Shri Rama Gita in Bengali:
॥ শ্রীরামগীতা ॥
শ্রীমহাদেব উবাচ –
ততো জগন্মঙ্গলমঙ্গলাত্মনা
বিধায় রামায়ণকীর্তিমুত্তমাম্ ।
চচার পূর্বাচরিতং রঘূত্তমো
রাজর্ষিবর্যৈরভিসেবিতং যথা ॥ ১ ॥
সৌমিত্রিণা পৃষ্ট উদারবুদ্ধিনা
রামঃ কথাঃ প্রাহ পুরাতনীঃ শুভাঃ ।
রাজ্ঞঃ প্রমত্তস্য নৃগস্য শাপতো
দ্বিজস্য তির্যক্ত্বমথাহ রাঘবঃ ॥ ২ ॥
কদাচিদেকান্ত উপস্থিতং প্রভুং
রামং রমালালিতপাদপঙ্কজম্ ।
সৌমিত্রিরাসাদিতশুদ্ধভাবনঃ
প্রণম্য ভক্ত্যা বিনয়ান্বিতোঽব্রবীৎ ॥ ৩ ॥
ৎবং শুদ্ধবোধোঽসি হি সর্বদেহিনা-
মাত্মাস্যধীশোঽসি নিরাকৃতিঃ স্বয়ম্ ।
প্রতীয়সে জ্ঞানদৃশাং মহামতে
পাদাব্জভৃঙ্গাহিতসঙ্গসঙ্গিনাম্ ॥ ৪ ॥
অহং প্রপন্নোঽস্মি পদাম্বুজং প্রভো
ভবাপবর্গং তব যোগিভাবিতম্ ।
যথাঞ্জসাজ্ঞানমপারবারিধিং
সুখং তরিষ্যামি তথানুশাধি মাম্ ॥ ৫ ॥
শ্রুৎবাথ সৌমিত্রবচোঽখিলং তদা
প্রাহ প্রপন্নার্তিহরঃ প্রসন্নধীঃ ।
বিজ্ঞানমজ্ঞানতমঃপ্রশান্তয়ে
শ্রুতিপ্রপন্নং ক্ষিতিপালভূষণঃ ॥ ৬ ॥
শ্রীরামচন্দ্র উবাচ –
আদৌ স্ববর্ণাশ্রমবর্ণিতাঃ ক্রিয়াঃ
কৃৎবা সমাসাদিতশুদ্ধমানসঃ ।
সমাপ্য তৎপূর্বমুপাত্তসাধনঃ
সমাশ্রয়েৎসদ্গুরুমাত্মলব্ধয়ে ॥ ৭ ॥
ক্রিয়া শ্রীরোদ্ভবহেতুরাদৃতা
প্রিয়াপ্রিয়ৌ তৌ ভবতঃ সুরাগিণঃ ।
ধর্মেতরৌ তত্র পুনঃ শরীরকম্
পুনঃ ক্রিয়া চক্রবদীর্যতে ভবঃ ॥ ৮ ॥
অজ্ঞানমেবাস্য হি মূলকারণং
তদ্ধানমেবাত্র বিধৌ বিধীয়তে ।
বিদ্যৈব তন্নাশবিধৌ পটীয়সী
ন কর্ম তজ্জং সবিরোধমীরিতম্ ॥ ৯ ॥
নাজ্ঞানহানির্ন চ রাগসংক্ষয়ো
ভবেত্ততঃ কর্ম সদোষমুদ্ভবেৎ ।
ততঃ পুনঃ সংসৃতিরপ্যবারিতা
তস্মাদ্বুধো জ্ঞানবিচারবান্ভবেৎ ॥ ১০ ॥
ননু ক্রিয়া বেদমুখেন চোদিতা
তথৈব বিদ্যা পুরুষার্থসাধনম্ ।
কর্তব্যতা প্রাণভৃতঃ প্রচোদিতা
বিদ্যাসহায়ৎবমুপৈতি সা পুনঃ ॥ ১১ ॥
কর্মাকৃতৌ দোষমপি শ্রুতির্জগৌ
তস্মাৎসদা কার্যমিদং মুমুক্ষুণা ।
ননু স্বতন্ত্রা ধ্রুবকার্যকারিণী
বিদ্য ন কিঞ্চিন্মনসাপ্যপেক্ষতে ॥ ১২ ॥
ন সত্যকার্যোঽপি হি যদ্বদধ্বরঃ
