ಗಂಗಾಷ್ಟಕಂ ಶ್ರೀವಾಲ್ಮಿಕಿವಿರಚಿತಮ್ Lyrics in Kannada:
ಮಾತಃ ಶೈಲಸುತಾ-ಸಪತ್ನಿ ವಸುಧಾ-ಶೃಂಗಾರಹಾರಾವಲಿ
ಸ್ವರ್ಗಾರೋಹಣ-ವೈಜಯನ್ತಿ ಭವತೀಂ ಭಾಗೀರಥೀಂ ಪ್ರಾರ್ಥಯೇ ।
ತ್ವತ್ತೀರೇ ವಸತಃ ತ್ವದಂಬು ಪಿಬತಸ್ತ್ವದ್ವೀಚಿಷು ಪ್ರೇಂಖತಃ
ತ್ವನ್ನಾಮ ಸ್ಮರತಸ್ತ್ವದರ್ಪಿತದೃಶಃ ಸ್ಯಾನ್ಮೇ ಶರೀರವ್ಯಯಃ ॥ 1॥
ತ್ವತ್ತೀರೇ ತರುಕೋಟರಾನ್ತರಗತೋ ಗಂಗೇ ವಿಹಂಗೋ ಪರಂ
ತ್ವನ್ನೀರೇ ನರಕಾನ್ತಕಾರಿಣಿ ವರಂ ಮತ್ಸ್ಯೋಽಥವಾ ಕಚ್ಛಪಃ ।
ನೈವಾನ್ಯತ್ರ ಮದಾನ್ಧಸಿನ್ಧುರಘಟಾಸಂಘಟ್ಟಘಂಟಾರಣ-
ತ್ಕಾರಸ್ತತ್ರ ಸಮಸ್ತವೈರಿವನಿತಾ-ಲಬ್ಧಸ್ತುತಿರ್ಭೂಪತಿಃ ॥ 2॥
ಉಕ್ಷಾ ಪಕ್ಷೀ ತುರಗ ಉರಗಃ ಕೋಽಪಿ ವಾ ವಾರಣೋ ವಾಽ-
ವಾರೀಣಃ ಸ್ಯಾಂ ಜನನ-ಮರಣ-ಕ್ಲೇಶದುಃಖಾಸಹಿಷ್ಣುಃ ।
ನ ತ್ವನ್ಯತ್ರ ಪ್ರವಿರಲ-ರಣತ್ಕಿಂಕಿಣೀ-ಕ್ವಾಣಮಿತ್ರಂ
ವಾರಸ್ತ್ರೀಭಿಶ್ಚಮರಮರುತಾ ವೀಜಿತೋ ಭೂಮಿಪಾಲಃ ॥ 3॥
ಕಾಕೈರ್ನಿಷ್ಕುಷಿತಂ ಶ್ವಭಿಃ ಕವಲಿತಂ ಗೋಮಾಯುಭಿರ್ಲುಂಟಿತಂ
ಸ್ರೋತೋಭಿಶ್ಚಲಿತಂ ತಟಾಮ್ಬು-ಲುಲಿತಂ ವೀಚೀಭಿರಾನ್ದೋಲಿತಮ್ ।
ದಿವ್ಯಸ್ತ್ರೀ-ಕರ-ಚಾರುಚಾಮರ-ಮರುತ್ಸಂವೀಜ್ಯಮಾನಃ ಕದಾ
ದ್ರಕ್ಷ್ಯೇಽಹಂ ಪರಮೇಶ್ವರಿ ತ್ರಿಪಥಗೇ ಭಾಗೀರಥೀ ಸ್ವಂ ವಪುಃ ॥ 4॥
ಅಭಿನವ-ಬಿಸವಲ್ಲೀ-ಪಾದಪದ್ಮಸ್ಯ ವಿಷ್ಣೋಃ
ಮದನ-ಮಥನ-ಮೌಲೇರ್ಮಾಲತೀ-ಪುಷ್ಪಮಾಲಾ ।
ಜಯತಿ ಜಯಪತಾಕಾ ಕಾಪ್ಯಸೌ ಮೋಕ್ಷಲಕ್ಷ್ಮ್ಯಾಃ
ಕ್ಷಪಿತ-ಕಲಿಕಲಂಕಾ ಜಾಹ್ನವೀ ನಃ ಪುನಾತು ॥ 5॥
ಏತತ್ತಾಲ-ತಮಾಲ-ಸಾಲ-ಸರಲವ್ಯಾಲೋಲ-ವಲ್ಲೀಲತಾ-
ಚ್ಛತ್ರಂ ಸೂರ್ಯಕರ-ಪ್ರತಾಪರಹಿತಂ ಶಂಖೇನ್ದು-ಕುನ್ದೋಜ್ಜ್ವಲಮ್ ।
ಗನ್ಧರ್ವಾಮರ-ಸಿದ್ಧ-ಕಿನ್ನರವಧೂ-ತುಂಗಸ್ತನಾಸ್ಪಾಲಿತಂ
ಸ್ನಾನಾಯ ಪ್ರತಿವಾಸರಂ ಭವತು ಮೇ ಗಾಂಗಂ ಜಲಂ ನಿರ್ಮಲಮ್ ॥ 6॥
ಗಾಂಗಂ ವಾರಿ ಮನೋಹಾರಿ ಮುರಾರಿ-ಚರಣಚ್ಯುತಮ್ ।
ತ್ರಿಪುರಾರಿ-ಶಿರಶ್ಚಾರಿ ಪಾಪಹಾರಿ ಪುನಾತು ಮಾಮ್ ॥ 7॥
ಪಾಪಾಪಹಾರಿ ದುರಿತಾರಿ ತರಂಗಧಾರಿ
ಶೈಲಪ್ರಚಾರಿ ಗಿರಿರಾಜ-ಗುಹಾವಿದಾರಿ ।
ಝಂಕಾರಕಾರಿ ಹರಿಪಾದ-ರಜೋಪಹಾರಿ
ಗಾಂಗಂ ಪುನಾತು ಸತತಂ ಶುಭಕಾರಿ ವಾರಿ ॥ 8॥
ಗಂಗಾಷ್ಟಕಂ ಪಠತಿ ಯಃ ಪ್ರಯತಃ ಪ್ರಭಾತೇ
ವಾಲ್ಮೀಕಿನಾ ವಿರಚಿತಂ ಶುಭದಂ ಮನುಷ್ಯಃ ।
ಪ್ರಕ್ಷಾಲ್ಯ ಗಾತ್ರ-ಕಲಿಕಲ್ಮಷ-ಪಂಕ-ಮಾಶು
ಮೋಕ್ಷಂ ಲಭೇತ್ ಪತತಿ ನೈವ ನರೋ ಭವಾಬ್ಧೌ ॥ 9॥
॥ ಇತಿ ವಾಲ್ಮೀಕಿವಿರಚಿತಂ ಗಂಗಾಷ್ಟಕಂ ಸಮ್ಪೂರ್ಣಮ್ ॥
