Sri Vatapatyashtakam Lyrics in Malayalam:
॥ ശ്രീവടപത്യഷ്ടകം ॥
ഭവം സൃഷ്ട്വാ ദേവഃ സ്വയമിഹ നിവിഷ്ടോ ഭവമുഖേ
സഹസ്രാസ്യോ ഭൂത്വാ ഫലമനുഭവഞ്ഛാസ്ത്യവികൃതഃ ।
പരം ദേവൈഃ സേവ്യം രസമുപനിഷദ്വേദ്യമമിതം
നമാമി ശ്രീനാഥം ഭവഭയഹരം ശ്രീവടപതിം ॥ 1॥
ചിദാനന്ദം സത്യം ജഗദുദയരക്ഷാലയകരം
യദജ്ഞാനാച്ഛുക്തൌ രജതമിവ വിശ്വം വിലസിതം ।
പുനര്യദ്വിജ്ഞാനം ഭ്രമഹരമഭേദം തമനഘം
നമാമി ശ്രീനാഥം ഭവഭയഹരം ശ്രീവടപതിം ॥ 2॥
പുരാണോ യോ ദേവോ നിവസതി വടേശസ്തനുഭൃതാം
ഹൃദംഭോജേ ദ്രഷ്ടാ വിദിതമഹിമാ സൌഖ്യസദനം ।
തമാരാധ്യം സിദ്ധൈഃ സുരമനുജസംസേവിതപദം
നമാമി ശ്രീനാഥം ഭവഭയഹരം ശ്രീവടപതിം ॥ 3॥
മഹാമോഹാഗാരേഽതിവിപദി ഭവാബ്ധൌ നിപതിതോ
ന പശ്യാമി ത്വത്തോഽന്യദിഹ ശരണം മേ സുഖകരം ।
ദയാസിന്ധോ മാമുദ്ധര സപദി തസ്മാച്ഛരണദം
നമാമി ശ്രീനാഥം ഭവഭയഹരം ശ്രീവടപതിം ॥ 4॥
അസാരേ സംസാരേ വികൃതിനിലയേ ക്ലേശബഹുലേ
രുചിം ബധ്നന്ത്യജ്ഞാഃ സുഖമധുലവായാന്തവിരസേ ।
ത്വമേവാസ്മിന്‍സാരോ ജഗതി തമഹം ത്വാ രസഘനം
നമാമി ശ്രീനാഥം ഭവഭയഹരം ശ്രീവടപതിം ॥ 5॥
കദാഽഹം മോക്ഷ്യേഽസ്മാന്നിബിഡതമസോ ബന്ധനഗൃഹാത്
പ്രഭോ സംസാരാത്ത്വച്ഛ്രവണമനനധ്യാനരഹിതഃ ।
ന യോഗം സാങ്ഖ്യം വാ കമപി സദുപായം ച കലയേ
നമാമി ശ്രീനാഥം ഭവഭയഹരം ശ്രീവടപതിം ॥ 6॥
നിരാകാരം സ്വാമിഞ്ജയതു തവ രൂപം ശ്രുതിനുത-
മഹം തു ത്വാം മന്യേ കരചരണയുക്തം ഗുണനിധിം ।
ശിവേശഃ ശ്രീശോ വാ ഭവതു ന ഭിദാ യത്ര തമഹം
നമാമി ശ്രീനാഥം ഭവഭയഹരം ശ്രീവടപതിം ॥ 7॥
ജഡേ ദൃശ്യേ ദുഃഖേ നിപുണമതിഹേയേ ച ജഗതി
മൃഷാരൂപേ പുംസാം സദിതി സുഖമാദേയമിതി ധീഃ ।
യദസ്തിത്വാനന്ദപ്രതിഫലനമൂലാ തമമൃതം
നമാമി ശ്രീനാഥം ഭവഭയഹരം ശ്രീവടപതിം ॥ 8॥
വിഭാതു തന്നാഥ മദീയമാനസേ
ത്വദീയരൂപം സുമനോഹരം വിഭോ ।
അജാദിദേവൈരപി യസ്യ ചിന്തനം
സ്വചിത്തശുദ്ധ്യൈ സതതം വിധീയതേ ॥ 9॥
മായാരാമപ്രോക്തമേതത്സുരംയം
ശ്രീശസ്തോത്രം ശ്രീവടേശാഷ്ടകാഖ്യം ।
അസ്തു ശ്രീശസ്തേന തുഷ്ടഃ സ്തുവഭ്ദ്യോ
ദിശ്യാച്ഛ്രേയഃ ശാശ്വതം സ്വാശ്രിതേഭ്യഃ ॥ 10॥
തത്ത്വജ്ഞാനപ്രദം ഭക്തിവൈരാഗ്യപരിവര്‍ധനം ।
പഠിതവ്യമിദം നിത്യം സ്തോത്രം ശ്രീപതിതുഷ്ടിദം ॥ 11॥
വ്യാധികാലേ ച മോഹാന്ധ്യേ വിപത്തൌ ശ്രദ്ധയാ പഠേത് ।
യ ഇദം സ ഭയാന്‍മുക്തഃ സുഖമക്ഷയ്യമശ്നുതേ ॥ 12॥
ഇതി വേദാന്തതീര്‍ഥപണ്ഡിതശ്രീമായാരാമകൃതം വടപത്യഷ്ടകം സമാപ്തം ।
