కామాసికాష్టకమ్ Lyrics in Telugu:
శ్రీవేదాన్తదేశికృతమ్ ।
(కాఞ్చ్యాం)
శ్రుతీనాముత్తరం భాగం వేగవత్యాశ్చ దక్షిణమ్ ।
కామాదధివసన్ జీయాత్కశ్చిదద్భుతకేసరీ ॥ ౧॥
తపనేన్ద్వగ్నినయనః తాపానపచినోతు నః ।
తాపనీయరహస్యానాం సారః కామాసికాహరిః ॥ ౨॥
ఆకణ్ఠమాదిపురుషం కణ్ఠీరవముపరి కుణ్ఠితారాతిమ్ ।
వేగోపకణ్ఠసఙ్గాద్విముక్తవైకుణ్ఠబహుమతిముపాసే ॥ ౩॥
బన్ధుమఖిలస్య జన్తోర్బన్ధురపర్యఙ్కబన్ధరమణీయమ్ ।
విషమవిలోచనమీడే వేగవతీపులినకేలినరసింహమ్ ॥ ౪॥
స్వస్థానేషు మరుద్గణాన్ నియమయన్ స్వాధీనసర్వేన్ద్రియః
పర్యఙ్కస్థిరధారణాప్రకటితప్రత్యఙ్ముఖావస్థితిః ।
ప్రాయేణ ప్రణిపేదుషః ప్రభురసౌ యోగం నిజం శిక్షయన్
కామానాతనుతాదశేష జగతాం కామాసికా కేసరీ ॥ ౫॥
వికస్వరనఖస్వరుక్షతహిరణ్యవక్షఃస్థలీ
నిరర్గలవినిర్గలద్రుధిరసిన్ధుసన్ధ్యాయితాః ।
అవన్తు మదనాసికా మనుజపఞ్చవక్త్రస్య మాం
అహమ్ప్రథమికా మిథః ప్రకటితాహవా బాహవః ॥ ౬॥
సటాపటలభీషణే సరభసాట్టహాసోద్భటే
స్ఫురత్క్రుధిపరిస్ఫుటభ్రుకుటికేఽపి వక్త్రే కృతే ।
కృపాకపటకేసరిన్ దనుజడిమ్భదత్తస్తనా
సరోజసదృశా దృశా వ్యతివిషజ్య తే వ్యజ్యతే ॥ ౭॥
త్వయి రక్షతి రక్షకైః కిమన్యైస్త్వయి చారక్షతి రక్షకైః కిమన్యైః ।
ఇతి నిశ్చితధీః శ్రయామి నిత్యం నృహరే వేగవతీతటాశ్రయం త్వామ్ ॥ ౮॥
ఇత్థం స్తుతః సకృదిహాష్టభిరేష పద్యైః
శ్రీవేఙ్కటేశరచితైస్త్రిదశేన్ద్రవన్ద్యః ।
దుర్దాన్తఘోరదురితద్విరదేన్ద్రభేదీ
కామాసికానరహరిర్వితనోతు కామాన్ ॥ ౯॥
ఇతి శ్రీవేదాన్తదేశికృతం కామాసికాష్టకం సమ్పూర్ణమ్ ।
