Narayaniyam Ekonasititama Dasakam in Telugu:

॥ నారాయణీయం ఏకోనాశీతితమ దశకమ్ ॥

ఏకోనాశీతితమ దశకమ్ (౭౯) – రుక్మిణీహరణం-వివాహమ్

బలసమేతబలానుగతో భవాన్
పురమగాహత భీష్మకమానితః |
ద్విజసుతం త్వదుపాగమవాదినం
ధృతరసా తరసా ప్రణనామ సా || ౭౯-౧ ||

భువనకాన్తమవేక్ష్య భవద్వపు-
ర్నృపసుతస్య నిశమ్య చ చేష్టితమ్ |
విపులఖేదజుషాం పురవాసినాం
సరుదితైరుదితైరగమన్నిశా || ౭౯-౨ ||

తదను వన్దితుమిన్దుముఖీ శివాం
విహితమఙ్గలభూషణభాసురా |
నిరగమద్భవదర్పితజీవితా
స్వపురతః పురతః సుభటావృతా || ౭౯-౩ ||

కులవధూభిరుపేత్య కుమారికా
గిరిసుతాం పరిపూజ్య చ సాదరమ్ |
ముహురయాచత తత్పదపఙ్కజే
నిపతితా పతితాం తవ కేవలమ్ || ౭౯-౪ ||

సమవలోకకుతూహలసఙ్కులే
నృపకులే నిభృతం త్వయి చ స్థితే |
నృపసుతా నిరగాద్గిరిజాలయా-
త్సురుచిరం రుచిరఞ్జితదిఙ్ముఖా || ౭౯-౫ ||

భువనమోహనరూపరుచా తదా
వివశితాఖిలరాజకదంబయా |
త్వమపి దేవ కటాక్షవిమోక్షణైః
ప్రమదయా మదయాఞ్చకృషే మనాక్ || ౭౯-౬ ||

క్వను గమిష్యసి చన్ద్రముఖీతి తాం
సరసమేత్య కరేణ హరన్ క్షణాత్ |
సమధిరోప్య రథం త్వమపాహృథా
భువి తతో వితతో నినదో ద్విషామ్ || ౭౯-౭ ||

క్వ ను గతః పశుపాల ఇతి క్రుధా
కృతరణా యదుభిశ్చ జితా నృపాః |
న తు భవానుదచాల్యత తైరహో
పిశునకైః శునకైరివ కేసరీ || ౭౯-౮ ||

తదను రుక్మిణమాగతమాహవే
వధముపేక్ష్య నిబధ్య విరూపయన్ |
హృతమదం పరిముచ్య బలోక్తిభిః
పురమయా రమయా సహ కాన్తయా || ౭౯-౯ ||

నవసమాగమలజ్జితమానసాం
ప్రణయకౌతుకజృంభితమన్మథామ్ |
అరమయః ఖలు నాథ యథాసుఖం
రహసి తాం హసితాంశులసన్ముఖీమ్ || ౭౯-౧౦ ||

వివిధనర్మభిరేవమహర్నిశం
ప్రమదమాకలయన్పునరేకదా |
ఋజుమతేః కిల వక్రాగిరా భవాన్
వరతనోరతనోదతిలోలతామ్ || ౭౯-౧౧ ||

తదధికైరథ లాలనకౌశలైః
ప్రణయినీమధికం సుఖయన్నిమామ్ |
అయి ముకున్ద భవచ్చరితాని నః
ప్రగదతాం గదతాన్తిమపాకురు || ౭౯-౧౨ ||

ఇతి ఏకోనాశీతితమదశకం సమాప్తం

Also Read:

Narayaneeyam Ekonasititama Dasakam Lyrics in English | Kannada | Telugu | Tamil