্বো মহাশয়ঃ ।
ভোগমোক্ষনিরাকাঙ্ক্ষী সদা সর্বত্র নীরসঃ ॥ ১৮-৬৮ ॥
মহদাদি জগদ্দ্বৈতং নামমাত্রবিজৃম্ভিতম্ ।
বিহায় শুদ্ধবোধস্য কিং কৃত্যমবশিষ্যতে ॥ ১৮-৬৯ ॥
ভ্রমভূতমিদং সর্বং কিঞ্চিন্নাস্তীতি নিশ্চয়ী ।
অলক্ষ্যস্ফুরণঃ শুদ্ধঃ স্বভাবেনৈব শাম্যতি ॥ ১৮-৭০ ॥
শুদ্ধস্ফুরণরূপস্য দৃশ্যভাবমপশ্যতঃ ।
ক্ব বিধিঃ ক্ব চ বৈরাগ্যং ক্ব ত্যাগঃ ক্ব শমোঽপি বা ॥ ১৮-৭১ ॥
স্ফুরতোঽনন্তরূপেণ প্রকৃতিং চ ন পশ্যতঃ ।
ক্ব বন্ধঃ ক্ব চ বা মোক্ষঃ ক্ব হর্ষঃ ক্ব বিষাদিতা ॥ ১৮-৭২ ॥
বুদ্ধিপর্যন্তসংসারে মায়ামাত্রং বিবর্ততে ।
নির্মমো নিরহঙ্কারো নিষ্কামঃ শোভতে বুধঃ ॥ ১৮-৭৩ ॥
অক্ষয়ং গতসন্তাপমাত্মানং পশ্যতো মুনেঃ ।
ক্ব বিদ্যা চ ক্ব বা বিশ্বং ক্ব দেহোঽহং মমেতি বা ॥ ১৮-৭৪ ॥
নিরোধাদীনি কর্মাণি জহাতি জডধীর্যদি ।
মনোরথান্ প্রলাপাংশ্চ কর্তুমাপ্নোত্যতৎক্ষণাৎ ॥ ১৮-৭৫ ॥
মন্দঃ শ্রুৎবাপি তদ্বস্তু ন জহাতি বিমূঢতাম্ ।
নির্বিকল্পো বহির্যত্নাদন্তর্বিষয়লালসঃ ॥ ১৮-৭৬ ॥
জ্ঞানাদ্ গলিতকর্মা যো লোকদৃষ্ট্যাপি কর্মকৃৎ ।
নাপ্নোত্যবসরং কর্ত্রুং বক্তুমেব ন কিঞ্চন ॥ ১৮-৭৭ ॥
ক্ব তমঃ ক্ব প্রকাশো বা হানং ক্ব চ ন কিঞ্চন ।
নির্বিকারস্য ধীরস্য নিরাতঙ্কস্য সর্বদা ॥ ১৮-৭৮ ॥
ক্ব ধৈর্যং ক্ব বিবেকিৎবং ক্ব নিরাতঙ্কতাপি বা ।
অনির্বাচ্যস্বভাবস্য নিঃস্বভাবস্য যোগিনঃ ॥ ১৮-৭৯ ॥
ন স্বর্গো নৈব নরকো জীবন্মুক্তির্ন চৈব হি ।
বহুনাত্র কিমুক্তেন যোগদৃষ্ট্যা ন কিঞ্চন ॥ ১৮-৮০ ॥
নৈব প্রার্থয়তে লাভং নালাভেনানুশোচতি ।
ধীরস্য শীতলং চিত্তমমৃতেনৈব পূরিতম্ ॥ ১৮-৮১ ॥
ন শান্তং স্তৌতি নিষ্কামো ন দুষ্টমপি নিন্দতি ।
সমদুঃখসুখস্তৃপ্তঃ কিঞ্চিৎ কৃত্যং ন পশ্যতি ॥ ১৮-৮২ ॥
ধীরো ন দ্বেষ্টি সংসারমাত্মানং ন দিদৃক্ষতি ।
হর্ষামর্ষবিনির্মুক্তো ন মৃতো ন চ জীবতি ॥ ১৮-৮৩ ॥
নিঃস্নেহঃ পুত্রদারাদৌ নিষ্কামো বিষয়েষু চ ।
নিশ্চিন্তঃ স্বশরীরেঽপি নিরাশঃ শোভতে বুধঃ ॥ ১৮-৮৪ ॥
তুষ্টিঃ সর্বত্র ধীরস্য যথাপতিতবর্তিনঃ ।
স্বচ্ছন্দং চরতো দেশান্ যত্রস্তমিতশায়িনঃ ॥ ১৮-৮৫ ॥
পততূদেতু বা দেহো নাস্য চিন্তা মহাত্মনঃ ।
স্বভাবভূমিবিশ্রান্তিবিস্মৃতাশেষসংসৃতেঃ ॥ ১৮-৮৬ ॥
অকিঞ্চনঃ কামচারো নির্দ্বন্দ্বশ্ছিন্নসংশয়ঃ ।
অসক্তঃ সর্বভাবেষু কেবলো রমতে বুধঃ ॥ ১৮-৮৭ ॥