প্রকাঙ্ক্ষতেঽন্যানপি কারকাদিকান্ ।
তথৈব বিদ্যা বিধিতঃ প্রকাশিতৈ-
র্বিশিষ্যতে কর্মভিরেব মুক্তয়ে ॥ ১৩ ॥
কেচিদ্বদন্তীতি বিতর্কবাদিন-
স্তদপ্যসদৃষ্টবিরোধকারণাৎ ।
দেহাভিমানাদভিবর্ধতে ক্রিয়া
বিদ্যা গতাহঙ্কৃতিতঃ প্রসিধ্দ্যতি ॥ ১৪ ॥
বিশুদ্ধবিজ্ঞানবিরোচনাঞ্চিতা
বিদ্যাত্মবৃত্তিশ্চরমেতি ভণ্যতে ।
উদেতি কর্মাখিলকারকাদিভি-
র্নিহন্তি বিদ্যাখিলকারকাদিকম্ ॥ ১৫ ॥
তস্মাত্ত্যজেৎকার্যমশেষতঃ সুধী-
র্বিদ্যাবিরোধান্ন সমুচ্চয়ো ভবেৎ ॥
আত্মানুসন্ধানপরায়ণঃ সদা
নিবৃত্তসর্বেন্দ্রিয়বৃত্তিগোচরঃ ॥ ১৬ ॥
যাবচ্ছারীরাদিষু মায়যাত্মধী-
স্তাবদ্বিধেয়ো বিধিবাদকর্মণাম্ ।
নেতীতি বাক্যৈরখিলং নিষিধ্য তৎ
জ্ঞাৎবা পরাত্মানমথ ত্যজেৎক্রিয়াঃ ॥ ১৭ ॥
যদা পরাত্মাত্মবিভেদভেদকং
বিজ্ঞানমাত্মন্যবভাতি ভাস্বরম্ ।
তদৈব মায়া প্রবিলীয়তেঽঞ্জসা
সকারকা কারণমাত্মসংসৃতেঃ ॥ ১৮ ॥
শ্রুতিপ্রমাণাভিবিনাশিতা চ সা
কথং ভবিষত্যপি কার্যকারিণী ।
বিজ্ঞানমাত্রাদমলাদ্বিতীয়ত-
স্তস্মাদবিদ্যা ন পুনর্ভবিষ্যতি ॥ ১৯ ॥
যদি স্ম নষ্টা ন পুনঃ প্রসূয়তে
কর্তাহমস্যেতি মতিঃ কথং ভবেৎ ।
তস্মাৎস্বতন্ত্রা ন কিমপ্যপেক্ষতে
বিদ্য বিমোক্ষায় বিভাতি কেবলা ॥ ২০ ॥
সা তৈত্তিরীয়শ্রুতিরাহ সাদরং
ন্যাসং প্রশস্তাখিলকর্মণাং স্ফুটম্ ।
এতাবদিত্যাহ চ বাজিনাং শ্রুতি-
র্জ্ঞানং বিমোক্ষায় ন কর্ম সাধনম্ ॥ ২১ ॥
বিদ্যাসমৎবেন তু দর্শিতস্ত্বয়া
ক্রতুর্ন দৃষ্টান্ত উদাহৃতঃ সমঃ ।
ফলৈঃ পৃথক্ত্বাদ্বহুকারকৈঃ ক্রতুঃ
সংসাধ্যতে জ্ঞানমতো বিপর্যযম্ ॥ ২২ ॥
সপ্রত্যবায়ো হ্যহমিত্যনাত্মধী-
রজ্ঞপ্রসিদ্ধা ন তু তত্ত্বদর্শিনঃ ।
তস্মাদ্বুধৈস্ত্যাজ্যমবিক্রিয়াত্মভি-
র্বিধানতঃ কর্ম বিধিপ্রকাশিতম্ ॥ ২৩ ॥
শ্রদ্ধান্বিতস্তত্ত্বমসীতি বাক্যতো
গুরোঃ প্রসাদাদপি শুদ্ধমানসঃ ।
বিজ্ঞায় চৈকাত্ম্যমথাত্মজীবয়োঃ
সুখী ভবেন্মেরুরিবাপ্রকম্পনঃ ॥ ২৪ ॥
আদৌ পদার্থাবগতির্হি কারণং
বাক্যার্থবিজ্ঞানবিধৌ বিধানতঃ ।
তত্ত্বম্পদার্থৌ পরমাত্মজীবকা-
