Sri Valli Bhuvaneshwari Ashtakam Lyrics in Telugu:
శ్రీవల్లీభువనేశ్వర్యష్టకమ్
శ్రీచిత్రాపురవాసినీం వరభవానీశఙ్కరత్వప్రదాం
ఓతప్రోతశివాన్వితాం గురుమయీం గామ్భీర్యసన్తోషధామ్ ।
హృద్గుహ్యాఙ్కురకల్పితం గురుమతం స్రోతాయతే తాం సుధాం
శ్రీవల్లీం భువనేశ్వరీం శివమయీమైశ్వర్యదాం తాం భజే || ౧ ||
చిన్ముద్రాఙ్కితదక్షిణాస్యనిహితాం శ్రీభాష్యకారశ్రియం
తాం హస్తామలకప్రబోధనకరీం క్షేత్రే స్థితాం మాతృకామ్ ।
శ్రీవల్ల్యుద్భవపుష్పగన్ధలహరీం సారస్వతత్రాయికాం
శ్రీవల్లీం భువనేశ్వరీం శివమయీమైశ్వర్యదాం తాం భజే || ౨ ||
శ్రీవిద్యోదితకౌముదీరసభరాం కారుణ్యరూపాత్మికాం
మూర్తీభూయ సదా స్థితాం గురుపరిజ్ఞానాశ్రమాశ్వాసనామ్ ।
సాన్నిధ్యాఙ్గణశిష్యరక్షణకరీం వాత్సల్యసారాస్పదాం
శ్రీవల్లీం భువనేశ్వరీం శివమయీమైశ్వర్యదాం తాం భజే || ౩ ||
తన్వీం రక్తనవార్కవర్ణసదృశీం ఖణ్డేన్దుసమ్మణ్డితాం
పీనోత్తుఙ్గకుచద్వయీం కుటికటీం త్ర్యక్షాం సదా సుస్మితామ్ ।
పాశాభీతివరైశ్వరాఙ్కుశధరాం శ్రీపర్ణపాదాం పరాం
శ్రీవల్లీం భువనేశ్వరీం శివమయీమైశ్వర్యదాం తాం భజే || ౪ ||
శ్రీమచ్ఛఙ్కరసద్గురుర్గణపతిర్వాతాత్మజః క్షేత్రపః
ప్రాసాదే విలసన్తి భూరి సదయే నిత్యస్థితే హ్రీంమయి ।
యుష్మత్స్నేహకటాక్షసౌమ్యకిరణా రక్షన్తి దోగ్ధ్రీకులం
శ్రీవల్లీం భువనేశ్వరీం శివమయీమైశ్వర్యదాం తాం భజే || ౫ ||
గోప్త్రీం వత్ససురక్షిణీం మఠగృహే భక్తప్రజాకర్షిణీం
యాత్రాదివ్యకరీం విమర్శకలయా తాం సాధకే సంస్థితామ్ ।
ప్రాయశ్చిత్తజపాదికర్మకనితాం జ్ఞానేశ్వరీమమ్బికాం
శ్రీవల్లీం భువనేశ్వరీం శివమయీమైశ్వర్యదాం తాం భజే || ౬ ||
శ్రీసారస్వతగేయపేయజననీం జ్ఞానాదివిద్యాప్రదాం
లోకే భక్తసుగుప్తితారణకరీం కార్పణ్యదోషాపహామ్ ।
ఆర్యత్వప్రవికాసలాసనకరీం హృత్పద్మవిద్యుత్ప్రభాం
శ్రీవల్లీం భువనేశ్వరీం శివమయీమైశ్వర్యదాం తాం భజే || ౭ ||
క్షుద్రా మే భువనేశ్వరి స్తుతికథా కిం వా ముఖే తే స్మితం
యాఽసి త్వం పదవర్ణవాక్యజననీ వర్ణైః కథం వర్ణ్యతామ్ ।
వాసస్తే మమ మానసే గురుకృపే నిత్యమ్ భవేత్ పావని
నాన్యా మే భువనేశ్వరి ప్రశమికా నాన్యా గతిర్హ్రీంమయి || ౮ ||
ఇతి శ్రీసద్యోజాత శఙ్కరాశ్రమస్వామివిరచితం
శ్రీవల్లీభువనేశ్వర్యష్టకం సమ్పూర్ణమ్ ।