ଶ୍ରୀପରମଗୁରୁପ୍ରଭୁଵରାଷ୍ଟକମ୍ Lyrics in Oriya:
ପ୍ରପନ୍ନଜନନୀଵୃତି ଜ୍ଵଲତି ସଂସୃତିର୍ଜ୍ଵାଲୟା
ୟଦୀୟନୟନୋଦିତାତୁଲକୃପାତିଵୃଷ୍ଟିର୍ଦ୍ରୁତମ୍ ।
ଵିଧୂୟ ଦଵଥୁଂ କରୋତ୍ୟମଲଭକ୍ତିଵାପ୍ୟୌଚିତୀଂ
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୧॥
ୟଦାସ୍ୟକମଲୋଦିତା ଵ୍ରଜଭୁଵୋ ମହିମ୍ନାଂ ତତିଃ
ଶ୍ରୁତା ବତ ଵିସର୍ଜୟେତ୍ପତିକଲତ୍ରପୁତ୍ରାଲୟାନ୍ ।
କଲିନ୍ଦତନୟାତଟୀ ଵନକୁଟୀରଵାସଂ ନୟେତ୍
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୨॥
ଵ୍ରଜାମ୍ବୁଜଦୃଶାଂ କଥଂ ଭଵତି ଭାଵଭୂମା କଥଂ
ଭଵେଦନୁଗତିଃ କଥଂ କିମିହ ସାଧନଂ କୋଽଧିକୃତ୍ ।
ଇତି ସ୍ଫୁଟମଵୈତି କୋ ୟଦୁପଦେଶଭାଗ୍ୟଂ ଵିନା
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୩॥
ତପସ୍ଵିୟତିକର୍ମିଣାଂ ସଦସି ତାର୍କିକାନାଂ ତଥା
ପ୍ରତିସ୍ଵମତଵୈଦୁଷୀପ୍ରକଟନୋଢଗର୍ଵଶ୍ରିୟାମ୍ ।
ଵିରାଜତି ରଵିର୍ୟଥା ତମସି ୟଃ ସ୍ଵଭକ୍ତ୍ୟୋଜସା
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୪॥
କିମଦ୍ୟ ପରିଧାସ୍ୟତେ କିମଥ ଭୋଜ୍ୟତେ ରାଧୟା
ସମଂ ମଦନମୋହନୋ ମଦନକୋଟିନିମଜ୍ଜିତଃ ।
ଇତୀଷ୍ଟଵରିଵସ୍ୟୟା ନୟତି ୟୋଽଷ୍ଟୟାମାନ୍ ସଦା
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୫॥
ମୃଦଙ୍ଗକରତାଲିକାମଧୁରକୀର୍ତନେ ନର୍ତୟନ୍
ଜନାନ୍ ସୁକୃତିନୋ ନଟନ୍ ସ୍ଵୟମପି ପ୍ରମୋଦାମ୍ବୁଧୌ ।
ନିମଜ୍ଜତି ଦୃଗମ୍ବୁଭିଃପୁଲକସଙ୍କୁଲଃସ୍ନାତି ୟଃ
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୬॥
ସମଂ ଭଗଵତୋ ଜନୈଃ ପ୍ରଵରଭକ୍ତିଶାସ୍ତ୍ରୋଦିତଂ
ରସଂ ସୁରସୟନ୍ମୁହୁଃ ପରିଜନାଂଶ୍ଚ ୟଃ ସ୍ଵାଦୟନ୍ ।
ସ୍ଵଶିଷ୍ୟଶତଵେଷ୍ଟିତୋ ଜୟତି ଚକ୍ରଵର୍ତ୍ୟାଖ୍ୟୟା
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୭॥
ସ୍ଥିତିଃ ସୁରସରିତ୍ତଟେ ମଦନମୋହନୋ ଜୀଵନଂ
ସ୍ପୃହା ରସିକସଙ୍ଗମେ ଚତୁରିମା ଜନୋଦ୍ଧାରଣେ ।
ଘୃଣା ଵିଷୟିଷୁ କ୍ଷମା ଝଟିତି ୟସ୍ୟ ଚାନୁଵ୍ରଜେ
ସ କୃଷ୍ଣଚରଣଃ ପ୍ରଭୁଃ ପ୍ରଦିଶତୁ ସ୍ଵପାଦାମୃତମ୍ ॥ ୮॥
ଇଦଂ ପ୍ରଭୁଵରାଷ୍ଟକଂ ପଠତି ୟସ୍ତଦୀୟୋ ଜନ-
ସ୍ତଦଙ୍ଘ୍ରିକମଲେଷ୍ଟଧୀଃ ସ ଖଲୁ ରଙ୍ଗଵତ୍ପ୍ରେମଭାକ୍ ।
ଵିଲାସଭୃତମଞ୍ଜୁଲ୍ୟାଲ୍ୟତିକୃପୈକପାତ୍ରୀଭଵନ୍
ନିକୁଞ୍ଜନିଲୟାଧିପାଵଚିରମେଵ ତୌ ସେଵତେ ॥ ୯॥
ଇତି ଶ୍ରୀମଦ୍ଵିଶ୍ଵନାଥଚକ୍ରଵର୍ତିଵିରଚିତଂ
ଶ୍ରୀଶ୍ରୀପରମଗୁରୁପ୍ରଭୁଵରାଷ୍ଟକଂ ସମ୍ପୂର୍ଣମ୍ ।
