শ্রীগোবর্ধনাষ্টকম্ ২ Lyrics in Bengali:
দ্বিতীয়ং গোবর্ধনাষ্টকং
শ্রীগোবর্ধনায় নমঃ ।
নীলস্তম্ভোজ্জ্বলরুচিভরৈর্মণ্ডিতে বাহুদণ্ডে
ছত্রচ্ছায়াং দধদঘরিপোর্লব্ধসপ্তাহবাসঃ ।
ধারাপাতগ্লপিতমনসাং রক্ষিতা গোকুলানাং
কৃষ্ণপ্রেয়ান্ প্রথয়তু সদা শর্ম গোবর্ধনো নঃ ॥ ১॥
ভীতো য়স্মাদপরিগণয়ন্ বান্ধবস্নেহবন্ধান্
সিন্ধাবদ্রিস্ত্বরিতমবিশত্ পার্বতীপূর্বজোঽপি ।
য়স্তং জম্ভুদ্বিষমকুরুত স্তম্ভসম্ভেদশূন্যং
স প্রৌঢাত্মা প্রথয়তু সদা শর্ম গোবর্ধনো নঃ ॥ ২॥
আবিষ্কৃত্য প্রকটমুকুটাটোপমঙ্গং স্থবীয়ঃ
শৈলোঽস্মীতি স্ফুটমভিদধত্ তুষ্টিবিস্ফারদৃষ্টিঃ ।
য়স্মৈ কৃষ্ণঃ স্বয়মরসয়দ্ বল্লবৈর্দত্তমন্নং
ধন্যঃ সোঽয়ং প্রথয়তু সদা শর্ম গোবর্ধনো নঃ ॥ ৩॥
অদ্যাপ্যূর্জপ্রতিপদি মহান্ ভ্রাজতে য়স্য য়জ্ঞঃ
কৃষ্ণোপজ্ঞং জগতি সুরভীসৈরিভীক্রীডয়াঢ্যঃ ।
শষ্পালম্বোত্তমতটয়া য়ঃ কুটুম্বং পশূনাং
সোঽয়ং ভূয়ঃ প্রথয়তু সদা শর্ম গোবর্ধনো নঃ ॥ ৪॥
শ্রীগান্ধর্বাদয়িতসরসীপদ্মসৌরভ্যরত্নং
হৃত্বা শঙ্কোত্করপরবশৈরস্বনং সঞ্চরদ্ভিঃ ।
অম্ভঃক্ষোদপ্রহরিককুলেনাকুলেনানুয়াতৈ-
র্বাতৈর্জুষ্টৈঃ প্রথয়তু সদা শর্ম গোবর্ধনো নঃ ॥ ৫॥
কংসারাতেস্তরিবিলসিতৈরাতরানঙ্গরঙ্গৈ-
রাভীরীণাং প্রণয়মভিতঃ পাত্রমুন্মীলয়ন্ত্যাঃ ।
ধৌতগ্রাবাবলিরমলিনৈর্মানসামর্ত্যসিন্ধো-
র্বীচিব্রাতৈঃ প্রথয়তু সদা শর্ম গোবর্ধনো নঃ ॥ ৬॥
য়স্যাধ্যক্ষঃ সকলহঠিনামাদদে চক্রবর্তী
শুল্কং নান্যদ্ ব্রজমৃগদৃশামর্পণাদ্ বিগ্রহস্য ।
ঘট্টস্যোচ্চৈর্মধুকররুচস্তস্য ধামপ্রপঞ্চৈঃ
শ্যামপ্রস্থঃ প্রথয়তু সদা শর্ম গোবর্ধনো নঃ ॥ ৭॥
গান্ধর্বায়াঃ সুরতকলহোদ্দামতাবাবদূকৈঃ
ক্লান্তশ্রোত্রোত্পলবলয়িভিঃ ক্ষিপ্তপিঞ্ছাবতংসৈঃ ।
কুঞ্জৈস্তল্পোপরি পরিলুঠদ্বৈজয়ন্তীপরীতৈঃ
পুণ্যাঙ্গশ্রীঃ প্রথয়তু সদা শর্ম গোবর্ধনো নঃ ॥ ৮॥
য়স্তুষ্টাত্মা স্ফুটমনুপঠেচ্ছ্রদ্ধয়া শুদ্ধয়ান্ত-
র্মেধ্যঃ পদ্যাষ্টকমচটুলঃ সুষ্ঠু গোবর্ধনস্য ।
সান্দ্রং গোবর্ধনধরপদদ্বন্দ্বশোণারবিন্দে
বিন্দন্ প্রেমোত্করমিহ করোত্যদ্রিরাজে স বাসম্ ॥ ৯॥
ইতি শ্রীরূপগোস্বামিবিরচিতস্তবমালায়াং শ্রীগিরীন্দ্রবাসানন্দদং
নাম দ্বিতীয়ং শ্রীগোবর্ধনাষ্টকং সম্পূর্ণম্ ।