Shri Balakrishna Ashtakam 2 in Hindi:
॥ श्री बालकृष्णाष्टकम् – २ ॥
श्रीमन्नन्दयशोदाहृदयस्थितभावतत्परो भगवान् ।
पुत्रीकृतनिजरूपः सुजयति पुरतः कृपालुर्बालकृष्णः ॥ १ ॥
कथमपि रिङ्गणमकरोदङ्गणगतजानुघर्षणोद्युक्तः ।
कटितटकिङ्किणीजालस्वनशङ्कितमानसः सदा ह्यास्ते ॥ २ ॥
विकसितपङ्कजनयनः प्रकटितहर्षः सदैव धूसराङ्गः ।
परिगच्छति कटिभङ्गप्रसरीकृतपाणियुग्माभ्याम् ॥ ३ ॥
उपलक्षितदधिभाण्डः स्फुरितब्रह्माण्डविग्रहो भुङ्क्ते ।
मुष्टीकृतनवनीतः परमपुनीतो मुग्धभावात्मा ॥ ४ ॥
नम्रीकृतविधुवदनः प्रकटीकृतचौर्यगोपनप्रयासः ।
स्वाम्बोत्सङ्गविलासः क्षुधितः सम्प्रति दृश्यते स्तन्यार्थी ॥ ५ ॥
सिंहनखाकृतिभूषणभूषितहृदयः सुशोभते नित्यं ।
कुण्डलमण्डितगण्डः साञ्जननयनो निरञ्जनः शेते ॥ ६ ॥
कार्यासक्तयशोदागृहकर्मण्यवरोधकः सदास्ते ।
तस्याः स्वान्तनिविष्टप्रणय प्रभाजनो यतोऽयम् ॥ ७ ॥
इत्थं व्रजपतितरुणी नमनीयं ब्रह्मरुद्राद्यैः ।
कमनीयं निजसूनुं लालयति स्म प्रत्यहं प्रीत्या ॥ ८ ॥
श्रीमद्वल्लभकृपया विशदीकृतमेतदष्टकं पठेद्यः ।
तस्य दयानिधिकृष्णो भक्तिप्रेमैकलक्षणः शीघ्रम् ॥ ९ ॥
इति श्रीकृष्णदासकृतं श्रीबालकृष्णाष्टकम् ।
Also Read:
Sri Balakrishna Ashtakam 2 (..srimannandaya..) Lyrics in Hindi | English | Kannada | Telugu | Tamil