বসীতি চৈকাত্ম্যমথানয়োর্ভবেৎ ॥ ২৫ ॥
প্রত্যক্পরোক্ষাদি বিরোধমাত্মনো-
র্বিহায় সঙ্গৃহ্য তয়োশ্চিদাত্মতাম্ ।
সংশোধিতাং লক্ষণয়া চ লক্ষিতাং
জ্ঞাৎবা স্বমাত্মানমথাদ্বয়ো ভবেৎ ॥ ২৬ ॥
একাত্মকৎবাজ্জহতী ন সম্ভবে-
ত্তথাজহল্লক্ষণতা বিরোধতঃ ।
সোঽয়ম্পদার্থাবিব ভাগলক্ষণা
যুজ্যেত তত্ত্বম্পদয়োরদোষতঃ ॥ ২৭ ॥
রসাদিপঞ্চীকৃতভূতসম্ভবং
ভোগালয়ং দুঃখসুখাদিকর্মণাম্ ।
শরীরমাদ্যন্তবদাদিকর্মজং
মায়াময়ং স্থূলমুপাধিমাত্মনঃ ॥ ২৮ ॥
সূক্ষ্মং মনোবুদ্ধিদশেন্দ্রিয়ৈর্যুতং
প্রাণৈরপঞ্চীকৃতভূতসম্ভবম্ ।
ভোক্তুঃ সুখাদেরনুসাধনং ভবেৎ
শরীরমন্যদ্বিদুরাত্মনো বুধাঃ ॥ ২৯ ॥
অনাদ্যনির্বাচ্যমপীহ কারণং
মায়াপ্রধানং তু পরং শরীরকম্ ।
উপাধিভেদাত্তু যতঃ পৃথক্স্থিতং
স্বাত্মানমাত্মন্যবধারয়েৎক্রমাৎ ॥ ৩০ ॥
কোশেষ্বয়ং তেষু তু তত্তদাকৃতি-
র্বিভাতি সঙ্গাৎস্ফতিকোপলো যথা ।
অসঙ্গরূপোঽয়মজো যতোঽদ্বয়ো
বিজ্ঞায়তেঽস্মিন্পরিতো বিচারিতে ॥ ৩১ ॥
বুদ্ধেস্ত্রিধা বৃত্তিরপীহ দৃশ্যতে
স্বপ্নাদিভেদেন গুণত্রয়াত্মনঃ ।
অন্যোন্যতোঽস্মিন্ব্যভিচারিতো মৃষা
নিত্যে পরে ব্রহ্মণি কেবলে শিবে ॥ ৩২ ॥
দেহেন্দ্রিয়প্রাণমনশ্চিদাত্মনাং
সঙ্ঘাদজস্ত্রং পরিবর্ততে ধিয়ঃ ।
বৃত্তিস্তমোমূলতয়াজ্ঞলক্ষণা
যাবদ্ভবেত্তাবদসৌ ভবোদ্ভবঃ ॥ ৩৩ ॥
নেতিপ্রমাণেন নিরাকৃতাখিলো
হৃদা সমাস্বাদিতচিদ্ঘনামৃতঃ ।
ত্যজেদশেষং জগদাত্তসদ্রসং
পীৎবা যথাম্ভঃ প্রজহাতি তৎফলম্ ॥ ৩৪ ॥
কদাচিদাত্মা ন মৃতো ন জায়তে
ন ক্ষীয়তে নাপি বিবর্ধতেঽনবঃ ।
নিরস্তসর্বাতিশয়ঃ সুখাত্মকঃ
স্বয়ম্প্রভঃ সর্বগতোঽয়মদ্বয়ঃ ॥ ৩৫ ॥
এবংবিধে জ্ঞানময়ে সুখাত্মকে
কথং ভবো দুঃখময়ঃ প্রতীয়তে ।
অজ্ঞানতোঽধ্যাসবশাৎপ্রকাশতে
জ্ঞানে বিলীয়েত বিরোধতঃ ক্ষণাৎ ॥ ৩৬ ॥
যদন্যদন্যত্র বিভাব্যতে ভ্রমা-
দধ্যাসমিত্যাহুরমুং বিপশ্চিতঃ ।
অসর্পভূতেঽহিবিভাবনং যথা
রজ্জ্বাদিকে তদ্বদপীশ্বরে জগৎ ॥ ৩৭ ॥
বিকল্পমায়ারহিতে চিদাত্মকে-
ঽহঙ্কার এষ প্রথমঃ প্রকল্পিতঃ ।
