Narayaniyam Saptatitamadasakam in Telugu:

॥ నారాయణీయం సప్తతితమదశకమ్ ॥

సప్తతితమదశకమ్ (౭౦) – సుదర్శనశాపమోక్షం తథా శఙ్ఖచూడ-అరిష్టవధమ్ |

ఇతి త్వయి రసాకులం రమితవల్లభే వల్లవాః
కదాపి పురమమ్బికాకమితురంబికాకాననే |
సమేత్య భవతా సమం నిశి నిషేవ్య దివ్యోత్సవం
సుఖం సుషుపురగ్రసీద్వ్రజపముగ్రనాగస్తదా || ౭౦-౧ ||

సమున్ముఖమథోల్ముకైరభిహతేఽపి తస్మిన్బలా-
దముఞ్చతి భవత్పదే న్యపతి పాహి పాహీతి తైః |
తదా ఖలు పదా భవాన్సముపగమ్య పస్పర్శ తం
బభౌ స చ నిజాం తనుం సముపసాద్య వైద్యాధరీమ్ || ౭౦-౨ ||

సుదర్శనధర ప్రభో నను సుదర్శనాఖ్యోఽస్మ్యహం
మునీన్క్వచిదపాహసం త ఇహ మాం వ్యధుర్వాహసమ్ |
భవత్పదసమర్పణాదమలతాం గతోఽస్మీత్యసౌ
స్తువన్నిజపదం యయౌ వ్రజపదం చ గోపా ముదా || ౭౦-౩ ||

కదాపి ఖలు సీరిణా విహరతి త్వయి స్త్రీజనై-
ర్జహార ధనదానుగః స కిల శఙ్ఖచూడోఽబలాః |
అతిద్రుతమనుద్రుతస్తమథ ముక్తనారీజనం
రురోజిథ శిరోమణిం హలభృతే చ తస్యాదదాః || ౭౦-౪ ||

దినేషు చ సుహృజ్జనైః సహ వనేషు లీలాపరం
మనోభవమనోహరం రసితవేణునాదామృతమ్ |
భవన్తమమరీదృశామమృతపారణాదాయినం
విచిన్త్య కిము నాలపన్ విరహతాపితా గోపికాః || ౭౦-౫ ||

భోజరాజభృతకస్త్వథ కశ్చిత్కష్టదుష్టపథదృష్టిరరిష్టః |
నిష్ఠురాకృతిరపష్ఠునినాదస్తిష్ఠతే స్మ భవతే వృషరూపీ || ౭౦-౬ ||

శాక్వరోఽథ జగతీధృతిహారీ మూర్తిమేష బృహతీం ప్రదధానః |
పఙ్క్తిమాశు పరిఘూర్ణ్య పశూనాం ఛన్దసాం నిధిమవాప భవన్తమ్ || ౭౦-౭ ||

తుఙ్గశృఙ్గముఖమాశ్వభియన్తం సఙ్గృహయ్య రభసాదభియం తమ్ |
భద్రరూపమపి దైత్యమభద్రం మర్దయన్నమదయః సురలోకమ్ || ౭౦-౮ ||

చిత్రమద్య భగవన్ వృషఘాతాత్సుస్థిరాజని వృషస్థితిరుర్వ్యామ్ |
వర్ధతే చ వృషచేతసి భూయాన్మోద ఇత్యభినుతోఽసి సురైస్త్వమ్ || ౭౦-౯ ||

ఔక్షకాణి పరిధావత దూరం వీక్ష్యతామయమిహోక్షవిభేదీ |
ఇత్థమాత్తహసితైః సహ గోపైర్గేహగస్త్వమవ వాతపురేశ || ౭౦-౧౦ ||

ఇతి సప్తతితమదశకం సమాప్తం

Also Read:

Narayaneeyam Saptatitamadasakam Lyrics in English | Kannada | Telugu | Tamil