ಚೈತನ್ಯಾಷ್ಟಕಮ್ 3 Lyrics in Kannada:
ಅಥ ಶ್ರೀಚೈತನ್ಯದೇವಸ್ಯ ತೃತೀಯಾಷ್ಟಕಂ
ಉಪಾಸಿತಪದಾಮ್ಬುಜಸ್ತ್ವಮನುರಕ್ತರುದ್ರಾದಿಭಿಃ
ಪ್ರಪದ್ಯ ಪುರುಷೋತ್ತಮಂ ಪದಮದಭ್ರಮುದ್ಭ್ರಾಜಿತಃ ।
ಸಮಸ್ತನತಮಂಡಲೀಸ್ಫುರದಭೀಷ್ಟಕಲ್ಪದ್ರುಮಃ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 1॥
ನ ವರ್ಣಯಿತುಮೀಶತೇ ಗುರುತರಾವತಾರಾಯಿತಾ
ಭವನ್ತಮುರುಬುದ್ಧಯೋ ನ ಖಲು ಸಾರ್ವಭೌಮಾದಯಃ ।
ಪರೋ ಭವತು ತತ್ರ ಕಃ ಪಟುರತೋ ನಮಸ್ತೇ ಪರಂ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 2॥
ನ ಯತ್ ಕಥಮಪಿ ಶ್ರುತಾವುಪನಿಷದ್ಭಿರಪ್ಯಾಹಿತಂ
ಸ್ವಯಂ ಚ ವಿವೃತಂ ನ ಯದ್ ಗುರುತರಾವತಾರಾನ್ತರೇ ।
ಕ್ಷಿಪನ್ನಸಿ ರಸಾಮ್ಬುಧೇ ತದಿಹ ಭಾಕ್ತರತ್ನಂ ಕ್ಷಿತೌ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 3॥
ನಿಜಪ್ರಣಯವಿಸ್ಫುರನ್ನಟನರಂಗವಿಸ್ಮಾಪಿತ
ತ್ರಿನೇತ್ರನತಮಂಡಲಪ್ರಕಟಿತಾನುರಾಗಾಮೃತ ।
ಅಹಂಕೃತಿಕಲಂಕಿತೋದ್ಧತಜನಾದಿದುರ್ಬೋಧ ಹೇ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 4॥
ಭವನ್ತಿ ಭುವಿ ಯೇ ನರಾಃ ಕಲಿತದುಷ್ಕುಲೋತ್ಪತ್ತಯ-
ಸ್ತ್ವಮುದ್ಧರಸಿ ತಾನ್ ಅಪಿ ಪ್ರಚುರಚಾರುಕಾರುಣ್ಯತಃ ।
ಇತಿ ಪ್ರಮುದಿತಾನ್ತರಃ ಶರಣಮಾಶ್ರಿತಸ್ತ್ವಾಮಹಂ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 5॥
ಮುಖಾಮ್ಬುಜಪರಿಸ್ಖಲನ್ಮೃದುಲವಾಙ್ಮಧೂಲೀರಸ
ಪ್ರಸಂಗಜನಿತಾಖಿಲಪ್ರಣತಭೃಂಗರಂಗೋತ್ಕರ ।
ಸಮಸ್ತಜನಮಂಗಲಪ್ರಭವನಾಮರತ್ನಾಮ್ಬುಧೇ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 6॥
ಮೃಗಾಂಕಮಧುರಾನನ ಸ್ಫುರದನಿದ್ರಪದ್ಮೇಕ್ಷಣ
ಸ್ಮಿತಸ್ತವಕಸುನ್ದರಾಧರ ವಿಶಂಕಟೋರಸ್ತಟೇ ।
ಭುಜೋದ್ಧತಭುಜಂಗಮಪ್ರಭ ಮನೋಜಕೋಟಿದ್ಯುತೇ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 7॥
ಅಹಂ ಕನಕಕೇತಕೀಕುಸುಮಗೌರ ದುಷ್ಟಃ ಕ್ಷಿತೌ
ನ ದೋಷಲವದರ್ಶಿತಾ ವಿವಿಧದೋಷಪೂರ್ಣೇಽಪಿ ತೇ ।
ಅತಃ ಪ್ರವಣಯಾ ಧಿಯಾ ಕೃಪಣವತ್ಸಲ ತ್ವಾಂ ಭಜೇ
ಶಚೀಸುತ ಮಯಿ ಪ್ರಭೋ ಕುರು ಮುಕುನ್ದ ಮನ್ದೇ ಕೃಪಾಮ್ ॥ 8॥
ಇದಂ ಧರಣಿಮಂಡಲೋತ್ಸವ ಭವತ್ಪದಾಂಕೇಷು ಯೇ
ನಿವಿಷ್ಟಮನಸೋ ನರಾಃ ಪರಿಪಠನ್ತಿ ಪದ್ಯಾಷ್ಟಕಮ್ ।
ಶಚೀಹೃದಯನನ್ದನ ಪ್ರಕಟಕೀರ್ತಿಚನ್ದ್ರ ಪ್ರಭೋ
ನಿಜಪ್ರಣಯನಿರ್ಭರಂ ವಿತರ ದೇವ ತೇಭ್ಯಃ ಶುಭಮ್ ॥ 9॥
ಇತಿ ಶ್ರೀರೂಪಗೋಸ್ವಾಮಿವಿರಚಿತಸ್ತವಮಾಲಾಯಾಂ ಚೈತನ್ಯಾಷ್ಟಕಂ ತೃತೀಯಂ ಸಮ್ಪೂರ್ಣಮ್ ।
