ചൈതന്യാഷ്ടകം 3 Lyrics in Malayalam:
അഥ ശ്രീചൈതന്യദേവസ്യ തൃതീയാഷ്ടകം
ഉപാസിതപദാംബുജസ്ത്വമനുരക്തരുദ്രാദിഭിഃ
പ്രപദ്യ പുരുഷോത്തമം പദമദഭ്രമുദ്ഭ്രാജിതഃ ।
സമസ്തനതമണ്ഡലീസ്ഫുരദഭീഷ്ടകല്‍പദ്രുമഃ
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 1॥
ന വര്‍ണയിതുമീശതേ ഗുരുതരാവതാരായിതാ
ഭവന്തമുരുബുദ്ധയോ ന ഖലു സാര്‍വഭൌമാദയഃ ।
പരോ ഭവതു തത്ര കഃ പടുരതോ നമസ്തേ പരം
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 2॥
ന യത് കഥമപി ശ്രുതാവുപനിഷദ്ഭിരപ്യാഹിതം
സ്വയം ച വിവൃതം ന യദ് ഗുരുതരാവതാരാന്തരേ ।
ക്ഷിപന്നസി രസാംബുധേ തദിഹ ഭാക്തരത്നം ക്ഷിതൌ
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 3॥
നിജപ്രണയവിസ്ഫുരന്നടനരങ്ഗവിസ്മാപിത
ത്രിനേത്രനതമണ്ഡലപ്രകടിതാനുരാഗാമൃത ।
അഹങ്കൃതികലങ്കിതോദ്ധതജനാദിദുര്‍ബോധ ഹേ
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 4॥
ഭവന്തി ഭുവി യേ നരാഃ കലിതദുഷ്കുലോത്പത്തയ-
സ്ത്വമുദ്ധരസി താന്‍ അപി പ്രചുരചാരുകാരുണ്യതഃ ।
ഇതി പ്രമുദിതാന്തരഃ ശരണമാശ്രിതസ്ത്വാമഹം
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 5॥
മുഖാംബുജപരിസ്ഖലന്‍മൃദുലവാങ്മധൂലീരസ
പ്രസങ്ഗജനിതാഖിലപ്രണതഭൃങ്ഗരങ്ഗോത്കര ।
സമസ്തജനമങ്ഗലപ്രഭവനാമരത്നാംബുധേ
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 6॥
മൃഗാങ്കമധുരാനന സ്ഫുരദനിദ്രപദ്മേക്ഷണ
സ്മിതസ്തവകസുന്ദരാധര വിശങ്കടോരസ്തടേ ।
ഭുജോദ്ധതഭുജങ്ഗമപ്രഭ മനോജകോടിദ്യുതേ
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 7॥
അഹം കനകകേതകീകുസുമഗൌര ദുഷ്ടഃ ക്ഷിതൌ
ന ദോഷലവദര്‍ശിതാ വിവിധദോഷപൂര്‍ണേഽപി തേ ।
അതഃ പ്രവണയാ ധിയാ കൃപണവത്സല ത്വാം ഭജേ
ശചീസുത മയി പ്രഭോ കുരു മുകുന്ദ മന്ദേ കൃപാം ॥ 8॥
ഇദം ധരണിമണ്ഡലോത്സവ ഭവത്പദാങ്കേഷു യേ
നിവിഷ്ടമനസോ നരാഃ പരിപഠന്തി പദ്യാഷ്ടകം ।
ശചീഹൃദയനന്ദന പ്രകടകീര്‍തിചന്ദ്ര പ്രഭോ
നിജപ്രണയനിര്‍ഭരം വിതര ദേവ തേഭ്യഃ ശുഭം ॥ 9॥
ഇതി ശ്രീരൂപഗോസ്വാമിവിരചിതസ്തവമാലായാം ചൈതന്യാഷ്ടകം തൃതീയം സമ്പൂര്‍ണം ।
