ಶ್ರೀದಾನನಿರ್ವರ್ತನಕುಂಡಾಷ್ಟಕಮ್ Lyrics in Kannada:
ಸ್ವದಯಿತಗಿರಿಕಚ್ಛೇ ಗವ್ಯದಾನಾರ್ಥಮುಚ್ಚೈಃ
ಕಪಟಕಲಹಕೇಲಿಂ ಕುರ್ವತೋರ್ನವ್ಯಯೂನೋಃ ।
ನಿಜಜನಕೃತದರ್ಪೈಃ ಫುಲ್ಲತೋರೀಕ್ಷಕೇಽಸ್ಮಿ-
ನ್ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 1॥
ನಿಭೃತಮಜನಿ ಯಸ್ಮಾದ್ದಾನನಿರ್ವೃತ್ತಿರಸ್ಮಿ-
ನತ ಇದಮಭಿಧಾನಂ ಪ್ರಾಪ ಯತ್ತತ್ಸಭಾಯಾಮ್ ।
ರಸವಿಮುಖನಿಗೂಢೇ ತತ್ರ ತಜ್ಞೈಕವೇದ್ಯೇ
ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 2॥
ಅಭಿನವಮಧುಗನ್ಧೋನ್ಮತ್ತರೋಲಮ್ಬಸಂಘ
ಧ್ವನಿಲಲಿತಸರೋಜವ್ರಾತಸೌರಭ್ಯಶೀತೇ ।
ನವಮಧುರಖಗಾಲೀಕ್ಷ್ವೇಲಿಸಂಚಾರಕಾಮ್ರೇ
ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 3॥
ಹಿಮಕುಸುಮಸುವಾಸಸ್ಫಾರಪಾನೀಯಪೂರೇ
ರಸಪರಿಲಸದಾಲೀಶಾಲಿನೋರ್ನವ್ಯಯೂನೋಃ ।
ಅತುಲಸಲಿಲಖೇಲಾಲಬ್ಧಸೌಭಾಗ್ಯಫುಲ್ಲೇ
ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 4॥
ದರವಿಕಸಿತಪುಷ್ಪೈರ್ವಾಸಿತಾನ್ತರ್ದಿಗನ್ತಃ
ಖಗಮಧುಪನಿನಾದೈರ್ಮೋದಿತಪ್ರಾಣಿಜಾತಃ ।
ಪರಿತೌಪರಿ ಯಸ್ಯ ಕ್ಷ್ಮಾರುಹಾ ಭಾನ್ತಿ ತಸ್ಮಿ-
ನ್ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 5॥
ನಿಜನಿಜನವಕುಂಜೇ ಗುಂಜಿರೋಲಮ್ಬಪುಂಜೇ
ಪ್ರಣಯಿನವಸಖೀಭಿಃ ಸಂಪ್ರವೇಶ್ಯ ಪ್ರಿಯೌ ತೌ ।
ನಿರುಪಮನವರಂಗಸ್ತನ್ಯತೇ ಯತ್ರ ತಸ್ಮಿ-
ನ್ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 6॥
ಸ್ಫಟಿಕಸಮಮತುಚ್ಛಂ ಯಸ್ಯ ಪಾನೀಯಮಚ್ಛಂ
ಖಗನರಪಶುಗೋಭಿಃ ಸಮ್ಪಿಬನ್ತೀಭಿರುಚ್ಚೈಃ ।
ನಿಜನಿಜಗುಣವೃದ್ಧಿರ್ಲಭ್ಯತೇ ದ್ರಾಗಮುಸ್ಮಿ-
ನ್ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 7॥
ಸುರಭಿಮಧುರಶೀತಂ ಯತ್ಪಯಃ ಪ್ರತ್ಯಹಂ ತಾಃ
ಸಖಿಗಣಪರಿವೀತೋ ವ್ಯಾಹರನ್ಪಾಯಯನ್ಗಾಃ ।
ಸ್ವಯಮಥ ಪಿಬತಿ ಶ್ರೀಗೋಪಚನ್ದ್ರೋಽಪಿ ತಸ್ಮಿ-
ನ್ಸರಸಿ ಭವತು ವಾಸೋ ದಾನನಿರ್ವರ್ತನೇ ನಃ ॥ 8॥
ಪಠತಿ ಸುಮತಿರೇತದ್ದಾನನಿರ್ವರ್ತನಾಖ್ಯಂ
ಪ್ರಥಿತಮಹಿಮಕುಂಡಸ್ಯಾಷ್ಟಕಂ ಯೋ ಯತಾತ್ಮಾ ।
ಸ ಚ ನಿಯತನಿವಾಸಂ ಸುಷ್ಠು ಸಂಲಭ್ಯ ಕಾಲೇ
ಕಲಯತಿ ಕಿಲ ರಾಧಾಕೃಷ್ಣಯೋರ್ದಾನಲೀಲಾಮ್ ॥ 9॥
ಇತಿ ಶ್ರೀರಘುನಾಥದಾಸಗೋಸ್ವಾಮಿವಿರಚಿತಸ್ತವಾವಲ್ಯಾಂ
ಶ್ರೀದಾನನಿರ್ವರ್ತನಕುಂಡಾಷ್ಟಕಂ ಸಮ್ಪೂರ್ಣಮ್ ।
