ഗങ്ഗാഷ്ടകം ശ്രീവാല്‍മികിവിരചിതം Lyrics in Malayalam:
മാതഃ ശൈലസുതാ-സപത്നി വസുധാ-ശൃങ്ഗാരഹാരാവലി
സ്വര്‍ഗാരോഹണ-വൈജയന്തി ഭവതീം ഭാഗീരഥീം പ്രാര്‍ഥയേ ।
ത്വത്തീരേ വസതഃ ത്വദംബു പിബതസ്ത്വദ്വീചിഷു പ്രേങ്ഖതഃ
ത്വന്നാമ സ്മരതസ്ത്വദര്‍പിതദൃശഃ സ്യാന്‍മേ ശരീരവ്യയഃ ॥ 1॥
ത്വത്തീരേ തരുകോടരാന്തരഗതോ ഗങ്ഗേ വിഹങ്ഗോ പരം
ത്വന്നീരേ നരകാന്തകാരിണി വരം മത്സ്യോഽഥവാ കച്ഛപഃ ।
നൈവാന്യത്ര മദാന്ധസിന്ധുരഘടാസംഘട്ടഘണ്ടാരണ-
ത്കാരസ്തത്ര സമസ്തവൈരിവനിതാ-ലബ്ധസ്തുതിര്‍ഭൂപതിഃ ॥ 2॥
ഉക്ഷാ പക്ഷീ തുരഗ ഉരഗഃ കോഽപി വാ വാരണോ വാഽ-
വാരീണഃ സ്യാം ജനന-മരണ-ക്ലേശദുഃഖാസഹിഷ്ണുഃ ।
ന ത്വന്യത്ര പ്രവിരല-രണത്കിങ്കിണീ-ക്വാണമിത്രം
വാരസ്ത്രീഭിശ്ചമരമരുതാ വീജിതോ ഭൂമിപാലഃ ॥ 3॥
കാകൈര്‍നിഷ്കുഷിതം ശ്വഭിഃ കവലിതം ഗോമായുഭിര്ലുണ്ടിതം
സ്രോതോഭിശ്ചലിതം തടാംബു-ലുലിതം വീചീഭിരാന്ദോലിതം ।
ദിവ്യസ്ത്രീ-കര-ചാരുചാമര-മരുത്സംവീജ്യമാനഃ കദാ
ദ്രക്ഷ്യേഽഹം പരമേശ്വരി ത്രിപഥഗേ ഭാഗീരഥീ സ്വം വപുഃ ॥ 4॥
അഭിനവ-ബിസവല്ലീ-പാദപദ്മസ്യ വിഷ്ണോഃ
മദന-മഥന-മൌലേര്‍മാലതീ-പുഷ്പമാലാ ।
ജയതി ജയപതാകാ കാപ്യസൌ മോക്ഷലക്ഷ്ംയാഃ
ക്ഷപിത-കലികലങ്കാ ജാഹ്നവീ നഃ പുനാതു ॥ 5॥
ഏതത്താല-തമാല-സാല-സരലവ്യാലോല-വല്ലീലതാ-
ച്ഛത്രം സൂര്യകര-പ്രതാപരഹിതം ശങ്ഖേന്ദു-കുന്ദോജ്ജ്വലം ।
ഗന്ധര്‍വാമര-സിദ്ധ-കിന്നരവധൂ-തുങ്ഗസ്തനാസ്പാലിതം
സ്നാനായ പ്രതിവാസരം ഭവതു മേ ഗാങ്ഗം ജലം നിര്‍മലം ॥ 6॥
ഗാങ്ഗം വാരി മനോഹാരി മുരാരി-ചരണച്യുതം ।
ത്രിപുരാരി-ശിരശ്ചാരി പാപഹാരി പുനാതു മാം ॥ 7॥
പാപാപഹാരി ദുരിതാരി തരങ്ഗധാരി
ശൈലപ്രചാരി ഗിരിരാജ-ഗുഹാവിദാരി ।
ഝങ്കാരകാരി ഹരിപാദ-രജോപഹാരി
ഗാങ്ഗം പുനാതു സതതം ശുഭകാരി വാരി ॥ 8॥
ഗങ്ഗാഷ്ടകം പഠതി യഃ പ്രയതഃ പ്രഭാതേ
വാല്‍മീകിനാ വിരചിതം ശുഭദം മനുഷ്യഃ ।
പ്രക്ഷാല്യ ഗാത്ര-കലികല്‍മഷ-പങ്ക-മാശു
മോക്ഷം ലഭേത് പതതി നൈവ നരോ ഭവാബ്ധൌ ॥ 9॥
॥ ഇതി വാല്‍മീകിവിരചിതം ഗങ്ഗാഷ്ടകം സമ്പൂര്‍ണം ॥
