ଚୈତନ୍ୟାଷ୍ଟକମ୍ ୧ Lyrics in Oriya:
ଅଥ ଶ୍ରୀଚୈତନ୍ୟଦେଵସ୍ୟ ପ୍ରଥମାଷ୍ଟକଂ
ସଦୋପାସ୍ୟଃ ଶ୍ରୀମାନ୍ ଧୃତମନୁଜକାୟୈଃ ପ୍ରଣୟିତାଂ
ଵହଦ୍ଭିର୍ଗୀର୍ଵାଣୈର୍ଗିରିଶପରମେଷ୍ଠିପ୍ରଭୃତିଭିଃ ।
ସ୍ଵଭକ୍ତେଭ୍ୟଃ ଶୁଦ୍ଧାଂ ନିଜଭଜନମୁଦ୍ରାମୁପଦିଶନ୍
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୧॥
ସୁରେଶାନାଂ ଦୁର୍ଗଂ ଗତିରତିଶୟେନୋପନିଷଦାଂ
ମୁନୀନାଂ ସର୍ଵସ୍ଵଂ ପ୍ରଣତପଟଲୀନାଂ ମଧୁରିମା ।
ଵିନିର୍ୟାସଃ ପ୍ରେମ୍ଣୋ ନିଖିଲପଶୁପାଲାମ୍ବୁଜଦୃଶାଂ
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୨॥
ସ୍ଵରୂପଂ ବିଭ୍ରାଣୋ ଜଗଦତୁଲମଦ୍ଵୈତଦୟିତଃ
ପ୍ରପନ୍ନଶ୍ରୀଵାସୋ ଜନିତପରମାନନ୍ଦଗରିମା ।
ହରିର୍ଦୀନୋଦ୍ଧାରୀ ଗଜପତିକୃପୋତ୍ସେକତରଲଃ
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୩॥
ରସୋଦ୍ଦାମା କାମାର୍ବୁଦମଧୁରଧାମୋଜ୍ଜ୍ଵଲତନୁ-
ର୍ୟତୀନାମୁତ୍ତଂସସ୍ତରଣିକରଵିଦ୍ୟୋତିଵସନଃ
ହିରଣ୍ୟାନାଂ ଲକ୍ଷ୍ମୀଭରମଭିଭଵନ୍ନ୍ ଆଙ୍ଗିକରୁଚା
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୪॥
ହରେ କୃଷ୍ଣେତ୍ୟୁଚ୍ଚୈଃ ସ୍ଫୁରିତରସନୋ ନାମଗଣନା
କୃତଗ୍ରନ୍ଥିଶ୍ରେଣୀସୁଭଗକଟିସୂତ୍ରୋଜ୍ଜ୍ଵଲକରଃ ।
ଵିଶାଲାକ୍ଷୋ ଦୀର୍ଘାର୍ଗଲୟୁଗଲଖେଲାଞ୍ଚିତଭୁଜଃ
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୫॥
ପୟୋରାଶେସ୍ତୀରେ ସ୍ଫୁରଦୁପଵନାଲୀକଲନୟା
ମୁହୁର୍ଵୃନ୍ଦାରଣ୍ୟସ୍ମରଣଜନିତପ୍ରେମଵିଵଶଃ ।
କ୍ଵଚିତ୍ କୃଷ୍ଣାଵୃତ୍ତିପ୍ରଚଲରସନୋଭକ୍ତିରସିକଃ
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୬॥
ରଥାରୂଢସ୍ୟାରାଦଧିପଦଵି ନୀଲାଚଲପତେ-
ରଦଭ୍ରପ୍ରେମୋର୍ମିସ୍ଫୁରିତନଟନୋଲ୍ଲାସଵିଵଶଃ ।
ସହର୍ଷଂ ଗାୟଦ୍ଭିଃ ପରିଵୃତତନୁର୍ଵୈଷ୍ଣଵଜନୈଃ
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୭॥
ଭୁଵଂ ସିଞ୍ଚନ୍ନଶ୍ରୁଶ୍ରୁତିଭିରଭିତଃ ସାନ୍ଦ୍ରପୁଲକୈଃ
ପରୀତାଙ୍ଗୋ ନୀପସ୍ତବକନଵକିଞ୍ଜଲ୍କଜୟିଭିଃ ।
ଘନସ୍ଵେଦସ୍ତୋମସ୍ତିମିତତନୁରୁତ୍କୀର୍ତନସୁଖୀ
ସ ଚୈତନ୍ୟଃ କିଂ ମେ ପୁନରପି ଦୃଶୋର୍ୟାସ୍ୟତି ପଦମ୍ ॥ ୮॥
ଅଧୀତେ ଗୌରାଙ୍ଗସ୍ମରଣପଦଵୀମଙ୍ଗଲତରଂ
କୃତୀ ୟୋ ଵିଶ୍ରମ୍ଭସ୍ଫୁରଦମଲଧୀରଷ୍ଟକମିଦଂ ।
ପରାନନ୍ଦେ ସଦ୍ୟସ୍ତଦମଲପଦାମ୍ଭୋଜୟୁଗଲେ
ପରିସ୍ଫାରା ତସ୍ୟ ସ୍ଫୁରତୁ ନିତରାଂ ପ୍ରେମଲହରୀ ॥ ୯॥
ଇତି ଶ୍ରୀରୂପଗୋସ୍ଵାମିଵିରଚିତସ୍ତଵମାଲାୟାଂ ଚୈତନ୍ୟାଷ୍ଟକଂ ପ୍ରଥମଂ ସମ୍ପୂର୍ଣମ୍ ।
