శ్రీకృష్ణశరణాష్టకమ్ Lyrics in Telugu:
ద్విదలీకృతదృక్స్వాస్యః పన్నగీకృతపన్నగః ।
కృశీకృతకృశానుశ్చ శ్రీకృష్ణః శరణం మమ ॥ ౧॥
ఫలీకృతఫలార్థీ చ కుస్సితీకృతకౌరవః ।
నిర్వాతీకృతవాతారిః శ్రీకృష్ణః శరణం మమ ॥ ౨॥
కృతార్థీకృతకున్తీజః ప్రపూతీకృతపూతనః ।
కలఙ్కీకృతకంసాదిః శ్రీకృష్ణః శరణం మమ ॥ ౩॥
సుఖీకృతసుదామా చ శఙ్కరీకృతశఙ్కరః ।
సితీకృతసరిన్నాథః శ్రీకృష్ణః శరణం మమ ॥ ౪॥
ఛలీకృతబలిద్యౌర్యో నిధనీకృతధేనుకః ।
కన్దర్పీకృతకుబ్జాదిః శ్రీకృష్ణ శరణం మమ ॥ ౫॥
మహేన్ద్రీకృతమాహేయః శిథిలీకృతమైథిలః ।
ఆనన్దీకృతనన్దాద్యః శ్రీకృష్ణః శరణం మమ ॥ ౬॥
వరాకీకృతరాకేశో విపక్షీకృతరాక్షసః ।
సన్తోషీకృతసద్భక్తః శ్రీకృష్ణః శరణం మమ ॥ ౭॥
జరీకృతజరాసన్ధః కమలీకృతకార్ముకః ।
ప్రభ్రష్టీకృతభీష్మాదిః శ్రీకృష్ణః శరణం మమ ॥ ౮॥
శ్రీకృష్ణః శరణం మమాష్టకమిదం ప్రోత్థాయ యః సమ్పఠేత్
స శ్రీగోకులనాయకస్య పదవీ సంయాతి భూమీతలే ।
పశ్యత్యేవ నిరన్తరం తరణిజాతీరస్థకేలీ ప్రభోః
సమ్ప్రాప్నోతి తదీయతాం ప్రతిదినం గోపీశతైరావృతామ్ ॥ ౯॥
॥ ఇతి శ్రీదేవకీనన్దనాత్మజ శ్రీరఘునాథప్రభుకృతం
శ్రీకృష్ణశరణాష్టకం సమ్పూర్ణమ్ ॥