নির্মমঃ শোভতে ধীরঃ সমলোষ্টাশ্মকাঞ্চনঃ ।
সুভিন্নহৃদয়গ্রন্থির্বিনির্ধূতরজস্তমঃ ॥ ১৮-৮৮ ॥
সর্বত্রানবধানস্য ন কিঞ্চিদ্ বাসনা হৃদি ।
মুক্তাত্মনো বিতৃপ্তস্য তুলনা কেন জায়তে ॥ ১৮-৮৯ ॥
জানন্নপি ন জানাতি পশ্যন্নপি ন পশ্যতি ।
ব্রুবন্ন্ অপি ন চ ব্রূতে কোঽন্যো নির্বাসনাদৃতে ॥ ১৮-৯০ ॥
ভিক্ষুর্বা ভূপতির্বাপি যো নিষ্কামঃ স শোভতে ।
ভাবেষু গলিতা যস্য শোভনাশোভনা মতিঃ ॥ ১৮-৯১ ॥
ক্ব স্বাচ্ছন্দ্যং ক্ব সঙ্কোচঃ ক্ব বা তত্ত্ববিনিশ্চয়ঃ ।
নির্ব্যাজার্জবভূতস্য চরিতার্থস্য যোগিনঃ ॥ ১৮-৯২ ॥
আত্মবিশ্রান্তিতৃপ্তেন নিরাশেন গতার্তিনা ।
অন্তর্যদনুভূয়েত তৎ কথং কস্য কথ্যতে ॥ ১৮-৯৩ ॥
সুপ্তোঽপি ন সুষুপ্তৌ চ স্বপ্নেঽপি শয়িতো ন চ ।
জাগরেঽপি ন জাগর্তি ধীরস্তৃপ্তঃ পদে পদে ॥ ১৮-৯৪ ॥
জ্ঞঃ সচিন্তোঽপি নিশ্চিন্তঃ সেন্দ্রিয়োঽপি নিরিন্দ্রিয়ঃ ।
সুবুদ্ধিরপি নির্বুদ্ধিঃ সাহঙ্কারোঽনহঙ্কৃতিঃ ॥ ১৮-৯৫ ॥
ন সুখী ন চ বা দুঃখী ন বিরক্তো ন সঙ্গবান্ ।
ন মুমুক্ষুর্ন বা মুক্তা ন কিঞ্চিন্ন্ন চ কিঞ্চন ॥ ১৮-৯৬ ॥
বিক্ষেপেঽপি ন বিক্ষিপ্তঃ সমাধৌ ন সমাধিমান্ ।
জাড্যেঽপি ন জডো ধন্যঃ পাণ্ডিত্যেঽপি ন পণ্ডিতঃ ॥ ১৮-৯৭ ॥
মুক্তো যথাস্থিতিস্বস্থঃ কৃতকর্তব্যনির্বৃতঃ ।
সমঃ সর্বত্র বৈতৃষ্ণ্যান্ন স্মরত্যকৃতং কৃতম্ ॥ ১৮-৯৮ ॥
ন প্রীয়তে বন্দ্যমানো নিন্দ্যমানো ন কুপ্যতি ।
নৈবোদ্বিজতি মরণে জীবনে নাভিনন্দতি ॥ ১৮-৯৯ ॥
ন ধাবতি জনাকীর্ণং নারণ্যমুপশান্তধীঃ ।
যথাতথা যত্রতত্র সম এবাবতিষ্ঠতে ॥ ১৮-১০০ ॥
১৯
জনক উবাচ ॥
তত্ত্ববিজ্ঞানসন্দংশমাদায় হৃদয়োদরাৎ ।
নাবিধপরামর্শশল্যোদ্ধারঃ কৃতো ময়া ॥ ১৯-১ ॥
ক্ব ধর্মঃ ক্ব চ বা কামঃ ক্ব চার্থঃ ক্ব বিবেকিতা ।
ক্ব দ্বৈতং ক্ব চ বাঽদ্বৈতং স্বমহিম্নি স্থিতস্য মে ॥ ১৯-২ ॥
ক্ব ভূতং ক্ব ভবিষ্যদ্ বা বর্তমানমপি ক্ব বা ।
ক্ব দেশঃ ক্ব চ বা নিত্যং স্বমহিম্নি স্থিতস্য মে ॥ ১৯-৩ ॥
ক্ব চাত্মা ক্ব চ বানাত্মা ক্ব শুভং ক্বাশুভং যথা ।
ক্ব চিন্তা ক্ব চ বাচিন্তা স্বমহিম্নি স্থিতস্য মে ॥ ১৯-৪ ॥
ক্ব স্বপ্নঃ ক্ব সুষুপ্তির্বা ক্ব চ জাগরণং তথা ।
ক্ব তুরীয়ং ভয়ং বাপি স্বমহিম্নি স্থিতস্য মে ॥ ১৯-৫ ॥
ক্ব দূরং ক্ব সমীপং বা বাহ্যং ক্বাভ্যন্তরং ক্ব বা ।
ক্ব স্থূলং ক্ব চ বা সূক্ষ্মং স্বমহিম্নি স্থিতস্য মে ॥ ১৯-৬ ॥
