શ્રીકાર્તિકેયાષ્ટકમ્ Lyrics in Gujarati:
ૐ શ્રીગણેશાય નમઃ ।
અગસ્ત્ય ઉવાચ-
નમોઽસ્તુ વૃન્દારકવૃન્દવન્દ્યપાદારવિન્દાય સુધાકરાય ।
ષડાનનાયામિતવિક્રમાય ગૌરીહૃદાનન્દસમુદ્ભવાય ॥ ૧॥
નમોઽસ્તુ તુભ્યં પ્રણતાર્તિહન્ત્રે કર્ત્રે સમસ્તસ્ય મનોરથાનામ્ ।
દાત્રે રથાનાં પરતારકસ્ય હન્ત્રે પ્રચણ્ડાસુરતારકસ્ય ॥ ૨॥
અમૂર્તમૂર્તાય સહસ્રમૂર્તયે ગુણાય ગણ્યાય પરાત્પરાય ।
અપારપારાય પરાપરાય નમોઽસ્તુ તુભ્યં શિખિવાહનાય ॥ ૩॥
નમોઽસ્તુ તે બ્રહ્મવિદાં વરાય દિગમ્બરાયામ્બરસંસ્થિતાય ।
હિરણ્યવર્ણાય હિરણ્યબાહવે નમો હિરણ્યાય હિરણ્યરેતસે ॥ ૪॥
તપઃ સ્વરૂપાય તપોધનાય તપઃ ફલાનાં પ્રતિપાદકાય ।
સદા કુમારાય હિ મારમારિણે તૃણીકૃતૈશ્વર્યવિરાગિણે નમઃ ॥ ૫॥
નમોઽસ્તુ તુભ્યં શરજન્મને વિભો પ્રભાતસૂર્યારુણદન્તપઙ્ક્તયે ।
બાલાય ચાબાલપરાક્રમાય ષાણ્માતુરાયાલમનાતુરાય ॥ ૬॥
મીઢુષ્ટમાયોત્તરમીઢુષે નમો નમો ગણાનાં પતયે ગણાય ।
નમોઽસ્તુ તે જન્મજરાતિગાય નમો વિશાખાય સુશક્તિપાણયે ॥ ૭॥
સર્વસ્ય નાથસ્ય કુમારકાય ક્રૌઞ્ચારયે તારકમારકાય ।
સ્વાહેય ગાઙ્ગેય ચ કાર્તિકેય શૈવેય તુભ્યં સતતં નમોઽસ્તુ ॥ ૮॥
ઇતિ સ્કાન્દે કાશીખણ્ડતઃ શ્રીકાર્તિકેયાષ્ટકં સમ્પૂર્ણમ્ ॥
