చైతన్యాష్టకమ్ ౩ Lyrics in Telugu:
అథ శ్రీచైతన్యదేవస్య తృతీయాష్టకం
ఉపాసితపదామ్బుజస్త్వమనురక్తరుద్రాదిభిః
ప్రపద్య పురుషోత్తమం పదమదభ్రముద్భ్రాజితః ।
సమస్తనతమణ్డలీస్ఫురదభీష్టకల్పద్రుమః
శచీసుత మయి ప్రభో కురు ముకున్ద మన్దే కృపామ్ ॥ ౧॥
న వర్ణయితుమీశతే గురుతరావతారాయితా
భవన్తమురుబుద్ధయో న ఖలు సార్వభౌమాదయః ।
పరో భవతు తత్ర కః పటురతో నమస్తే పరం
శచీసుత మయి ప్రభో కురు ముకున్ద మన్దే కృపామ్ ॥ ౨॥
న యత్ కథమపి శ్రుతావుపనిషద్భిరప్యాహితం
స్వయం చ వివృతం న యద్ గురుతరావతారాన్తరే ।
క్షిపన్నసి రసామ్బుధే తదిహ భాక్తరత్నం క్షితౌ
శచీసుత మయి ప్రభో కురు ముకున్ద మన్దే కృపామ్ ॥ ౩॥
నిజప్రణయవిస్ఫురన్నటనరఙ్గవిస్మాపిత
త్రినేత్రనతమణ్డలప్రకటితానురాగామృత ।
అహఙ్కృతికలఙ్కితోద్ధతజనాదిదుర్బోధ హే
శచీసుత మయి ప్రభో కురు ముకున్ద మన్దే కృపామ్ ॥ ౪॥
భవన్తి భువి యే నరాః కలితదుష్కులోత్పత్తయ-
స్త్వముద్ధరసి తాన్ అపి ప్రచురచారుకారుణ్యతః ।
ఇతి ప్రముదితాన్తరః శరణమాశ్రితస్త్వామహం
శచీసుత మయి ప్రభో కురు ముకున్ద మన్దే కృపామ్ ॥ ౫॥
ముఖామ్బుజపరిస్ఖలన్మృదులవాఙ్మధూలీరస
ప్రసఙ్గజనితాఖిలప్రణతభృఙ్గరఙ్గోత్కర ।
సమస్తజనమఙ్గలప్రభవనామరత్నామ్బుధే
శచీసుత మయి ప్రభో కురు ముకున్ద మన్దే కృపామ్ ॥ ౬॥
మృగాఙ్కమధురానన స్ఫురదనిద్రపద్మేక్షణ
స్మితస్తవకసున్దరాధర విశఙ్కటోరస్తటే ।
భుజోద్ధతభుజఙ్గమప్రభ మనోజకోటిద్యుతే
శచీసుత మయి ప్రభో కురు ముకున్ద మన్దే కృపామ్ ॥ ౭॥
అహం కనకకేతకీకుసుమగౌర దుష్టః క్షితౌ
న దోషలవదర్శితా వివిధదోషపూర్ణేఽపి తే ।
అతః ప్రవణయా ధియా కృపణవత్సల త్వాం భజే
శచీసుత మయి ప్రభో కురు ముకున్ద మన్దే కృపామ్ ॥ ౮॥
ఇదం ధరణిమణ్డలోత్సవ భవత్పదాఙ్కేషు యే
నివిష్టమనసో నరాః పరిపఠన్తి పద్యాష్టకమ్ ।
శచీహృదయనన్దన ప్రకటకీర్తిచన్ద్ర ప్రభో
నిజప్రణయనిర్భరం వితర దేవ తేభ్యః శుభమ్ ॥ ౯॥
ఇతి శ్రీరూపగోస్వామివిరచితస్తవమాలాయాం చైతన్యాష్టకం తృతీయం సమ్పూర్ణమ్ ।