ক্ব মৃত্যুর্জীবিতং বা ক্ব লোকাঃ ক্বাস্য ক্ব লৌকিকম্ ।
ক্ব লয়ঃ ক্ব সমাধির্বা স্বমহিম্নি স্থিতস্য মে ॥ ১৯-৭ ॥
অলং ত্রিবর্গকথয়া যোগস্য কথয়াপ্যলম্ ।
অলং বিজ্ঞানকথয়া বিশ্রান্তস্য মমাত্মনি ॥ ১৯-৮ ॥
২০
জনক উবাচ ॥
ক্ব ভূতানি ক্ব দেহো বা ক্বেন্দ্রিয়াণি ক্ব বা মনঃ ।
ক্ব শূন্যং ক্ব চ নৈরাশ্যং মৎস্বরূপে নিরঞ্জনে ॥ ২০-১ ॥
ক্ব শাস্ত্রং ক্বাত্মবিজ্ঞানং ক্ব বা নির্বিষয়ং মনঃ ।
ক্ব তৃপ্তিঃ ক্ব বিতৃষ্ণাৎবং গতদ্বন্দ্বস্য মে সদা ॥ ২০-২ ॥
ক্ব বিদ্যা ক্ব চ বাবিদ্যা ক্বাহং ক্বেদং মম ক্ব বা ।
ক্ব বন্ধ ক্ব চ বা মোক্ষঃ স্বরূপস্য ক্ব রূপিতা ॥ ২০-৩ ॥
ক্ব প্রারব্ধানি কর্মাণি জীবন্মুক্তিরপি ক্ব বা ।
ক্ব তদ্ বিদেহকৈবল্যং নির্বিশেষস্য সর্বদা ॥ ২০-৪ ॥
ক্ব কর্তা ক্ব চ বা ভোক্তা নিষ্ক্রিয়ং স্ফুরণং ক্ব বা ।
ক্বাপরোক্ষং ফলং বা ক্ব নিঃস্বভাবস্য মে সদা ॥ ২০-৫ ॥
ক্ব লোকং ক্ব মুমুক্ষুর্বা ক্ব যোগী জ্ঞানবান্ ক্ব বা ।
ক্ব বদ্ধঃ ক্ব চ বা মুক্তঃ স্বস্বরূপেঽহমদ্বয়ে ॥ ২০-৬ ॥
ক্ব সৃষ্টিঃ ক্ব চ সংহারঃ ক্ব সাধ্যং ক্ব চ সাধনম্ ।
ক্ব সাধকঃ ক্ব সিদ্ধির্বা স্বস্বরূপেঽহমদ্বয়ে ॥ ২০-৭ ॥
ক্ব প্রমাতা প্রমাণং বা ক্ব প্রমেয়ং ক্ব চ প্রমা ।
ক্ব কিঞ্চিৎ ক্ব ন কিঞ্চিদ্ বা সর্বদা বিমলস্য মে ॥ ২০-৮ ॥
ক্ব বিক্ষেপঃ ক্ব চৈকাগ্র্যং ক্ব নির্বোধঃ ক্ব মূঢতা ।
ক্ব হর্ষঃ ক্ব বিষাদো বা সর্বদা নিষ্ক্রিয়স্য মে ॥ ২০-৯ ॥
ক্ব চৈষ ব্যবহারো বা ক্ব চ সা পরমার্থতা ।
ক্ব সুখং ক্ব চ বা দুখং নির্বিমর্শস্য মে সদা ॥ ২০-১০ ॥
ক্ব মায়া ক্ব চ সংসারঃ ক্ব প্রীতির্বিরতিঃ ক্ব বা ।
ক্ব জীবঃ ক্ব চ তদ্ব্রহ্ম সর্বদা বিমলস্য মে ॥ ২০-১১ ॥
ক্ব প্রবৃত্তির্নির্বৃত্তির্বা ক্ব মুক্তিঃ ক্ব চ বন্ধনম্ ।
কূটস্থনির্বিভাগস্য স্বস্থস্য মম সর্বদা ॥ ২০-১২ ॥
ক্বোপদেশঃ ক্ব বা শাস্ত্রং ক্ব শিষ্যঃ ক্ব চ বা গুরুঃ ।
ক্ব চাস্তি পুরুষার্থো বা নিরুপাধেঃ শিবস্য মে ॥ ২০-১৩ ॥
ক্ব চাস্তি ক্ব চ বা নাস্তি ক্বাস্তি চৈকং ক্ব চ দ্বয়ম্ ।
বহুনাত্র কিমুক্তেন কিঞ্চিন্নোত্তিষ্ঠতে মম ॥ ২০-১৪ ॥
ইতি অষ্টাবক্রগীতা সমাপ্তা ।
॥ ওঁ তৎসৎ ॥
Also Read:
Ashtavakra Gita Lyrics in Hindi | English | Bengali | Gujarati | Kannada | Malayalam | Oriya | Telugu | Tamil