অধ্যাস এবাত্মনি সর্বকারণে
নিরাময়ে ব্রহ্মণি কেবলে পরে ॥ ৩৮ ॥
ইচ্ছাদিরাগাদি সুখাদিধর্মিকাঃ
সদা ধিয়ঃ সংসৃতিহেতবঃ পরে ।
যস্মাৎপ্রসুপ্তৌ তদভাবতঃ পরঃ
সুখস্বরূপেণ বিভাব্যতে হি নঃ ॥ ৩৯ ॥
অনাদ্যবিদ্যোদ্ভববুদ্ধিবিম্বিতো
জীবপ্রকাশোঽয়মিতীর্যতে চিতঃ ।
আত্মাধিয়ঃ সাক্ষিতয়া পৃথক্স্থিতো
বুধ্দ্যাপরিচ্ছিন্নপরঃ স এব হি ॥ ৪০ ॥
চিদ্বিম্বসাক্ষ্যাত্মধিয়াং প্রসঙ্গত-
স্ত্বেকত্র বাসাদনলাক্তলোহবৎ ।
অন্যোন্যমধ্যাসবশাৎপ্রতীয়তে
জডাজডৎবং চ চিদাত্মচেতসোঃ ॥ ৪১ ॥
গুরোঃ সকাশাদপি বেদবাক্যতঃ
সঞ্জাতবিদ্যানুভবো নিরীক্ষ্য তম্ ।
স্বাত্মানমাত্মস্থমুপাধিবর্জিতং
ত্যজেদশেষং জডমাত্মগোচরম্ ॥ ৪২ ॥
প্রকাশরূপোঽহমজোঽহমদ্বয়ো-
ঽসকৃদ্বিভাতোঽহমতীব নির্মলঃ ।
বিশুদ্ধবিজ্ঞানঘনো নিরাময়ঃ
সম্পূর্ণ আনন্দময়োঽহমক্রিয়ঃ ॥ ৪৩ ॥
সদৈব মুক্তোঽহমচিন্ত্যশক্তিমা-
নতীন্দ্রিয়জ্ঞানমবিক্রিয়াত্মকঃ ।
অনন্তপারোঽহমহর্নিশং বুধৈ-
র্বিভাবিতোঽহং হৃদি বেদবাদিভিঃ ॥ ৪৪ ॥
এবং সদাত্মানমখণ্ডিতাত্মনা
বিচারমাণস্য বিশুদ্ধভাবনা ।
হন্যাদবিদ্যামচিরেণ কারকৈ
রসায়নং যদ্বদুপাসিতং রুজঃ ॥ ৪৫ ॥
বিবিক্ত আসীন উপারতেন্দ্রিয়ো
বিনির্জিতাত্মা বিমলান্তরাশয়ঃ ।
বিভাবয়েদেকমনন্যসাধনো
বিজ্ঞানদৃক্কেবল আত্মসংস্থিতঃ ॥ ৪৬ ॥
বিশ্বং যদেতৎপরমাত্মদর্শনং
বিলাপয়েদাত্মনি সর্বকারণে ।
পূর্ণশ্চিদানন্দময়োঽবতিষ্ঠতে
ন বেদ বাহ্যং ন চ কিঞ্চিদান্তরম্ ॥ ৪৭ ॥
পূর্বং সমাধেরখিলং বিচিন্তয়ে-
দোঙ্কারমাত্রং সচরাচরং জগৎ ।
তদেব বাচ্যং প্রণবো হি বাচকো
বিভাব্যতেঽজ্ঞানবশান্ন বোধতঃ ॥ ৪৮ ॥
অকারসংজ্ঞঃ পুরুষো হি বিশ্বকো
হ্যুকারকস্তৈজস ঈর্যতে ক্রমাৎ ।
প্রাজ্ঞো মকারঃ পরিপঠ্যতেঽখিলৈঃ
সমাধিপূর্বং ন তু তত্ত্বতো ভবেৎ ॥ ৪৯ ॥
বিশ্বং ৎবকারং পুরুষং বিলাপয়ে-
দুকারমধ্যে বহুধা ব্যবস্থিতম্ ।
ততো মকারে প্রবিলাপ্য তৈজসং
দ্বিতীয়বর্ণং প্রণবস্য চান্তিমে ॥ ৫০ ॥
মকারমপ্যাত্মনি চিদ্ঘনে পরে
বিলাপয়েৎপ্রাজ্ঞমপীহ কারণম্ ।
সোঽহং পরং ব্রহ্ম সদা বিমুক্তিম-
