Shri Rama Mangala Ashtakam Lyrics in Telugu:
శ్రీరామమఙ్గలాష్టకమ్
ఓం
శ్రీరామజయమ్
ఓం సద్గురుశ్రీత్యాగరాజస్వామినే నమో నమః ।
నమః శ్రీత్యాగరాజాయ మదాచార్యవరాయ చ ।
శ్రీసీతారామభక్తాయ గురుదేవాయ తే నమః ॥
ఓం సీతావరాయ విద్మహే । త్యాగగేయాయ ధీమహి ।
తన్నో రామః ప్రచోదయాత్ ॥
అథ శ్రీరామమఙ్గలాష్టకమ్ ।
సఙ్గీతప్రాణమూలాయ సప్తస్వరాధివాసినే ।
షడ్జాధారశ్రుతిస్థాయ సద్గురుస్వాయ మఙ్గలమ్ ॥ ౧॥
ఋషభారూఢనూతాయ రిపుసూదనకీర్తయే ।
ఋషిశ్రేష్ఠసుగీతాయ రిపుభీమాయ మఙ్గలమ్ ॥ ౨॥
గఙ్గాపావనపాదాయ గమ్భీరస్వరభాషిణే ।
గాన్ధర్వగానలోలాయ గభీరాయ సుమఙ్గలమ్ ॥ ౩॥
మఙ్గలం క్షితిజాపాయ మఙ్గలానన్దమూర్తయే ।
మఙ్గలశ్రీనివాసాయ మాధవాయ సుమఙ్గలమ్ ॥ ౪॥
పఞ్చమస్వరగేయాయ పరిపూర్ణస్వరాబ్ధయే ।
పాథోధిరాగరఙ్గాయ పరార్థాయ సుమఙ్గలమ్ ॥ ౫॥
ధన్యాయ ధర్మపాలాయ ధైవత్యధైర్యదాయినే ।
ధ్యాతాయ ధ్యానగమ్యాయ ధ్యాతరూపాయ మఙ్గలమ్ ॥ ౬॥
నిషాదగుహమిత్రాయ నిశాచరమదారయే ।
నిర్వాణఫలదాత్రే చ నిత్యానన్దాయ మఙ్గలమ్ ॥ ౭॥
సప్తస్వరాధినాథాయ సఙ్గీతకృతిసేవినే ।
సద్గురుస్వామిగేయాయ సీతారామాయ మఙ్గలమ్ ॥ ౮॥
ఇతి సద్గురుశ్రీత్యాగరాజస్వామినః శిష్యయా భక్తయా పుష్పయా
అనురాగేణ కృతం శ్రీరామమఙ్గలాష్టకం గురౌ సమర్పితమ్ ।
ఓం
శుభమస్తు ।