গণেশাষ্টকম্ ৩ Lyrics in Bengali:
গজবদন গণেশ ত্বং বিভো বিশ্বমূর্তে!
হরসি সকলবিঘ্নান্ বিঘ্নরাজ প্রজানাম্ ।
ভবতি জগতি পূজা পূর্বমেব ত্বদীয়া
বরদবর কৃপালো চন্দ্রমৌলে প্রসীদ ॥ ১॥
সপদি সকলবিঘ্নাং য়ান্তি দূরে দয়ালো
তব শুচি রুচিরং স্যান্নামসঙ্কীর্তনং চেত্ ।
অত ইহ মনুজাস্ত্বাং সর্বকার্যে স্মরন্তি
বরদবর কৃপালো চন্দ্রমৌলে প্রসীদ ॥ ২॥
সকলদুরিতহন্তুঃ ত স্বর্গমোক্ষাদিদাতুঃ
সুররিপুবধকর্ত্তুঃ সর্ববিঘ্নপ্রহর্ত্তুঃ ।
তব ভবতি কৃপাতোঽশেষ-সম্পত্তিলাভো
বরদবর কৃপালো চন্দ্রমৌলে প্রসীদ ॥ ৩॥
তব গণপ গুণানাং বর্ণনে নৈব শক্তা
জগতি সকলবন্দ্যা শারদা সর্বকালে ।
তদিতর মনুজানাং কা কথা ভালদৃষ্টে
বরদবর কৃপালো চন্দ্রমৌলে প্রসীদ ॥ ৪॥
বহুতরমনুজৈস্তে দিব্যনাম্নাং সহস্রৈঃ ।
স্তুতিহুতিকরণেন প্রাপ্যতে সর্বসিদ্ধিঃ ।
বিধিরয়মখিলো বৈ তন্ত্রশাস্ত্রে প্রসিদ্ধঃ
বরদবর কৃপালো চন্দ্রমৌলে প্রসীদ ॥ ৫॥
ত্বদিতরদিহ নাস্তে সচ্চিদানন্দমূর্ত্তে
ইতি নিগদতি শাস্ত্রং বিশ্বরূপং ত্রিনেত্র ।
ত্বমসি হরিরথ ত্বং শঙ্করস্ত্বং বিধাতা
বরদবর কৃপালো চন্দ্রমৌলেঃ প্রসীদ ॥ ৬॥
সকলসুখদ মায়া য়া ত্বদীয়া প্রসিদ্ধা
শশধরধরসূনে ত্বং তয়া ক্রীডসীহ ।
নট ইব বহুবেষং সর্বদা সংবিধায়
বরদবর কৃপালো চন্দ্রমৌলে প্রসীদ ॥ ৭॥
ভব ইহ পুরতস্তে পাত্ররূপেণ ভর্ত্তঃ
বহুবিধনরলীলাং ত্বাং প্রদর্শ্যাশু য়াচে ।
সপদি ভবসমুদ্রান্মাং সমুদ্ধারয়স্ব
বরদবর কৃপালো চন্দ্রমৌলে প্রসীদ ॥ ৮॥
অষ্টকং গণনাথস্য ভক্ত্যা য়ো মানবঃ পঠেত্
তস্য বিঘ্নাঃ প্রণশ্যন্তি গণেশস্য প্রসাদতঃ ॥ ৯॥
ইতি জগদ্গুরু-শঙ্করাচার্য-স্বামিশ্রীশান্তানন্দসরস্বতী-শিষ্য-
স্বামি- শ্রীমদনন্তানন্দসরস্বতীবিরচিতং গণেশাষ্টকং সম্পূর্ণম্ ।