দ্বিজ্ঞানদৃঙ্ মুক্ত উপাধিতোঽমলঃ ॥ ৫১ ॥
এবং সদা জাতপরাত্মভাবনঃ
স্বানন্দতুষ্টঃ পরিবিস্মৃতাখিলঃ ।
আস্তে স নিত্যাত্মসুখপ্রকাশকঃ
সাক্ষাদ্বিমুক্তোঽচলবারিসিন্ধুবৎ ॥ ৫২ ॥
এবং সদাভ্যস্তসমাধিয়োগিনো
নিবৃত্তসর্বেন্দ্রিয়গোচরস্য হি ।
বিনির্জিতাশেষরিপোরহং সদা
দৃশ্যো ভবেয়ং জিতষড্গুণাত্মনঃ ॥ ৫৩ ॥
ধ্যাৎবৈবমাত্মানমহর্নিশং মুনি-
স্তিষ্ঠেৎসদা মুক্তসমস্তবন্ধনঃ ।
প্রারব্ধমশ্নন্নভিমানবর্জিতো
ময়্যেব সাক্ষাৎপ্রবিলীয়তে ততঃ ॥ ৫৪ ॥
আদৌ চ মধ্যে চ তথৈব চান্ততো
ভবং বিদিৎবা ভয়শোককারণম্ ।
হিৎবা সমস্তং বিধিবাদচোদিতং
ভজেৎস্বমাত্মানমথাখিলাত্মনাম্ ॥ ৫৫ ॥
আত্মন্যভেদেন বিভাবয়ন্নিদং
ভবত্যভেদেন ময়াত্মনা তদা ।
যথা জলং বারিনিধৌ যথা পয়ঃ
ক্ষীরে বিয়দ্ব্যোম্ন্যনিলে যথানিলঃ ॥ ৫৬ ॥
ইত্থং যদীক্ষেত হি লোকসংস্থিতো
জগন্মৃষৈবেতি বিভাবয়ন্মুনিঃ ।
নিরাকৃতৎবাচ্ছ্রুতিয়ুক্তিমানতো
যথেন্দুভেদো দিশি দিগ্ভ্রমাদয়ঃ ॥ ৫৭ ॥
যাবন্ন পশ্যেদখিলং মদাত্মকং
তাবন্মদারাধনতৎপরো ভবেৎ ।
শ্রদ্ধালুরত্যূর্জিতভক্তিলক্ষণো
যস্তস্য দৃশ্যোঽহমহর্নিশং হৃদি ॥ ৫৮ ॥
রহস্যমেতচ্ছ্রুতিসারসঙ্গ্রহং
ময়া বিনিশ্চিত্য তবোদিতং প্রিয় ।
যস্ত্বেতদালোচয়তীহ বুদ্ধিমান্
স মুচ্যতে পাতকরাশিভিঃ ক্ষণাৎ ॥ ৫৯ ॥
ভ্রাতর্যদীদং পরিদৃশ্যতে জগ-
ন্মায়ৈব সর্বং পরিহৃত্য চেতসা ।
মদ্ভাবনাভাবিতশুদ্ধমানসঃ
সুখী ভবানন্দময়ো নিরাময়ঃ ॥ ৬০ ॥
যঃ সেবতে মামগুণং গুণাৎপরং
হৃদা কদা বা যদি বা গুণাত্মকম্ ।
সোঽহং স্বপাদাঞ্চিতরেণুভিঃ স্পৃশন্
পুনাতি লোকত্রিতয়ং যথা রবিঃ ॥ ৬১ ॥
বিজ্ঞানমেতদখিলং শ্রুতিসারমেকং
বেদান্তবেদচরণেন ময়ৈব গীতম্ ।
যঃ শ্রদ্ধয়া পরিপঠেদ্গুরুভক্তিয়ুক্তো
মদ্রূপমেতি যদি মদ্বচনেষু ভক্তিঃ ॥ ৬২ ॥
॥ ইতি শ্রীমদধ্যাত্মরামায়ণে উমামহেশ্বরসংবাদে উত্তরকাণ্ডে পঞ্চমঃ সর্গঃ ॥
Also Read:
Sri Rama Gita Lyrics in Hindi | English | Bengali | Gujarati | Kannada | Malayalam | Oriya | Telugu | Tamil