ಗಂಗಾಷ್ಟಕಮ್ Lyrics in Kannada:
ನ ಶಕ್ತಾಸ್ತ್ವಾಂ ಸ್ತೋತುಂ ವಿಧಿಹರಿಹರಾ ಜಹ್ನತನಯೇ
ಗುಣೋತ್ಕರ್ಷಾಖ್ಯಾನಂ ತ್ವಯಿ ನ ಘಟತೇ ನಿರ್ಗುಣಪದೇ ।
ಅತಸ್ತೇ ಸಂಸ್ತುತ್ಯೈ ಕೃತಮತಿರಹಂ ದೇವಿ ಸುಧಿಯಾಂ
ವಿನಿನ್ದ್ಯೋ ಯದ್ವೇದಾಶ್ಚಕಿತಮಭಿಗಾಯನ್ತಿ ಭವತೀಮ್ ॥ 1॥
ತಥಾಽಪಿ ತ್ವಾಂ ಪಾಪಃ ಪತಿತಜನತೋದ್ಧಾರನಿಪುಣೇ
ಪ್ರವೃತ್ತೋಽಹಂ ಸ್ತೋತುಂ ಪ್ರಕೃತಿಚಲಯಾ ಬಾಲಕಧಿಯಾ ।
ಅತೋ ದೃಷ್ಟೋತ್ಸಾಹೇ ಭವತಿ ಭವಭಾರೈಕದಹನೇ
ಮಯಿ ಸ್ತುತ್ಯೇ ಗಂಗೇ ಕುರು ಪರಕೃಪಾಂ ಪರ್ವತಸುತೇ ॥ 2॥
ನ ಸಂಸಾರೇ ತಾವತ್ಕಲುಷಮಿಹ ಯಾವತ್ತವ ಪಯೋ
ದಹತ್ಯಾರ್ಯೇ ಸದ್ಯೋ ದಹನ ಇವ ಶುಷ್ಕಂ ತೃಣಚಯಮ್ ।
ಪಲಾಯನ್ತೇ ದೃಷ್ಟ್ವಾ ತವ ಪರಿಚರಾನನ್ತಕಜನಾ
ಯಥಾ ವನ್ಯಾ ವಾಽನ್ಯೇ ವನಪತಿಭಯಾದ್ ವಾಮನಮೃಗಾಃ ॥ 3॥
ಜನಾ ಯೇ ತೇ ಮಾತರ್ನಿಧನಸಮಯೇ ತೋಯಕಣಿಕಾಂ
ಮುಖೇ ಕೃತ್ವಾ ಪ್ರಾಣಾಂಜಹತಿ ಸುರಸಂಘೈರನುವೃತಾ ।
ವಿಮಾನೇ ಕ್ರೀಡನ್ತೋಽಮರಪತಿಪದಂ ಯಾನ್ತಿ ನಿಯತಂ
ಕಥಾ ತೇಷಾಂ ಕಾ ವಾ ಜನನಿ ತವ ತೀರೇ ನಿವಸತಾಮ್ ॥ 4॥
ಶಿವಃ ಸರ್ವಾರಾಧ್ಯೋ ಜನನಿ ವಿಷತಾಪೋಪಶಮನಂ
ಚರೀಕರ್ತುಂ ಗಂಗೇ ಕಲಿಕಲುಷಭಂಗೇ ಪಶುಪತಿಃ ।
ಜಟಾಯಾಂ ಸನ್ಧತ್ತ ಲಲಿತಲಹರೀಂ ತ್ವಾಂ ಸುರನದೀ
ತ್ವದನ್ಯಾ ಕಾ ವನ್ದ್ಯಾ ಪರಮಮಹಿತಾ ವಾ ತ್ರಿಭುವನೇ ॥ 5॥
ಜನಸ್ತಾವನ್ಮಾತರ್ದುರಿತಭಯತೋ ಬಿಭ್ಯತಿ ಸೃತೌ
ನ ಯಾವತ್ತ್ವತ್ತೀರಂ ನಯನಪಥಮಾಯಾತಿ ವಿಮಲಮ್ ।
ಯದಾಪ್ತಂ ತ್ವತ್ತೀರಂ ತದನು ದುರಿತಾನಾಂ ನ ಗಣನಾ
ತತೋ ಗಂಗೇ! ವನ್ದ್ಯಾ ಮುನಿಸಮುದಯಾಸ್ತ್ವಾಂ ನ ಜಹತಿ ॥ 6॥
ನಮಾಮಿ ತ್ವಾಂ ಗಂಗೇ ಶ್ರುತಿವನವಿಹಾರೈಕನಿಪುಣೇ
ಜಗನ್ಮಾತರ್ಮಾತಸ್ತ್ರಿಪುರಹರಸೇವ್ಯೇ ವಿಧಿನುತೇ ।
ತ್ವಮೇವಾದ್ಯಾ ದುರ್ಗಾ ಜನಹಿತಕೃತೇ ತ್ವಂ ದ್ರವಮಯೀ
ಸ್ವಯಂ ಜಾತಾ ದೇವಿ ತ್ವಮಸಿ ಪರಮಂ ಬ್ರಹ್ಮ ವಿದಿತಮ್ ॥ 7॥
ಕದಾ ಗಂಗೇ ರಮ್ಯೇ ತಟಮಧಿವಸಸ್ತೇ ಶಿವನುತೇ
ಶಿವೇ ದುರ್ಗೇ ಮಾತಃ ಸಕಲಫಲದೇ ದೇವದಯಿತೇ ।
ಪರೇಶೇ ಸರ್ವೇಶೇ ಶ್ರುತಿಶತನುತೇ ದಕ್ಷತನಯೇ
ಸದಾಽಹಂ ಸಂಜಲ್ಪನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ 8॥
ಗಂಗಾಷ್ಟಕಮಿದಂ ಪುಣ್ಯಂ ಪ್ರಭಾತೇ ಯಃ ಪಠೇಚ್ಛುಚಿಃ ।
ಸರ್ವಾಭೀಷ್ಟಂ ತತಸ್ತಸ್ಮೈ ದದಾತಿ ಸುರನಿಮ್ನಗಾ ॥ 9॥
ಇತಿ ಸ್ವಾಮಿ-ಶ್ರೀಮದನನ್ತಾನನ್ದಸರಸ್ವತೀವಿರಚಿತಂ ಗಂಗಾಷ್ಟಕಂ ಸಮ್ಪೂರ್ಣಮ್ ।
