കുഞ്ജവിഹാര്യഷ്ടകം 2 Lyrics in Malayalam:
ദ്വിതീയം ശ്രീകുഞ്ജവിഹാര്യഷ്ടകം
നമഃ കുഞ്ജവിഹാരിണേ ।
അവിരതരതിബന്ധുസ്മേരതാബന്ധുരശ്രീഃ
കബലിത ഇവ രാധാപാങ്ഗഭങ്ഗീതരങ്ഗൈഃ ।
മുദിതവദനചന്ദ്രശ്ചന്ദ്രികാപീതധാരീ
മുദിരമധുരകാന്തിര്‍ഭാതി കുഞ്ജേ വിഹാരീ ॥ 1॥
തതസുഷിരഘനാനാം നാദമാനദ്ധഭാജാം
ജനയതി തരുണീനാം മണ്ഡലേ മണ്ഡിതാനാം ।
തടഭുവി നടരാജക്രീഡയാ ഭാനുപുത്ര്യാഃ
വിദധദതുലചാരിര്‍ഭാതി കുഞ്ജേ വിഹാരീ ॥ 2॥
ശിഖിനിഗലിതഷഡ്ജേകോകിലേ പഞ്ചമാഢ്യേ
സ്വയമപി നവവംശ്യോദ്ദാമയന്‍ ഗ്രാമമുഖ്യം ।
ധൃതമൃഗമദഗന്ധഃ സുഷ്ഠുഗാന്ധാരസംജ്ഞം
ത്രിഭുവനധൃതിഹാരിര്‍ഭാതി കുഞ്ജേ വിഹാരീ ॥ 3॥
അനുപമകരശാഖോപാത്തരാധാങ്ഗുലീകോ
ലഘു ലഘു കുസുമാനാം പര്യടന്‍ വാടികായാം ।
സരഭസമനുഗീതശ്ചിത്രകണ്ഠീഭിരുച്ചൈഃ
വ്രജനവയുവതീഭിര്‍ഭാതി കുഞ്ജേ വിഹാരീ ॥ 4॥
അഹിരിപുകൃതലാസ്യേ കീചകാരബ്ധവാദ്യേ
വ്രജഗിരിതടരങ്ഗേ ഭൃങ്ഗസങ്ഗീതഭാജി ।
വിരചിതപരിചര്യശ്ചിത്രതൌര്യത്രികോണ-
സ്തിമിതകരണവൃത്തിര്‍ഭാതി കുഞ്ജേ വിഹാരീ ॥ 5॥
ദിശി ദിശി ശുകശാരീമണ്ഡലൈര്‍ഗൂഢലീലാഃ
പ്രകടമനുപഠദ്ഭിര്‍നിര്‍മിതാശ്ചര്യപൂരഃ ।
തദതിരഹസി വൃത്തം പ്രേയസീകര്‍ണമൂലേ
സ്മിതമുഖമഭിജല്‍പന്‍ ഭാതി കുഞ്ജേ വിഹാരീ ॥ 6॥
തവ ചികുരകദംബം സ്തംഭതേ പ്രേക്ഷ്യ കേകീ
നയനകമലലക്ഷ്മീര്‍വന്ദതേ കൃഷ്ണസാരഃ ।
അലിരലമലകാന്തം നൌതി പശ്യേതി രാധാം
സുമധുരമഭിശംസന്‍ ഭാതി കുഞ്ജേ വിഹാരീ ॥ 7॥
മദനതരലബാലാ ചക്രവാലേന വിഷ്വഗ്-
വിവിധവരകലാനാം ശിക്ഷയാ സേവ്യമാനഃ ।
സ്ഖലിതചികുരവേശേ സ്കന്ധദേശേ പ്രിയായാഃ
പ്രഥിതപൃഥുലബാഹുര്‍ഭാതി കുഞ്ജേ വിഹാരീ ॥ 8॥
ഇദമനുപമലീലാഹാരി കുഞ്ജവിഹാരീ
സ്മരണപദമധീതേ തുഷ്ടധീരഷ്ടകം യഃ ।
നിജഗുണവൃതയാ ശ്രീരാധയാരാധിഽഽരാധിതസ്തം
നയതി നിജപദാബ്ജം കുഞ്ജസദ്മാധിരാജഃ ॥ 9॥
ഇതി ശ്രീരൂപഗോസ്വാമിവിരചിതസ്തവമാലായാം ശ്രീകുഞ്ജവിഹാര്യഷ്ടകം
ദ്വിതീയം സമ്പൂര്‍ണം ॥
