ಚೈತನ್ಯಾಷ್ಟಕಮ್ 1 Lyrics in Kannada:
ಅಥ ಶ್ರೀಚೈತನ್ಯದೇವಸ್ಯ ಪ್ರಥಮಾಷ್ಟಕಂ
ಸದೋಪಾಸ್ಯಃ ಶ್ರೀಮಾನ್ ಧೃತಮನುಜಕಾಯೈಃ ಪ್ರಣಯಿತಾಂ
ವಹದ್ಭಿರ್ಗೀರ್ವಾಣೈರ್ಗಿರಿಶಪರಮೇಷ್ಠಿಪ್ರಭೃತಿಭಿಃ ।
ಸ್ವಭಕ್ತೇಭ್ಯಃ ಶುದ್ಧಾಂ ನಿಜಭಜನಮುದ್ರಾಮುಪದಿಶನ್
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 1॥
ಸುರೇಶಾನಾಂ ದುರ್ಗಂ ಗತಿರತಿಶಯೇನೋಪನಿಷದಾಂ
ಮುನೀನಾಂ ಸರ್ವಸ್ವಂ ಪ್ರಣತಪಟಲೀನಾಂ ಮಧುರಿಮಾ ।
ವಿನಿರ್ಯಾಸಃ ಪ್ರೇಮ್ಣೋ ನಿಖಿಲಪಶುಪಾಲಾಮ್ಬುಜದೃಶಾಂ
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 2॥
ಸ್ವರೂಪಂ ಬಿಭ್ರಾಣೋ ಜಗದತುಲಮದ್ವೈತದಯಿತಃ
ಪ್ರಪನ್ನಶ್ರೀವಾಸೋ ಜನಿತಪರಮಾನನ್ದಗರಿಮಾ ।
ಹರಿರ್ದೀನೋದ್ಧಾರೀ ಗಜಪತಿಕೃಪೋತ್ಸೇಕತರಲಃ
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 3॥
ರಸೋದ್ದಾಮಾ ಕಾಮಾರ್ಬುದಮಧುರಧಾಮೋಜ್ಜ್ವಲತನು-
ರ್ಯತೀನಾಮುತ್ತಂಸಸ್ತರಣಿಕರವಿದ್ಯೋತಿವಸನಃ
ಹಿರಣ್ಯಾನಾಂ ಲಕ್ಷ್ಮೀಭರಮಭಿಭವನ್ನ್ ಆಂಗಿಕರುಚಾ
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 4॥
ಹರೇ ಕೃಷ್ಣೇತ್ಯುಚ್ಚೈಃ ಸ್ಫುರಿತರಸನೋ ನಾಮಗಣನಾ
ಕೃತಗ್ರನ್ಥಿಶ್ರೇಣೀಸುಭಗಕಟಿಸೂತ್ರೋಜ್ಜ್ವಲಕರಃ ।
ವಿಶಾಲಾಕ್ಷೋ ದೀರ್ಘಾರ್ಗಲಯುಗಲಖೇಲಾಂಚಿತಭುಜಃ
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 5॥
ಪಯೋರಾಶೇಸ್ತೀರೇ ಸ್ಫುರದುಪವನಾಲೀಕಲನಯಾ
ಮುಹುರ್ವೃನ್ದಾರಣ್ಯಸ್ಮರಣಜನಿತಪ್ರೇಮವಿವಶಃ ।
ಕ್ವಚಿತ್ ಕೃಷ್ಣಾವೃತ್ತಿಪ್ರಚಲರಸನೋಭಕ್ತಿರಸಿಕಃ
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 6॥
ರಥಾರೂಢಸ್ಯಾರಾದಧಿಪದವಿ ನೀಲಾಚಲಪತೇ-
ರದಭ್ರಪ್ರೇಮೋರ್ಮಿಸ್ಫುರಿತನಟನೋಲ್ಲಾಸವಿವಶಃ ।
ಸಹರ್ಷಂ ಗಾಯದ್ಭಿಃ ಪರಿವೃತತನುರ್ವೈಷ್ಣವಜನೈಃ
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 7॥
ಭುವಂ ಸಿಂಚನ್ನಶ್ರುಶ್ರುತಿಭಿರಭಿತಃ ಸಾನ್ದ್ರಪುಲಕೈಃ
ಪರೀತಾಂಗೋ ನೀಪಸ್ತಬಕನವಕಿಂಜಲ್ಕಜಯಿಭಿಃ ।
ಘನಸ್ವೇದಸ್ತೋಮಸ್ತಿಮಿತತನುರುತ್ಕೀರ್ತನಸುಖೀ
ಸ ಚೈತನ್ಯಃ ಕಿಂ ಮೇ ಪುನರಪಿ ದೃಶೋರ್ಯಾಸ್ಯತಿ ಪದಮ್ ॥ 8॥
ಅಧೀತೇ ಗೌರಾಂಗಸ್ಮರಣಪದವೀಮಂಗಲತರಂ
ಕೃತೀ ಯೋ ವಿಶ್ರಮ್ಭಸ್ಫುರದಮಲಧೀರಷ್ಟಕಮಿದಂ ।
ಪರಾನನ್ದೇ ಸದ್ಯಸ್ತದಮಲಪದಾಮ್ಭೋಜಯುಗಲೇ
ಪರಿಸ್ಫಾರಾ ತಸ್ಯ ಸ್ಫುರತು ನಿತರಾಂ ಪ್ರೇಮಲಹರೀ ॥ 9॥
ಇತಿ ಶ್ರೀರೂಪಗೋಸ್ವಾಮಿವಿರಚಿತಸ್ತವಮಾಲಾಯಾಂ ಚೈತನ್ಯಾಷ್ಟಕಂ ಪ್ರಥಮಂ ಸಮ್ಪೂರ್ಣಮ್ ।
