Sri Radhashtakam 4 Lyrics in Bengali:
শ্রীরাধাষ্টকম্ ৪
শ্রীশ্রীবৃন্দাবনেশ্বর্যৈ নমঃ ।
দিশি দিশি রচয়ন্তী সঞ্চরন্নেত্রলক্ষ্মী
বিলসিতখুরলীভিঃ খঞ্জরীটস্য খেলাম্ ।
হৃদয়মধুপমল্লীং বল্লবাধীশসূনো-
রখিলগুণগভীরাং রাধিকামর্চয়ামি ॥ ১॥
পিতুরিহ বৃষভানোরন্ববায়প্রশস্তিং
জগতি কিল সমস্তে সুষ্ঠু বিস্তারয়ন্তীম্ ।
ব্রজপতিকুমারং খেলয়ন্তীং সখীভিঃ
সুরভিণি নিজকুণ্ডে রাধিকামর্চয়ামি ॥ ২॥
শরদুপচিতরাকাকৌমুদীনাথকীর্তি
প্রকরদমনদীক্ষাদক্ষিণস্মেরবক্ত্রাম্ ।
নটদঘভিদপাঙ্গোত্তুঙ্গিতানঙ্গরঙ্গাং
কলিতরুচিতরঙ্গাং রাধিকামর্চয়ামি ॥ ৩॥
বিবিধকুসুমবৃন্দোত্ফুল্লধম্মিল্লঘাটী
বিঘটিতমদঘূর্ণত্কেকিপিচ্ছপ্রশস্তিম্ ।
মধুরিপুমুখবিম্বোদ্গীর্ণতাম্বূলরাগ
স্ফুরদমলকপোলাং রাধিকামর্চয়ামি ॥ ৪॥
অমলিনললিতান্তঃস্নেহসিক্তান্তরাঙ্গাং
অখিলবিধবিশাখাসখ্যবিখ্যাতশীলাম্ ।
স্ফুরদঘভিদনর্ঘপ্রেমমাণিক্যপেটীং
ধৃতমধুরবিনোদাং রাধিকামর্চয়ামি ॥ ৫॥
অতুলমহসি বৃন্দারণ্যরাজ্যেঽভিষিক্তাং
নিখিলসময়ভর্তুঃ কার্তিকস্যাধিদেবীম্ ।
অপরিমিতমুকুন্দপ্রেয়সীবৃন্দমুখ্যাং
জগদঘহরকীর্তিং রাধিকামর্চয়ামি ॥ ৬॥
হরিপদনখকোটীপৃষ্ঠপর্যন্তসীমা
তটমপি কলয়ন্তীং প্রাণকোটেরভীষ্টাম্ ।
প্রমুদিতমদিরাক্ষীবৃন্দবৈদগ্ধ্যদীক্ষা
গুরুমতিগুরুকীর্তিং রাধিকামর্চয়ামি ॥ ৭॥
অমলকনকপট্টোদ্ঘৃষ্টকাশ্মীরগৌরীং
মধুরিমলহরীভিঃ সম্পরীতাং কিশোরীম্ ।
হরিভুজপরিরব্ধাং লব্ধরোমাঞ্চপালিং
স্ফুরদরুণদুকূলাং রাধিকামর্চয়ামি ॥ ৮॥
তদমলমধুরিম্ণাং কামমাধাররূপং
পরিপঠতি বরিষ্ঠং সুষ্ঠু রাধাষ্টকং য়ঃ ।
অহিমকিরণপুত্রীকূলকল্যাণচন্দ্রঃ
স্ফুটমখিলমভীষ্টং তস্য তুষ্টস্তনোতি ॥ ৯॥
ইতি শ্রীরূপগোস্বামিবিরচিতস্তবমালায়াং শ্রীরাধাষ্টকং সম্পূর্ণম্ ।
